Esdras 3 - Biblia ande chib Romani

Lacharen o altar e Devleke

¹ Kana nakhle efta chon, ta e israelitura thodeape suako lleno ande po foro, sa o foro chidinailo ando Jerusalem.

² Ondaka o Jesua, chavo katar o Josadak, ta e popura kai radina lea, o Zorobabel, chavo katar o Salatiel, ta leki familia, thodepe te vazden o altar katar o Del e Israeleko, te thoven upral e kurbanura phabarde gia sar phenel o zakono katar o Moises, manus e Devleko.

³ Vazdie o altar, ta thode le isto po than kai saia omanglal, soke darana katar e llene kai sea ande goia phuv, ta suako thiarin ta pasa e riat dena kurbanura phabarde e Devleke.

⁴ Ta i cherde e slave katar e cherorra, prema o zakono kai saia pisime. Cherde kurbanura phabarde suako llive prema sar sea sikade, ta suako ezgoda ande pe llivesa,

⁵ ta i o kurbano phabardo kai cherdola suako llive ta kana saia mesechina, prema e slave kai cherena e Devleke. Ta i e kurbanura kai vareko mangela te del vou petar e Devleke, ta suako ofrenda.

⁶ Ta die kurbanura phabarde e Devleke sar kana saia o purvo llive katar o eftato chon, a ni thodeape te vazden o cher e Devleko ande gola llivesa.

⁷ Mapalal die love kai e llene kai radin ande barra ta ande kasta. Ta i die len jape, pipe ta zeitino e llenen katar o Tiro ta o Sidon te sai inllaren upral pe mora katar o Libano llik ando Jope kasta katar o sedro, prema sar mukla len te cheren o Siro, charo katar e Persia.

Vazden o cher e Devleko

⁸ O Zorobabel, chavo katar o Salatiel, o Jesua, chavo katar o Josadak, e popura, e levitura kai radina lenchar ta e llene kai sea phangle kai mapalal irisaile ando Jerusalem, thodepe te vazden pale o cher e Devleko ando duito chon katar o duito burs sar kana irisaile ando Jerusalem, ta thode te gazdarin po rado e levitonen kai saia lenge mai but katar e bis burs.

⁹ O Jesua, leke chave, leke phlal, o Kadmiel ta leke chave, kai sea katar o porodo katar o Juda, ta i e familia e chave ta e phlal katar o Jenadad, kai sea levitura, gazdarisarde pe llene kai radina te vazden pale o cher e Devleko.

¹⁰ Kana e llene kai radina thode e barra ande phuv te vazden o cher e Devleko, e popura thodepe pe porrne furiade gole ezgodake, ta basalena ande e tuturuge, a e levitura kai sea porodo katar o Asaf basalena ande kotora sastrune ta blagosina e Devle, prema sar phendaia o David, charo katar Israel.

¹¹ Nesave blagosina e Devle, a aver phenena: Den fala e Devle, soke vou si lacho, soke leko volipe po Israel si ostade. Ta sa o foro urkila veselimatar ta blagosina e Devle, soke llala angle o rado te vazden o cher e Devleko.

¹² Ta but llene katar e popura, levitura ta gazda katar e familie kai sea phure ta kai dikhlea o purvo cher e Devleko, rovena ando baro avazi soke dikhena kai thodepe te vazden gava nevo cher e Devleko. Ta but llene urkina veselimatar.

¹³ Nasti achardola ko urkila veselimatar ta ko rovela maskar e llene, soke urkina gia zurale kai asundona duratar e avazura.