Eksodo 32 - Biblia ande chib Romani

¹ 35 Kana dikhle kai o Moises ni fulisto oma katar o burdo, chidinaile truial katar o Aaron ta phende leke: Lla, ta cher amenge dela te llan angla amende, soke ni llana so avilape katar gua o Moises kai ikanda amen katar o Ejipto.

² A o Aaron phenda lenge: Ikanen katar tumare diskinie, katar tumare chaurre ta katar tumare chorra, e chea sunakune, ta anenlen mange kate.

³ Ondaka saurre ikande pe chea sunakune katar pe kan, ta inllardelen kai o Aaron.

⁴ Ta vou lia len, ta bilada o sunakai, ta iekhe cheskaia radisarda le lligo ni cherda te dikhol sargo iek telcho. Ondaka saurre phende: ¡Israel gala si che dela kai ikande tut katar o Ejipto!

⁵ Kana o Aaron dikhla gava, cherda iek altar angla o telcho, ta mapalal urkisarda: ¡Thiara ka chera slava e Devleke!

⁶ Thiarinako rano ustile ta die kurbanura ta so si dino katar e pas. Mapalal o foro beslo te jal ta te piel, ta mapalal ustile te chelen.

⁷ Ondaka o Del phenda e Moiseseke: Lla, ta fulie, soke cho foro, kai ikandan katar o Ejipto, murisailo.

⁸ But oma durile katar o drom kai me phendem lenge te llan. Cherde peke iek telcho katar o sunakai biladino, ta blagosin le ta den le kurbanura, ta phenen: ¡Israel, gala si che dela kai ikande tut katar o Ejipto!

⁹ Ta i phenda o Del e Moiseseke: Dikhlem gale llenen ta chachimaia si llene zurale soreke.

¹⁰ ¡Akana muk te phabol mi joli ande lende ta te zatriv len, ta tutar ka cherav iek bari phuv!

¹¹ Ondaka o Moises thoda te molilpe angla o Del leko gazda, gale alavenchar: Ioi Devla, ¿soke ka phabol chi joli pe cho foro, kai tu ikandan katar o Ejipto bare zoriaia, ta che zurale vastea?

¹² ¿Sar ka muke te phenen e ejipsiura: O Del ikanda len te mundarel len pe burdura, ta te ikanel len katar e phuv? Muk te phagol chi joli ta muk o mislo bilacho te zatri che foro.

¹³ De tut golli katar che sluge o Abraam o Isaak ta katar o Israel, kai lenge jalan sovel isto pe tute, ta phendan lenge: Ka cherav tumaro porodo te avel gia baro sargo e cheraia ando miloso, ta ka dav sa tumare porodo sa gaia phuv kai diem tumenge orba, ta ka lenla tumenge ostade.

¹⁴ Ondaka o Del keisailo te cherel goia zatrania pe foroke.

¹⁵ Ondaka o Moises fulisto katar o burdo, ta anela ande pe va e dui table katar o zakono, kai von sea pisime katar e dui riga.

¹⁶ Isto o Del cherdaia e table, ta isto o Del pisisarda so saia pisime pe lende.

¹⁷ Kana o Josue asunda o urkipe katar o foro, phenda e Moiseseke: Asundol urkipe marimako ando pero.

¹⁸ A o Moises phenda: Inai llilia vesele katar e llene kai dobin, ta inai llilia katar e llene kai jasarde. Gala si aver llilia kai asunav.

¹⁹ Ta kana o Moises avilo pasa o pero ta dikhla o telcho ta o chelipe, chirilo jolinatar ta chudia katar pe va e table, ta phaglalen pasa o burdo,

²⁰ ta lia o telcho ta chudiale ande iag, ta mapalal drobosarda le lligo ni cherda le prajo ta o prajo chudiale ando pai, ondaka cherda e israelen te pien katar gua pai.

²¹ Ondaka phenda o Moises e Aaronoke: ¿So cherda chuke gava foro kai cherdan len te cheren pe kabor bilachipe?

²² A o Aaron phenda: Mo gazda, na joliao manchar. Tu llane kai gava foro drago leke te cherel o bilachipe.

²³ Von phende mange: Cher amenge dela te llan angla amende, soke ni llana so avilape katar gava o Moises kai ikanda amen katar e phuv katar o Ejipto.

²⁴ Me phendem lenge: Ko si le sunakai te thovel le pe iek rig. Ta von die man o sunakai, ta me chudiem le ande iag, ¡ta likisto gava telcho!

²⁵ Kana o Moises dikhla kai o foro saia sargo dilo ta thoda te marel espurnia letar, soke o Aaron ni llangla sar te achavel len,

²⁶ lia o Moises ta thodape po udar katar o pero ta phenda: Ko si e Devlea, te chidiniaon manchar. Ta sa e levitura chidinaile lea.

²⁷ Ondaka o Moises phenda lenge: Gia phenda o Del, o Gazda e israelengo: Te lel suako lleno tumendar o jarni, ta te irilpe kai o pero, ta llan udar po udar, ta suako lleno tumendar te mundarel pe phlale, pe amale o e llene kai zivil pasa le.

²⁸ E levitura cherde so phenda lenge o Moises, ta gua llive mule preko trin milie murusa.

²⁹ Ondaka o Moises phenda: Allive tumen len sa o gazdaripe angla o Del, soke nesave ni terpisarde pe chaurre ta aver ni pe phlale, goleke allive o Del blagosil tumen.

³⁰ Thiarinako, o Moises phenda e suetoke: Tumen cherden iek bilachipe but baro. Akana morabi te likav po burdo kote kai si o Del, te dikhav o ka lav o prostipe tumenge.

³¹ Ondaka o Moises irisailo kai o Del ta phenda: Chachimaia gava foro cherda iek baro bilachipe, soke cherde peke dela sunakune.

³² Me molivman chuke prostisar len, a te na prostia len ¡ikan mo anav katar o lil kai pisisardan!

³³ A o Del phenda leke: Ka ikanav katar mo lil samo gole kai cherela o bilachipe mange.

³⁴ Goleke lla tu akana, ta inllar gale foro kote kai phendem chuke. Mo suecho ka inllarel tut. Ta kana ka avel o llive te dukhavav len, me ka dukhavav len pala lengo bilachipe kai cherde.

³⁵ Ta o Del bichalda iek bari muka po foro soke blagosisarde iek telcho kai o Aaron cherdaia lenge.