Eksodo 9 - Biblia ande chib Romani

E zatrania ande zivirinie

¹ Ondaka o Del phenda e Moiseseke: Lla kai o Faraon, ta phen leke: Gia phenel o Del, o Del katar e ebreura: Muk te llal me foro, te blagosil man.

² Soke te na muklan le, ta te achadan le,

³ o va e Devleko ka avel pe che zivirinie kai si ande umal, ka avel iek nasualipe but baro pe lende. Ka meren e gra, e magarchura, e deve, e guruva ta e bakre.

⁴ A e zivirinie katar o Israel ni ka avel lenge niso, goleke e zivirinie katar o Israel ni iek lendar ni ka merel.

⁵ Ta o Del thoda o llive, ta phenda: Me thiara ka cherav gaia ezgoda.

⁶ Ta thiarinako, o Del cherda gaia ezgoda. Sa e zivirinie katar e ejipsiura mule, a katar e zivirinie katar o Israel ni mula ni iek lendar.

⁷ Ondaka o Faraon bichalda te dikhen e zivirinie katar o Israel, ta dikhle kai lenge zivirinie ni iek lendar ni muli, a o lio e Faraonoko zurailo, ta ni mukla e foro te llaltar.

E zatrania katar e phuña

⁸ Ondaka o Del phenda e Moiseseke ta e Aaronoke: Len cherricha prajo katar e furnava ta llan kai o Faraon, ta kana ka aven lete, tu Moises ka chude upre o prajo.

⁹ Ta o prajo ka furial pe sa o foro, ta ka cherel te liken phuña pe sa e manusa ta pe sa e zivirinie katar o Ejipto.

¹⁰ O Moises ta o Aaron lie o prajo katar e furnava ta llele kai o Faraon. Kote o Moises chudia o prajo upre, ta likeste phuña pe manusa ta i pe zivirinie.

¹¹ A e chirimatarke nasti achena angla o Moises, soke von sargo sa e ejipsiura sea pherde phuña.

¹² A o Del zuriarda o lio e Faraonoko, ta ni thoda lenge sama, gia sar o Del phendaia e Moiseseke.

E zatrania katar e krupe

¹³ Ondaka o Del phenda e Moiseseke: Uste thiarinako rano, ta lla ta phen e Faraonoke: Gia phenda o Del, o Del e katar e ebreura: Muk te llal me foro, te blagosil man.

¹⁴ Soke akana ka bichalav sa me zatranie pe tute, ta pe llene kai radin chuke ta pe sa cho foro, te sai llane kai inai niko sargo me pe sa e phuv.

¹⁵ Me te manglema bichaldema iek zatrania pe tute ta pe cho foro te sikavav mi zor, ta tu sumbisailana katar e phuv.

¹⁶ A me muklen tut te zivi te sai dikhe mi zor ta te sai pinllaren man ande sa e phuv.

¹⁷ A tu pale vazdiniao pe mo foro, ta ni kame te muke le te llal.

¹⁸ A thiara isto ande gava saiato ka cherav te peren zurale, bare krupe, sar nikada ni pela ando Ejipto.

¹⁹ Goleke bichal te guruven che zivirinie ta sa so si tut ande umal, soke e bare krupe kana ka pheren, ka mundaren sa e manusen ta e zivirinien kai ka aven avri ta ni ka aven gurudine.

²⁰ Nesave llene kai radina e Faraonoke daraile katar e alava e Devleke, ta gurude pe slugen ta pe zivirinien ta ni mukle len avri.

²¹ A sea aver kai ni pachaie, ta mukle len avri.

²² Ondaka o Del phenda e Moiseseke: Vazde cho va karing o miloso, te sai peren e krupe pe sa o Ejipto, pe manusa, pe zivirinie, ta pe patra katar e umalia katar o Ejipto.

²³ Ondaka o Moises vazdia pi rovli karing o miloso, ta o Del cherda te girmil o miloso ta te peren esterliche ta te phabol e iag pe phuv ta te peren krupe pe sa o Ejipto.

²⁴ Ta pela krupe ta iag amime, gia bare ta gia zurale sar nikada ni avilape pe phuv katar o Ejipto.

²⁵ Ta e krupe zatrisarde sa so saia ande phuv katar Ejipto, manusen ta zivirinien. Ta e krupe zatrisarde sa e patra kai sea ande umalia, ta phagle sa e kasta katar o Ejipto.

²⁶ Samo ande phuv katar o Gosen, kote kai zivina e israelitura, ni diapeke ni iek krupa.

²⁷ Ondaka o Faraon bichalda te ikharen e Moisese ta e Aarone, ta phenda lenge: Llanav kai cherdem o bilachipe. E dos si pe ma ta pe mo foro, a na po Del.

²⁸ Molin tumen e Devleke te na girmil ios ta te achavel e krupe, ta me ka mukav tumen te llan, ta ni ka achavav tumen ios.

²⁹ A o Moises phenda leke: Me samo ka likav katar o foro, ka vazdav me va karing o Del, ta ni ka girmil ios ta ni ka peren ios krupe, te sai llane kai e phuv si e Devleki.

³⁰ A me llanav kai ni tu ta ni che llene kai radin chuke ni daran katar o Del o Gazda.

³¹ E vostanura kai saia te ikanen lendar o lino ta e sebada achile zatrime, soke pe sebada likistea e kuchurra, a po lino likistea e lulunllorra.

³² A o lliu ta o senteno braduisaile, soke von liken mapalal.

³³ Kana o Moises llelotar katar o Faraon ta likisto katar o foro, vazdia pe va karing o Del ta ni girmisarda ios ta achile e krupe, ta ni pela ios o bursin pe phuv.

³⁴ A kana o Faraon dikhla kai o bursin achilo ta kai ni dela peke ios e krupe, ta kai ni girmila ios, pale thodape te cherel o bilachipe ta zuriarde po lio vou ta i e llene kai radina leke.

³⁵ Ta o lio e Faraonoko zurailo, ta ni mukla te llan e israelen, gia sar o Del phendaia e Moiseseke te phel le.