Eksodo 35 - Biblia ande chib Romani

O zakono katar o sabado

¹ O Moises chidia sa e israelen ta phenda lenge: O Del phenda mange so te cheren:

² Sai ka radilpe sov llive, a o eftato llive ka avel tumenge iek llive santo, te na radin ando liubao e Devleko. Vareko ande gua llive te radila ka avel chinado leke te merel.

³ Kaigo te zivina tumen ni ka phabare iag ando sabado.

So si dino e Devleke charake

⁴ O Moises dia orba sa e israelenge ta phenda lenge: Gava si so phenda o Del te cheren:

⁵ Chiden maskar tumende iek ofrenda e Devleke. Sa gola kai mangen te den iek ofrenda e Devle, te na cheren le pe zor te cheren le elietar. Morabi te anen sunakai, rup, tuch,

⁶ chiti vuneto, purpura, lolo, lino lacho, bal busnenge,

⁷ morcha katar o bakro makhle ando lolo, morcha katar e tejonura, kasta katar e akasia,

⁸ zeitino te kletosaren, meriso e zeitinoke katar so si dino, ta e taimanoke kai khandel sukar,

⁹ barra kai ikhardon onise ta aver barra lache te sai thodon po efod ta po pektoral katar o mai baro popo.

E ezgode katar e chara e Devleki

¹⁰ Sa gola kai si bizai kai cheren radura sukar morabi te aven ta te cheren sa so o Del phenda te cheren:

¹¹ E chara e Devleki pe charaia kai ucharel la, lake ganchura, lake table, lake alkave, lake pulsura lake riga kai thodon,

¹² e arka ta lake pulsura, o propisiatorio, e kortina e charaki,

¹³ o stali ta lake pulsura ta sa lake ezgode, ta o marrno kai si dino e Devleke.

¹⁴ O kandelero te kletosarel, leke ezgodenchar ta leke lampare, o zeitino lamparengo,

¹⁵ o altar katar o taimano, ta leke pulsura, o zeitino kai thodol pe so si dino, o taimano kai khandel sukar, e kortina katar o udar e charaki,

¹⁶ o altar kai den e kurbanura ta e rejilla tuchni, leke pulsura ta sa leke ezgode, o lelleno ta e rig kai thodol,

¹⁷ e kortine kai llan pe bar pe pulsonenchar ta e riga kai thodon e kortine kai delpe ande bar,

¹⁸ e chile e charake, e chile katar e bar ta leke sole,

¹⁹ e patave kai radilpe lenchar ande chara e Devleki, e patave sante katar o popo e Aaron, ta e patave leke chaurrenge te radin sargo popura.

O foro anel e ofrenda

²⁰ Ta avile sa e israelitura kai o Moises.

²¹ Ta mapalal sa gola kai likista katar lengo lio ta chachimaia, irisaile ta ande iek ofrenda e Devleke te sai cherdol e chara e Devleki te chidiniaon, ta so trubula te cherdon e patave sante.

²² Avile murusa ta i diskinie, ta sa von anena e lietar, lanchura, angrusta, sklave ta but ezgode sunakune. Ta suako lleno anda iek ofrenda sunakuni kai dia e Devleke.

²³ Sa gola kai saia len chiti vuneto, chiti lolo, lino lacho, bal katar e busnia, o morcha katar e busne makhle ando lolo, o morcha katar e tejonura, anenalen.

²⁴ Gola kai dena iek ofrenda rupuni o tuchni, anenalen angla o Del. A ko saia len kasta kai ikhardon akasia, anenalen te cheren sa so trubula.

²⁵ Sa e diskinie kai sea bizai kai cheren ezgode sukar, kai khuven pe vastenchar, anena chiti vuneto kai cherena khuvdo, chiti lolo ta lino lacho.

²⁶ Ta sa e diskinie bizai kai cherena radura sukar kai likista katar lengo lio, khuvde e bal katar e busnia.

²⁷ E birovuria katar o Israel ande barra kai ikhardon kornalina, ta aver barra lache te sai thovenlen po efod ta po pektoral katar o baro popo.

²⁸ Ta i ande merisura, zeitino te kletosarel, o zeitino katar so si dino ta o zeitino e taimanoke kai khandel sukar.

²⁹ Sa e murusa ta sa e diskinie katar o Israel kai avila lenge te pomozin te sai cherdol so o Del phendaia e Moiseseke te cherel, ande pi ofrenda kai likista katar lengo lio te den e Devle.

E llene ezvirime te cheren e chara e Devleki

³⁰ O Moises phenda e israelenge: Dikhen, katar e vicha e judaeki o Del ezvirisarda e Bezaleele kai si o chaurro katar o Uri ta unuko katar o Ur,

³¹ ta pherda le katar o duo e Devleko ta bizaipe, te acharel ta te llanel te cherel ezgode but sukar,

³² te cherel ezgode sunakune, rupune ta tuchne,

³³ te radil barra lache jaliarde ta rado sukar e kastenchar.

³⁴ Ta le, ta e Aoliabe chaurro katar o Ajisamak, kai si katar e vicha katar o Dan, dia len o bizaipe te sikaven,

³⁵ Ta pherdan len bizaipe te cheren varesavo rado sukar, te cheren ezgode neve kai nikada aver llene ni cherdea, te suven chiti vuneto purpura, lolo, ta lino lolo, ta te khuven varesavo rado sukar.