Eksodo 27 - Biblia ande chib Romani

O altar tuchno

¹ Cher iek altar te avel le star riga katar o kas kai ikhardol akasia, te avel le dui pole ta bis ta panch sentimetrura pe suako rig, ta iek pola ta bis ta panch sentimetrura upre.

² Ta cher leke star singa pe leke star riga te aven iek e altarea uchardo e tuchea.

³ Sa so si katar o altar morabi te avel cherdo katar o tuch, leke seniserura, e pale, e tasura bare, e beliuske ta e brasesrura.

⁴ Cher iek pirostia tuchni dopas vazdine katar o altar, ta cher iek alkava tuchni pe suako rig katar e pirostia.

⁵ Ta thov mapalal e pirostia tele kai o altar, te achel dopas vazdini katar o altar.

⁶ Ta i cher pulsura e altareke ta ucharlen ando tuch.

⁷ E pulsura morabi te nakhen andar e alkave ta morabi te muken len pe riga katar o altar te sai inllardol.

⁸ O altar ka cherele chucho andral ta kastuno, isto gia sar sikadilo chuke po burdo.

E bar katar e chara e Devleki

⁹ Cher iek bar e charake pe rig katar o sur. E bar morabi te avel la kortine cherde katar o lino bangardo, buliardi lungimatar saranda ta panch pole.

¹⁰ Lake bis kasta ta lake bis riga te thodon, ka aven cherde katar o tuch, ta lake ganchura ta leke alkave ka aven cherde katar o rup.

¹¹ Ta isto gia pe rig katar o norte morabi te aven kortine te avel len lungimatar saranda ta panch pole pe bise kastenchar tuchne, ta pe bise rigenchar te thodon tuchne ta lake ganchura ta alkave rupune.

¹² Katar e rig kai likel o kham e kortine ka avel len bis ta dui pole ta dopas buliarde lungimatar katar e bar, dese kastenchar ta des riga te thodon.

¹³ Katar e rig kai likel o kham, katar o bulipe katar e bar, i kote e kortine katar e bar ka avel len bis ta dui pole ta dopas.

¹⁴ Pe iek rig katar delpe ka aven kortine kai ka avel len efta pole trine kastenchar ta trine riga te thodon.

¹⁵ Ta katar ogoia rig, i kote ka aven kortine kai ka avel len efta pole, ta trin kasta ta trin riga kai te thodon.

¹⁶ Ta kotar katar delpe ande bar ka aven kortine katar o chiti vuneto, purpura ta lolo ta lino bangardo kai ka avel len inia pole. Morabi te suven len but sukar, ta stare kastenchar ta star riga kai te thodon.

¹⁷ Sa e kasta kai si truial katar e bar morabi te avel len alkave rupune, ta ganchura rupune ta e rig kai thodon te aven tuchne.

¹⁸ E bar ka avel la saranda ta panch pole lungimatar, ta bis ta dui pole ta dopas bulimatar katar leki dui riga. E kortine ka aven katar o lino bangardo, ta e riga kai thodon tuchne.

¹⁹ Sa e ezgode kai trubul ande chara e Devleki ka aven tuchne, ta leke chile ta i e chile katar e bar ka aven tuchne.

O zeitino e lanparenge

²⁰ Ta phen e israelenge te anen zeitino lacho katar o kas maslinkako, te sai achen phabarde e lampare suako drom.

²¹ O Aaron ta leke chaurre lacharde e lampare te sai phabon angla o Del sorro riat ta i thiarinako rano ande chara e Devleki, avri katar e kortina kai si angla e arka katar e alava. Gava si iek zakono ostade e israelenge ta lenge chaurrenge.