Eksodo 38 - Biblia ande chib Romani

Cherdol o altar tuchno

¹ Katar o kas kai ikhardol akasia, cherda o Bezalel o altar katar o kurbano. Saia le star riga, ta saia le dui pole ta bis ta panch sentimetrura pe suako rig, ta iek pola ta bis ta panch sentimetrura vazdine upre.

² Pe leke star riga cherda star singa kai sea cherde katar iek kotor, ta ucharda len ando tuch.

³ Ta i cherda katar o tuch sa e ezgode katar o altar, e seniserura, e pale, e tasura, e beliuske ta e kavie,

⁴ ta iek rejilla tuchni kai thodala truial katar o altar llik kai o dopas katar o altar.

⁵ Ta i cherda star alkave e stare rigenge katar e rejilla tucheni te sai nakhaven lendar e pulsura.

⁶ Mapalal cherda e kasta katar o kas kai ikhardol akasia, ta ucharda len ando tuch.

⁷ Ta nakhada len katar e alkave kai sea pe leke riga te sai inllardol. O altar cherda le te na avel le niso andral, ta cherda le kastuno.

Cherdol o lelleno tuchno

⁸ Ta e gelda lenchar e diskinienge kai pomozina po o udar katar o santuario, o Bezalel cherda o lelleno tuchno ta e rig kai thodol cherda la katar tuch.

Cherdol e bar katar o santuario

⁹ O Bezalel cherda e bar pe rig katar o sur, e bar saia la saranda ta panch pole kortine katar o lino bangardo.

¹⁰ Leke bis pulsura ta leke bis riga kai thodol sea tuchne, ta leke ganchura ta alkave sea rupune.

¹¹ Pe rig katar o norte sea kortine kai saia len saranda ta panch pole, pe bise pulsonenchar ta pe bise rigenchar tuche ta leke ganchura ta alkave rupune.

¹² Pe rig kai perel o kham sea bis ta dui pole ta dopas kortine, ta des pulsura ta des riga kai thodon. E ganchura ta e pulsura ta leke alkave sea rupune.

¹³ Pe rig kai likhel o kham sea bis ta dui pole ta dopas kortine.

¹⁴ Pe rig katar den sea efta pole kortine, trine pulsonenchar ta trin riga kai thodon.

¹⁵ Ta katar ogoia rig, pe iek ta pe ogoia rig katar o udar katar del pe kai e bar katar o santuario, sea efta pole kortine, trin pulsura ta trin riga kai te thodon.

¹⁶ Sa e kortine kai sea truial katar e bar, sea katar o lino bangardo.

¹⁷ E riga kai thodon e pulsura sea tuchne. E ganchura e pulsonenge ta e alkave sea rupune, ta e riga upre katar e pulsura sea ucharde ando rup. Sa e pulsura katar e bar sea len alkave rupune.

¹⁸ E kortina katar del pe ande bar saia suvdi but sukar. Saia vuneti, purpura loli ta lino bangardo. Saia la inia pole lungimatar ta dui pole ta bis ta panch sentimetrura vazdini upre, isto gia sar e kortine katar e bar.

¹⁹ Lake pulsura sea star, pe stare rigenchar tuchne. Leke ganchura ta leke alkave sea rupune, ta e riga upre katar e pulsura sea ucharde ando rup.

²⁰ Sa e chile katar o santuario ta katar e bar kai saia truial, sea tuchne.

Save ezgodenchar cherde o santuario

²¹ O Moises phenda so te cheren, ta o Itamar, o chaurro katar o popo Aaron, lia gava rado, te thovenpe e livitura te llinen save sastrura thode kana cherde o santuario katar e alava.

²² O Bezalel, chaurro katar o Uri, o unuko katar o Jur, katar e vicha e judaeki, cherda sa so phendaia o Del e Moiseseke te cherdol.

²³ Ta pomozisarda le o Aoliab, chaurro katar o Ajisamak katar e vicha katar o Dan, kai radila o sastri kai khuvela ta llanela te suvel but sukar o chiti vuneto, lolo ta lino lacho.

²⁴ Sa o sunakai kai radisarde lea te cheren o santuario, saia dino e Devleke, ta saia inia stotine ta sovardes ta panch kile ta tranda gramura gia sar phariavena ando santuario.

²⁵ O rup kai chidinailo po llindipe e foroko saia trin milie ta trin stotine ta desupanch kile ta panch stotine ta bis ta panch gramura, gia sar phaviena ando santuario.

²⁶ Sa e llene kai sea llinde kai sea lenge mai but katar e bis burs, sea sov stotine ta trin milie ta panch stotine ta pinda llene. Suako lendar dia panch gramura ta dopas rup, gia sar phariavena ando santuario.

²⁷ Ta i die trin milie ta trin stotine kile rup te sai biladon te sai cherdon e riga kai te thodol o santuario, ta e riga kai te thodon e kortine. Katar gua rup cherde kai te thodol o santuario ta e kortine, tranda ta trin kile rup pe suako rig.

²⁸ A o rup kai chidinailo maskar o foro, o Bezalel cherda lea e ganchura katar e pulsura, ta lea uchar e riga upre katar e pulsura ta cherda leke alkave.

²⁹ O tuch kai die e Devle saia dui milie ta trin stotine ta tranda ta sov kile ta star stotine gramura,

³⁰ ta gole tuchea cherdila e rig kai thodol o udar katar e chara kai chidiniaon, o altar tuchno ta leki rejilla tuchni, ta sa ezgode katar o altar,

³¹ ta i e riga kai thodon, e chile katar e bar kai si truial katar o santuario, ta e rig te thodol o udar katar e bar.