Eksodo 40 - Biblia ande chib Romani

O Moises vazdel o santuario

¹ O Del dia orba e Moisesea ta phenda leke:

² O purvo llive katar o purvo chon morabi te chere te vazden o santuario, e chara kai maladon e Devlea,

³ ta ka thove ando santuario e arka katar e alava, ta ka ucharela e chitea.

⁴ Ta thov andre o stali ta o kandelabro, ta lachar sukar o stali ta thov pe lete o kandelabro ta ka phabare leke lampare.

⁵ Ta thov o altar sunakuno e taimanoke angla e a arka katar e alava, ta umblav e kortina katar delpe ando santuario.

⁶ Mapalal thov o altar katar o kurbano katar delpe ande chara kai chidiniaon.

⁷ Mapalal thov o lelleno maskar e chara kai chidiniaon ta o altar ta pher le pai.

⁸ Mapalal phande e bar truial ta umblav e kortina katar delpe ando santuario.

⁹ Mapalal le o zeitino katar so si dino ta chor le po santuario ta pe sa so si ande lete. Gia ka santifiki le sa pe ezgodenchar, ta gia ka avel santo.

¹⁰ Ta thov zeitino katar so si dino po altar katar o kurbano ta pe sa leke ezgode. Gia ka santifiki o altar, ta gia ka avel iek altar santisimo.

¹¹ Ta i thov zeitino po lelleno ta pe rig kai thodol, ta gia ka santifiki le.

¹² Mapalal inllar e Aarone ta leke chaurren pasa o udar katar e chara kai chidiniaon, ta ka jalave len paiea.

¹³ Ta ka chere o Aaron te thovel pe pe e patave sante. Mapalal ka thove pe lete o zeitino, ta ka santifiki le te sai avel mo popo.

¹⁴ Mapalal ka chere te aven pase leke chaurre, ta ka thove pe lende e fistanura,

¹⁵ ta thov zeitino pe lende gia sar cherdan le e Aaronoia te sai aven me popura. Gale zeitinoia kai ka thove pe lende, von ka aven popura ostade sa e bursenchar.

¹⁶ Ta o Moises cherda sa sar o Del phendaia leke te cherel.

¹⁷ Gia ando llive purvo katar o purvo chon, ando duito burs, o santuario vazdinailo.

¹⁸ O Moises cherda te vazden o santuario, ta thoda leke riga te thodol, ta thoda leke table, ta thoda leke kasta, ta vazdia leke pulsura.

¹⁹ Vazdia e chara upral katar o santuario ta thoda upral ogoia chara, gia sar o Del phendaia te cherel o Moiseseke.

²⁰ Mapalal lia e table katar o zakono ta thoda len ande arka katar e alava, mapalal thoda e pulsura e altareke ta thoda upral o propisiatorio upral katar e arka.

²¹ Mapalal thoda e arka ando santuario, ta thoda e kortina buliardi, ta ucharda e arka katar e alava, gia sar o Del phendaia e Moiseseke te cherel.

²² Mapalal thoda o stali andre ande chara kai chidiniaon, pe rig katar o norte katar o santuario avri katar e kortina.

²³ Upral po stali lacharda o marrne angla o Del, gia sar o Del phendaia leke te cherel.

²⁴ Ta i thoda o kandelero andre ande chara kai chidiniaon, angla o stali, pe rig katar o sur katar o santuario,

²⁵ ta phabarda e lampare angla o Del, gia sar o Del phendaia e Moiseseke te cherel.

²⁶ O altar sunakuno thoda le andre katar e chara kai chidiniaon, angla e kortina,

²⁷ ta phabarda o taimano kai khandel sukar, gia sar o Del phendaia e Moiseseke te cherel.

²⁸ Mapalal o Moises umblada e kortina katar delpe ando santuario.

²⁹ Mapalal thoda o altar kai phabardol o kurbano kotar katar delpe ande e chara kai chidiniaon, ta phabarda upral pe lete o kurbano ta so si dino, gia sar o Del phendaia e Moiseseke te cherel.

³⁰ O lelleno thoda le maskar e chara kai chidiniaon ta o altar, ta pherda le pai te jalavenpe.

³¹ Ta kotar ikanena pai o Moises ta o Aaron ta leke chaurre te jalaven pe va ta pe porrne.

³² Kana dena ande chara kai chidiniaon ta kana avena pasa o altar, jalavenape gia sar o del phendaia e Moiseseke te cheren.

³³ Ta gotovisarda kana cherda e bar truial katar o santuario ta katar o altar, ta thoda e kortina kotar katar delpe kai e bar. Gia o Moises gotovisarda o rado.

O oblako upral pe chara kai chidiniaon

³⁴ Ondaka iek oblako ucharda e chara kai chidiniaon ta o baripe e Devleko pherda o santuario.

³⁵ Ta o Moises nasti dela ande chara kai chidiniaon soke o oblako achiloia upral pe chara, ta o baripe e Devleko pherela o santuario.

³⁶ Ta kana o oblako vazdiniaola upre katar o santuario, e israelitura peravena pe chare te laden.

³⁷ A te na vazdiniaola upre o oblako, von ni ladena, lligo ni avela o llive kai o oblako vazdiniaola.

³⁸ Soke o oblako e Devleko saia ollivesea po santuario ta orachaia saia iek iag upral pe lete angla e akha katar sa israelitura kaigo ladena.