Esdras 6 - Biblia ande chib Romani

¹ Ondaka o charo Dario phenda te roden ande lila kai arakhena len ande Babilonia,

² ta ande charoina katar e Akmeta, kai si ande phuv katar e Media, malade iek lil kai phenela gia:

³ Ando purvo burs kai charoila o charo Siro, phenda te cheren gaia ezgoda: Cheres o cher e Devleko ando Jerusalem: Te thodon e barra telal katar e zidura ta te vazden pale o cher, te sai cheren kote e kurbanura. Trubul te avel le bis ta efta pole llik upre ta bis ta efta pole ando bulipe,

⁴ ka chere trin zidura cherde katar e barra bare, ta iek cherdo ande kasta neve. O barvalipe e charoko ka pochinel sa.

⁵ A cheres e ezgode sunakune ta rupune katar o cher e Devleko, gola kai o charo Nabukodonosor ikanda katar o cher e Devleko katar o Jerusalem ta inllarda len ande Babilonia, trubul te irin len ta te inllaren len ando Jerusalem, ta te thoven len ando cher e Devleko kote kai si lengo than.

⁶ Ta o charo Dario phenda e Tatnaieke kai gazdaril ande phuv kai achel pe ogoia rig katar e len Eufrates, ta e Setar Boznaieke ta e llene kai radin lea isto ande goia phuv: Llantar katar o Jerusalem

⁷ ta muken kai e gazda katar e judiura ta kai e phure te vazden pale o cher e Devleko isto po than kai saia omanglal.

⁸ Ta tumen trubul te pomozin e llenen kai vazden pale o cher e Devleko, ta te pochinen sa so von ka den. Tumen ka cheren le e lovenchar kai chidiniaon katar o foro ta gia te na achel o rado.

⁹ Ta morabi te den suako llive kai e popura katar o Jerusalem, sa so ka phenen von kai trubul len, avena guruvorra, busne o bakre te cheren e kurbanura phabarde e Devleke katar o miloso, o lliu o lon, mol ta o zeitino,

¹⁰ te sai den e Devle katar o miloso lacho kurbano, ta te molinpe i pala o zivoto e charoko ta i pala leke chaurre.

¹¹ Ta vareko te na kandia so me phenav, ka ikanen katar leko cher iek kas baro ta ka mundaren le pusado pe gua kas, ta leko cher ka avel zatrime.

¹² ¡Ta o Del kai esvirisarda te avel thodo leko anav ando Jerusalem, ta te zatril fisave charo o phuvia kai tromala te cherel varesavo bilachipe e chereke katar o Del kai si ando Jerusalem! Me, o Dario, phendem gala orbe. Te cherdol oma sa so phendem.

Pale radin ta geton o rado

¹³ Ondaka o Tatnai, gazda katar e phuv kai achel pe ogoia rig katar e len Eufrates, ta o Setar Boznai ta e llene kai radina lea, cherde oma sa so phenda lenge o charo Dario.

¹⁴ Ta gia e judiura sai thodepe te radin pale, gia sar phende le e poraukura Jageo ta o Zakarias, chavo katar o Ido. Ta vazdie o cher e Devleko gia sar phenda le o Del katar o Israel, ta gia sar phenda le o Siro, o Dario ta o Artajerjes, charura katar e Persia.

¹⁵ O cher e Devleko getosailo ando trito llive katar o chon Adar, ando sovto burs kai gazdarila o Dario, charo katar e Persia.

¹⁶ E israelitura, e popura, e levitura ta sa ellene kai irisailea katar e Babilonia, veselisaile but ta cherde slava e Devle kana die le gua cher.

¹⁷ Ondaka die stotina guruvorra, dui stotine bakre purane ta star stotine bakre, ta i desudui busne, suako iek pala suako vicha katar o Israel, die len kurbano pala sa o bilachipe katar o Israel.

¹⁸ Mapalal phende e poponenge savo vreme saia te radin, ta thode e levitonen pe po than te blagosin e Devle ando Israel, prema sar si pisime ando lil katar o Moises.

¹⁹ Gola kai inllarde len phangle ta irisaile, cherde i e paskua o llive desustar katar o purvo chon.

²⁰ E popura ta e levitura jaladepe prema o zakono katar o jaladipe, ta sa sea chiste prema o zakono. Ondaka cherde o kurbano katar e paskua pala sa e llene kai inllardea len phangle ta pala e popura kai radina lenchar ta isto pala pete.

²¹ Sa e israelitura kai irisailea katar o phandipe besle pe sinia katar e paskua, ta lenchar besle sa e llene kai fuladile katar o bilachipe kai cherena e phuvia kai ni pachana ando Del e Israeleko.

²² Sou llive cherde veselimaia e slava katar e marrne kai inai len levadura, soke o Del dia len but veselia kana cherda te pomozil len o charo katar e Asiria, te vazden o cher e Devleko, o Del katar o Israel.