Eksodo 36 - Biblia ande chib Romani

¹ Goleke, o Bezalel ta o Aoliab, ta sa e llene kai llanena te radin sukar, ta kai o Del dia len bizaipe te acharen te cheren sukar sa so si ande chara e Devleki, von ka cheren so o Del phenda te cheren.

E llene anen lache ofrende

² O Moises ikharda e Bezaleele ta e Aoliabe ta sa e llenen kai o Del pherdaia lengo lio bizaipe, ta lendar likista te aven te radin.

³ Ta von lie katar e va e Moiseseke e ofrenda kai e israelitura andea, te sai thovenpe po rado katar e chara e Devleki. Ta e israelitura anena e lietar suako llive thiarinako rano e ofrende.

⁴ Pe gachin anena kai e llene kai radina ande chara e Devleki, achile katar po rado

⁵ ta llele te phenen e Moiseseke: E llene anen mai but neko so trubul e radoke kai o Del phenda te cheren.

⁶ Ondaka o Moises cherda te asundol ande sa o pero te na anel ni iek murus ni diskinia ios ofrende te den e charakake. Gia achade e foro te na den ios ofrende,

⁷ soke saia len pe gachin ezgode te radin, kai i achela len.

Cheren e chara e Devleki

⁸ Katar e llene kai radina mai sukar, gola si kai cherde e chara. Von cherde e chara e Devleki dese kortinenchar katar o lino bangardo, vuneto, purpura ta lolo, ta suvde pe lende kerubinura but sukar.

⁹ Suako kortina saia la desudui pole ta dopas lungimatar, ta dui pole bulimatar. Sa e kortine saia len isto gola pole.

¹⁰ E panch kortine suvde len iek averiaia, isto gia cherde ogole panlle kortinenchar.

¹¹ Mapalal thode nesave alkave solenchar vunete truial katar e purve kortine, ta isto gia cherde truial katar e mai paluni kortina katar o duito kortine.

¹² Katar e purve kortine ta katar o duito kortine, cherde lenge pinda alkave, gia achile e alkave iek angla aver.

¹³ Ta i cherde pinda ganchura sunakune te sai istardon e kortine iek averiaa, ta gia e chara e Devleki cherdili.

¹⁴ O Bezalel cherda desuiek kortine katar e bal e busnienge, te cherel iek chara te ucharel o santuario.

¹⁵ Suako kortina saia la desutrin pole ta dopas lungimatar, ta dui pole bulimatar. Sa e kortine saia len isto gola pole.

¹⁶ Ta suvda panch kortine iek averiaia, pe iek rig, a ogola sov kortine suvda len iek pe iek pe ogoia rig.

¹⁷ Mapalal cherda pinda alkave truial e kortina kai phandena e purve kortine, ta cherda aver pinda alkave truial katar ogola kortine.

¹⁸ Ta i cherda pinda ganchura tuchne te sai phandel sa e chara.

¹⁹ Te sai ucharel e chara, o Bezalel cherda aver chara katar e morcha e bakrenge makhle ando lolo. Ta upral pe late cherda aver katar e morcha katar e tejonura ta thodala upral.

²⁰ Mapalal cherda e table katar o kas kai ikhardol akasia e charake, ta thoda len but orta.

²¹ Suako tabla saia la star pole ta dopas lungimatar, ta sovardes ta panch sentrimetrura bulimatar.

²² Ta saia la dui kafrina kastune te sai achel phangli avere tablaia. Sa e table katar o santuario cherda len gia.

²³ Cherda bis table pe rig katar o sur,

²⁴ ta cherda saranda riga tuchne te sai thodon telal katar e table. Suako tabla saia la dui riga telal te thodon lake dui kafra kastune.

²⁵ Ta pe ogoia rig katar o santuario, pe rig katar o norte, cherda aver bis table,

²⁶ pe saranda rigenchar tuchne, gia te avel telal katar suako tabla dui riga kai de thodol.

²⁷ Pe rig katar o santuario katar perel o kham cherda sov table,

²⁸ ta dui table ios pe dui riga palal katar o santuario.

²⁹ Gala table sea sargo iek, ta sea phangle upral llik kai e purvi alkava. Gava si so cherda e duie tablenchar pe dui riga katar o santuario,

³⁰ goleke sea ojto table pe desusov riga rupune. Telal katar suako tabla sea dui riga te thodon.

³¹ Ta o Bezalel cherda panch pulsura cherde katar o kas kai ikhardol akasia e tablenge katar iek rig katar o santuario,

³² panch pulsura e tablenge katar ogoia rig katar o santuario ta aver panch pulsura e tablenge kai si palal katar o santuario, karing perel o kham.

³³ Ta cherda o pulso kai si po maskaral te nakhel po maskaral katar e table katar iek rig pe ogoia rig.

³⁴ Mapalal ucharda e table ando sunakai, ta cherda lenge alkave sunakune te sai nakhavel andral e pulsura kai si ucharde ando sunakai.

³⁵ Ta i cherda e kortina katar o chiti vuneto, chiti purpura, chiti lolo ta lino bangardo, ta pe lende suvda dui kerubinura but sukar.

³⁶ Mapalal, iekhe ganchonenchar sunakune, unblada len pe iek pulsura katar o kas kai ikhardo akasia, kai sea ucharde ando sunakai ta thode pe star riga rupune.

³⁷ Ta o udar katar e chara cherda le iekhe kortinaia katar o chiti vuneto, chiti lolo ta lino bangardo, cherdo but sukar.

³⁸ Ta i cherda panch pulsura pe ganchonenchar, ta pe panch riga tuchne kai thodon, ucharda e riga upre katar e pulsura ando sunakai ta i leke alkave.