Eksodo 3 - Biblia ande chib Romani

O Del ikharel e Moisese

¹ O Moises arakhela e bakren katar o Jetro leko sastro kai saia popo katar o Madian. Iek llive inllarda e bakren katar o pusto, ta avilo kai o burdo e Devleko kai ikhardola Joreb.

² Ta kote o suecho e Devleko sikadilo leke po maskaral katar iek fafurruka kai phabola ande iag, a o Moises dikhla kai e fafurruka saia ando plameko, a e fafurruka ni phabola.

³ Ondaka o Moises phenda: ¡Ka llav te dikhav gaia ezgoda chudo, soke ni phabol goia fafurruka!

⁴ Kana o Del dikhla kai o Moises llala te dikhel, ikharda le maskar e fafurruka, ta phenda leke: ¡Moises, Moises! Ondaka o Moises phenda: Kate sem.

⁵ Ondaka o Del phenda leke: Te na ave pase ta ikan che minie, soke po than kai san, phuv santa si.

⁶ Ta i phenda: Me sem o Del che dadeko, o Del e Abraameko, e Isaakeko, ta e Jakobeko. Ondaka o Moises ucharda po mui, soke darailo te dikhel e Devle.

⁷ A o Del pale dia orba lea, ta phenda leke: Dikhlem sar si e duk katar mo foro kai si ando Ejipto, ta asundem lengo kukipe pala so cheren lenchar, ta llanav lengi duk,

⁸ goleke fulistem te braduiv len katar o va e ejipsionengo, ta te ikanav len katar goia phuv, ta te inllarav len kai iek phuv bari ta lachi, kai o thud ta o aullin nakhen sargo o pai. Ande gaia phuv zivin e kananeura, e jititura, e amorreura, e fereseura, e jivitura, ta e jebuseura.

⁹ Ta asundem o kukipe katar e israelitura, ta dikhlem sar e ejipsiura phariaven lengo zivoto.

¹⁰ Goleke aide akana, ta ka bichalav tut kai o Faraon te sai ikane katar o Ejipto me foro e chaurren katar o Israel.

¹¹ Ondaka o Moises phenda e Devleke: ¿A ko sem me te llav kai o Faraon, ta te ikanav katar o Ejipto e chaurren katar o Israel?

¹² A o Del phenda leke: Lla soke me ka llav tuia, ta gale ezgodaia kai ka sikavav chuke ka llane kai me sem kai bichalav tut: Kana ka ikane katar o Ejipto me foro, tumen ka blagosin man pe gava burdo.

¹³ A o Moises phenda e Devleke: Me te llav ta te phenav e israelenge: O Del katar o Abraam, katar o Isaak, ta katar o Jakob, bichalda man te ikanav tumen, von ka puchen man: ¿Sar ikhardol? Ondaka, ¿so ka phenav lenge?

¹⁴ A o Del phenda leke: ME SEM KO SEM. Ta ka phene e israelenge: ME SEM bichalda man tumende.

¹⁵ Ta i phenda o Del e Moiseseke: Phen e israelenge: O Jeova, o Del tumare puranengo e Abraameko, e Isaakeko ta e Jakobeko, bichalda man tumende. Gava si mo anav ostade, gale anavea ka denpe golli mandar sa e bursenchar.

¹⁶ Lla, ta chide sa e phuren katar o Israel ta phen lenge: O Gazda, o Del tumare puranengo, o Del e Abraameko, e Isaakeko ta e Jakobeko, sikadilo mange ta phenda mange kai vou thoda tumenge sama, ta dikhla so cheren tumenchar ando Ejipto.

¹⁷ Ta i phenda mange: Me ka ikanav tumen katar e duk katar o Ejipto, ta ka inllarav tumen kai e phuv katar e kananeura, e jititura, e amorreura, e fereseura, e jivitura ta e jebuseura, e phuv kai o thud ta o aullin nakhen sargo pai.

¹⁸ Me llanav kai e phure ka thoven chuke sama, ondaka tu ka lla lenchar kai o charo katar o Ejipto, ta ka phenen leke: O Gazda, o Del katar e ebreura likisto te maladol amenchar. Goleke, muk amen te lla po pusto, llik kai ka resa ande trin llive, te sai da kurbanura e Gazda amare Devle.

¹⁹ A me llanav kai o charo katar o Ejipto ni ka mukel tumen te llan, a me pe zor ka cherav te mukel tumen.

²⁰ Goleke, me ka sikavav mi zor ta ka rraniu merimaia e ejipsionen, ta pala e bare ezgode kai ka cherav ande lengi phuv, o Faraon ka mukel tumen te llan.

²¹ Ta me ka cherav e ejipsiura te avel lenge zao katar o foro, ta gia kana ka liken te na liken chuche vastenchar.

²² Suako diskinia israelita ka mangel katar e diskinia ejipsia kai zivil pasa la o kai zivil laia, rup, sunakai, patave, ta lenchar tumen ka furiaven tumare chaurren ta tumare chorren, ta gia ni ka muken niso katar so si te len katar ejipsiura.