Eksodo 31 - Biblia ande chib Romani

E llene kai radin te cheren e chara e Devleki

¹ O Del dia orba e Moisesea ta phenda leke:

² Dik, katar e vicha e Judaeki ezvirisardem e Bezaleele chaurro katar o Uri, unuko katar o Ur,

³ ta pherdem le katar o duo e Devleko, ta bizaipe, te acharel suako ezgoda ta te sikol te cherel suako ezgoda,

⁴ ta te cherel but sukar ezgode katar o sunakai, ta katar o rup ta katar o tuch,

⁵ ta te radil e barra, e kasta, ta te sai cherel suako rado sukar.

⁶ Ta thodem lea te pomozil le e Aoliabe, chaurro katar o Ajiisamak, katar e vicha katar o Dan. Ta sa e bizaien diem len ios bizaipe, te sai cheren sa so phendem chuke te chere:

⁷ e chara kai ka chidiniaon, e arka katar e alava, o propisiatorio kai llal upral pe arka, ta sa e ezgode e charake,

⁸ o stali ta leke ezgode, o kandelabro kai si desneto sunakuno pe ezgodenchar, o altar katar o taimano,

⁹ o altar kai delpe o kurbanoko phabardo pe ezgodenchar, o lelleno ta leko than kai thodol,

¹⁰ e patave kai radin lenchar, e patave sante e Aaronoke o popo, e patave leke chaurrenge te sai cheren po rado popoko,

¹¹ o zeitino kai thodol pe so si te avel dino, ta o taimano kai khandel sukar kai si ande chara e Devleki, von morabi te cheren le gia sar phendem chuke te cherele.

O sabado

¹² O Del dia orba e Moisesea ta phenda leke:

¹³ De isto tu orba e israelenchar ta phen lenge gia: Chachimaia tumen ka guruven me sabadura, soke goia si e señal maskar tumende ta me sa e bursenchar, te sai llanglolpe kai me o Del, ezvirisardem tumen.

¹⁴ Goleke ka guruve o llive sabado, soke si santo tumenge. Ko ni dela liubao gole llivese ka chinen leke te merel. Ta o lleno kai radila gua llive ka traden le tumendar.

¹⁵ Sai ka radilpe sov llive, a o llive eftato ka avel iek llive kai ni ka radilpe. Ka avel dino e Devleke, kogo radila ando sabado, ka avel leke chinado te merel.

¹⁶ Goleke e israelitura ni ka radin o sabado, sargo kana achile pe alava ostade sa e bursenchar.

¹⁷ Ka avel iek señal ostade maskar e israelitura ta me. Soke o Del cherda o miloso ta e phuv ande sov llive, ta o eftato llive ni radisarda ios.

O telcho sunakuno

¹⁸ Kana o Del achilo te del orba e Moisesea po burdo Sinai, dia lete dui table barrastune katar e orba e chachi kai o del pisisarda pe naiea.