Eksodo 6 - Biblia ande chib Romani

¹ Ondaka o Del phenda e Moiseseke: Akana ka dikhe so ka cherav e Faraonoia, soke samo zoriaia ka mukel tumen te liken katar pi phuv, ta isto vou ka phenel tumenge te llantar.

O Del ikharel pale e Moisese

² Ta o Del phenda e Moiseseke: Me sem o Jeova.

³ Me sikadilem e Abraameke, e Isaakeke ta e Jakobeke ta pinllarde man gale anavea o Del kai si le sa e zor, a pe mo anav o Jeova ni dieman te sikadivav lenge.

⁴ Ta achilem lenchar pe iek orba, te dav len e phuv katar o Kanaan, goia phuv kai von iek drom zivisarde nesavo vreme sargo llene kai aven katar aver phuv.

⁵ Ta akana kai asundem kai e israelitura nakhen duk, ta kai e ejipsiura pe zor cheren len te radin, diem man golli pe orba kai achilema lenchar.

⁶ Goleke lla ta phen e israelenge kai me, tumaro Del, ka ikanav tumen katar o Ejipto, ta katar o baro rado kai thode pe tumende e ejipsiura te cheren pe zor. Ka sikavav mi zor ta ka braduiv tumen bare krisaia.

⁷ Ka lav tumen sargo mo foro, ta me ka avav tumaro Del. Gia tumen ka llanen kai me sem o Gazda tumaro Del, kai braduisardem tumen katar o baro rado kai thodea tumen e ejipsiura te cheren pe zor.

⁸ Ta ka inllarav tumen ande phuv kai diem mo alav kai ka dav e Abraame, e Isaake ta e Jakobe, ta tumen ka dav gaia phuv. Soke me sem tumaro Del.

⁹ O Moises phenda sa gala alava e israelenge, a von sea gia chinie katar o rado kai thodea len te cheren pe zor, kai nasti thovena leke sama.

¹⁰ Ondaka o Del phenda e Moiseseke:

¹¹ Lla ta phen e Faraonoke o charo katar o Ejipto te mukel te liken katar leki phuv e israelen.

¹² A o Moises phenda e Devleke: Ni e israelitura ni thoven mange sama, ¿a sar ka thovel mange sama o Faraon, kana me ni llanav te dav orba sukar?

¹³ Ondaka o Del bichalda e Moisese ta e Aarone te phenen e israelenge ta e Faraonoke charo katar o Ejipto, kai o Del phenda lenge te ikanen katar e phuv katar o Ejipto o e israelen.

Gala si e anava katar e vicha e Aaronoki ta e Moiseseki

¹⁴ Gala si e gazda katar e familie, pe rig lenge dadengi. E chave katar o Ruben, o chavo o mai purano katar o Israel, sea gala: O Janok, o Falu, o Jesron ta o Karmi. Gala si e familia katar o Ruben.

¹⁵ E chave katar o Simeon sea gala: O Jemuel, o Jamin, o Oad, o Jakin, o Sojar ta o Saul, kai leki dei saia iek kananea. Gaia si e familia katar o Simeon.

¹⁶ O Levi zivisarda stotina ta tranda ta efta burs. Gala si e anava katar leke chave, katar o mai purano llik kai o mai terno: O Gerson, o Koat ta o Merari.

¹⁷ E chave katar o Gerson sea: O Libni, ta o Simei, katar lengi familia.

¹⁸ O Koat zivisarda stotina ta tranda ta trin burs, ta leke chave sea: O Amram, o Izar, o Jebron ta o Uziel.

¹⁹ E chave katar o Merari sea gala: O Majli ta o Musi. Gala si e familia katar o Levi, katar o mai purano llik o mai terno.

²⁰ O Amram zinisailo iekhe diskiniaia kai ikhardola Jokabeb kai saia leki bibi, ta voi bianda e Aarone ta e Moisese. Ta o Amram zivisarda stotina ta tranda ta efta burs.

²¹ E chave katar o Izar sea gala: O Kore, o Nefeg ta o Zikri.

²² E chave katar o Uziel sea gala: O Misael, o Elzafan ta o Sitri.

²³ O Aaron zinisailo iekhe diskiniaia kai ikhardola Elisabet, kai saia chorri katar o Aminadab ta saia phiorri katar o Naason, ta maladila lake o Nadab, o Abiu, o Eleazar ta o Itamar.

²⁴ E chave katar o Kore sea gala: O Asir, o Elkana ta o Abiasaf. Gaia si e familia katar e koreitura.

²⁵ O Eleazar o chavo katar o Aaron, zinisailo iekhe diskiniaia kai saia iek katar e chorra katar o Futiel. Gala si e gazda katar e familia katar e levitura prema lengi vicha.

²⁶ Von si isto o Aaron ta o Moises, kai lenge phenda o Del te ikanen katar o Ejipto e israelen, lacharde sargo e boñikura.

²⁷ Isto von si o Moises ta o Aaron kai die orba e Faraonoia, o charo katar o Ejipto, te sai ikanen katar goia phuv e israelen.

O Del ikharel e Moisese ta e Aarone

²⁸ Kana o Del dia orba ando Ejipto e Moisesea,

²⁹ phenda leke: Me sem o Del. Phen e Faraonoke, o charo katar o Ejipto, sa so ka phenav chuke.

³⁰ A o Moises phenda leke: Devla, me ni llanav te dav orba sukar, goleke o charo katar o Ejipto ni ka thovel mange sama.