Eksodo 30 - Biblia ande chib Romani

O altar e taimanoko

¹ Ta i cher iek altar cherdo katar o kas kai ikhardol akasia, te sai phabare o taimano.

² Morabi te aven le star riga, te avel le saranda ta panch sentrimetrura lungimatar, ta saranda ta panch sentrimetrura bulimatar, ta iniarvardes sentrimetrura vazdino upre, e singa ta o altar morabi te cherdon katar iek kotor.

³ Ta ka ucharele ando sunakai lacho so si upral, ta so si truial ta leke singa, ta thov iek fisia sunakuni truial letar.

⁴ Ta thov leke nesave alkave sunakune telal katar e fisia, dui pe iek rig ta dui pe ogoia rig, te sai nakhaven lendar e pulsura te sai avel inllardo.

⁵ Cher e pulsura katar o kas kai ikhardo akasia, ta uchar len ando sunakai.

⁶ Mapalal thov o altar angla e kortina kai si pasa e arka katar e alava, angla o propiasiotorio kai ucharel le. Kote kai me ka maladivav tuia.

⁷ Suako drom thiarinako rano, kana lachardon e lampare, o Aaron ka phabarel taimano upral katar gava altar,

⁸ ta i ka phabarel le kana ka perel e riat ando saiato kai phabardon e lampare. Gava ka cherdol angla o Del ostade sa e bursenchar.

⁹ Na de upral katar gava altar ni iek aver taimano, ni kurbano ni so si dino katar e simiche, ni so si dino katar e mol kai chordol.

¹⁰ Gava altar ka avel santifikado e Devleke, ta iek drom ando burs o Aaron ka del upral katar e singa katar o altar o rat katar o kurbano te sai aven prostime katar o bilachipe. Gava ka cherdol suako burs.

E love kai denpe pala o zivoto

¹¹ O Del dia orba e Moisesea ta phenda leke:

¹² Kana ka lline e israelen, suako lleno lendar morabi te del vareso e Devle te sai braduil po zivoto, gia te na avelpe ni iek muka te mundarel len kana ka aven llinde.

¹³ Sa e llene kai ka llindon morabi te den e Devle panch gramura rup, gia sar pharivena ande chara e Devleki.

¹⁴ Sa e llene kai ka llindon bise bursenge upre ka den gaia ofrenda e Devle,

¹⁵ ta kana ka del suako lleno e Devle te braduil po zivoto, ni o barvalo ni ka del mai but neko panch gramura rup, ni o chorro ni ka del mai cherricha neko panch.

¹⁶ Gia ka chide o rup katar e israelitura kai ka den te sai braduin po zivoto, ta ka de so chidian e charake kai chidiniaon. Gava ka cherel o Del te delpe golli katar e israelitura ta kai die te braduin po zivoto.

O lelleno tuchno

¹⁷ O Del dia orba e Moisesea ta phenda leke:

¹⁸ Cher iek lelleno katar o tuch, ta o than kote kai ka thodol te avel cherdo i katar o tuch, te sai jalavenpe, thov le maskar e chara kai chidiniaon ta o altar, ta pherle pai.

¹⁹ O Aaron ta leke chaurre ka ikanen pai kotar te jalaven pe va ta pe porrne.

²⁰ Ta ka jalavenpe kana ka den ande chara kai chidiniaon, ta kana ka aven kai o altar te radin ta kana ka anen so si dino phabardo e Devleke, gia von ni ka meren.

²¹ Ta te na meren morabi te jalaven pe va ta pe porrne. Gava ka avel iek zakono ostade sa e bursenchar e Aaronoke ta leke porodoke.

O zeitino kai thodol pe so si dino

²² O Del dia orba e Moisesea ta phenda leke:

²³ Esvirisar isto tu e mai sukar patra kai khanden sukar: Iek sov kile katar e mai sukar mirra, ta iek trin kile katar o karanfili, ta iek trin kile katar ek kastorro kai khandel sukar.

²⁴ Ta iek sov kile katar e akasia phariarde prema sai phariadol ande chara e Devleki, ta iek trin litrura ta dopas zeitino maslinkako.

²⁵ Cher sa gale ezgodenchar o zeitinoia santo katar so si dino, isto gia sar o lleno lacharel o meriso. Gava ka avel o zeitino santo katar so si dino,

²⁶ ta morabi te churdol upral pe chara kai chidiniaon, po altar katar e alava,

²⁷ po stali sa pe ezgodenchar, po kandelabro sa pe ezgodenchar, po altar katar o taimano,

²⁸ po altar katar e kurbanura sa pe ezgodenchar, po lelleno ta i po than kai thodol.

²⁹ Gia ka aven dine ta gia ka aven but sante, vareso te dodila len ka achel santo.

³⁰ Chor i katar gava zeitino po Aaron ta pe leke chaurre, te sai aven dine mange popura.

³¹ Ta phen gala alava e israe: Sa e bursenchar gava ka avel mo zeitino santo katar so si dino.

³² Na chorle pe varesavo lleno, ta na lacharen aver zeitino sargo gava. Vou si iek zeitino santo, ta gia morabi te dikhen le.

³³ A vareko te lacharela iek zeitino sargo gava ta te chorelale pe varesavo lleno kai inai pinllardo, gole llene ka traden le tumendar.

O taimano

³⁴ O Del phenda e Moiseseke: Le katar gala ezgode kai ka phenav chuke resina, uña kai khandel, taimano lacho ta galbano kai khandel sukar.

³⁵ Ta lachar lenchar iek taimano lacho ta santo, amime sukar, sargo eik lleno kai cherel o meriso.

³⁶ Ta ka drobole lligo ni ka cherele prajo, ta thov le angla e arka katar e alava, ande chara kai chidiniaon, kote kai me ka maladivav tuia. Gava taimano ka avel santo tumenge,

³⁷ ta ni ka cheren aver taimano sargo gava tumenge, soke si e Devleko, ta chuke ka avel iek ezgoda santa.

³⁸ Ko cherela iek taimano sargo gava peke te khanden le, ka avel tradino tumendar.