Esdras 1 - Biblia ande chib Romani

O zakono katar o Siro

¹ Kana cherela burs llive kai charoila o charo katar o Siro, te sai cherdon e alava e Devleke kai phendaia lenge o Jeremias, o Del cherda te inllarel o Siro e orbaia ta i te pisin la ande sa e phuv kai charoila, ta gala alava phenena gia:

² O Siro charo katar e Persia, phenel gia: O Gazda, o Del katar o miloso thoda ande me va sa e phuvia e suetoke, ta phenda mange te cherav leke iek cher ando Jerusalem, kai si ande phuv katar o Juda.

³ Goleke te si vareko katar o foro e Gazdako maskar tumende, o Del te pomozil le, ta te llal ando Jerusalem kai si ando Juda, te vazdel o cher e Gazdako, o Del katar o Israel, kai si ando Jerusalem.

⁴ Ta sa gola kai ka achen, ande savo foro avela kai zivin, morabi te pomozin len e llene kai zivin pasa lende ta te den len rup, sunakai, guruva, so avela len, ta te bichalen so mangena te den te vazden pale o cher e Devleko kai si ando Jerusalem.

E israelitura irinpe ando Jerusalem

⁵ E gazda katar e familie katar o Juda ta katar o Benjamin, ta e popura ta e levitura, sa e llene kai o Del dia len zor lachardepe te irinpe ando Jerusalem te vazden pale o cher e Devleko.

⁶ Sa e llene kai zivina pasa lende pomozina len ta die len rup, sunakai, ezgode, guruva ta ezgode kuch. Aver llene dena len so saia ande lengo lio te den.

⁷ A o charo o Siro dia e ezgode kai radin lenchar ando cher e Devleko, kai o charo Nabukodonosor ikandaia katar o Jerusalem ta inllardaia len ando cher katar leke dela.

⁸ O Siro irisarda len ta dia len kai o Mitriades, o lleno kai arakhela e love. Vou llinda len ta dia len kai o Sesbasar, gazda katar o Juda.

⁹ Gala si e ezgode kai llinde: Tranda tasura bare sunakune, milia tasura bare rupune, bis ta inia churia,

¹⁰ tranda tasura sunakune, aver star stotine ta des tasura rupune, ta milia ezgode ios.

¹¹ Sa e ezgode sunakune ta rupune sea panch milie ta star stotine. Ta o Sesbasar inllarda len ando Jerusalem kana irisailo e llenenchar kai omanglal sea phangle ande Babilonia ta irisailea ando Jerusalem.