Eksodo 26 - Biblia ande chib Romani

E chara e Devleki

¹ Cher e chara e Devleki dese kortinenchar katar o lino bangardo, chiti vuneto, purpura ta lolo, ta ka suve pe lende dui kerubinura but sukar.

² Sa gala kortine morabi te avel len isto gola pole, desudui pole ta dopas lungimatar ta dui pole bulimatar.

³ Suv panch kortine iek pe iek, ta isto gia ogola,

⁴ ta thov alkave katar o solo vuneto truial katar e purvi kortina katar ogola kortine.

⁵ E purvi katar e kortine ta i e duito katar ogola kortine, morabi te chere lenge pinda alkave, te sai achen iek angla aver.

⁶ Ta i cher pinda ganchura sunakune te sai istardon iek umpa kortine ogole umpaia kortine, te sai e chara avel cherdi katar iek kotor chiti.

⁷ Ta i cher desuiek kortine katar e bal e busniake, te sai ucharen e chara e Devleki.

⁸ Sa gala kortine morabi te avel len isto gola pole, desutrin pole ta dopas lungimatar, ta dui pole bulimatar.

⁹ Ta suv panch kortine iek pe iek katar iek rig, ta aver sov pe aver rig, ta e sovto eftato kortina ka bangarela angla e chara e Devleki.

¹⁰ Mapalal ka chere pinda alkave pe iek rig katar e purve kortine kai phanden, ta aver pinda alkave po duito kortine.

¹¹ Ta cher pinda ganchura katar o tuch ta te phangliol pe alkave, gia te avel iek kotor chiti kai ucharel le sa.

¹² A sar e kortine katar e chara si mai bare, dopas katar so achel ka thovele palal katar e chara e Devleki.

¹³ Gia ka achel uchardi e chara pe dui riga palal e kotorea kai achilo mai baro, saranda ta star sentrimetura pe suako rig palal.

¹⁴ Ta ka chere iek techo te uchare upral e chara, gua techo ka cherele katar e morcha e busnenge makhle ando lolo, uchardo upral katar aver techo cherdo katar e morcha katar o tejon.

¹⁵ Ta ka chere e charake kai si e Devleki iek table katar o kas kai ikhardol akasia te aven orta.

¹⁶ Suako tabla morabi te avel la star pole ta dopas lungimatar, ta sovardes ta panch sentimetrura bulimatar,

¹⁷ ta te aven la dui espige gia te sai e table achen phangle iek pe iek. Cher gia sa e table e charake kai si e Devleki.

¹⁸ Kana ka cherelen, cher bis table pe rig katar o sur,

¹⁹ ta cher saranda riga rupune telal tala e table kai te besen. Suako tabla morabi te avel la dui riga rupune telal, kai te besen lake dui espige.

²⁰ Ta i pe ogoia rig katar e chara e Devleki pe rig katar o norte, ka chere bis table,

²¹ ta i kote ka chere saranda riga rupune telal katar e table kai te besen, ta gia te avel pe suako tabla dui riga rupune.

²² A pe rig palal katar e chara e Devleki, pe rig katar likel o kham, cher sov table,

²³ ta ka chere dui table ios pe dui riga kai si palal katar e chara e Devleki.

²⁴ E dui table kai si pe rig palal ka aven ande iek than phangle kai si e purvi alkava. Sa e table morabi te avel len star pole ta dopas lungimatar, ta sovardes ta panch sentimetrura bulimatar, ta morabi te achen phangle maskar pete katar e dui putardipe pe suako putardipe. Gia morabi te cherdol e duie tablenchar e eskinenge.

²⁵ Ka aven ondaka ojto table ta lenge desusov riga rupune kai te besen, dui riga urupune telal katar suako tabla.

²⁶ Ta ka chere panch pulsura katar o kas kai ikhardol akasia e tablenge kai si pe iek rig katar e chara e Devleki,

²⁷ ta panch pulsura e tablenge kai si ande chara pe rig palal karing perel o kham.

²⁸ Ta o pulso kai si po maskaral ka nakhel po maskaral katar e table, katar iek rig llik kai ogoia rig.

²⁹ Ta mapalal ka uchare e table truial ando sunakai, ta cher lenge alkave sunakune. E pulsura ka aven ucharde ando sunakai te nakhen andar e alkave.

³⁰ Cher e chara e Devleki isto gia sar sikadili chuke po burdo.

³¹ Cher iek kortina katar o chiti vuneto, purpura, lolo, ta lino bangardo. Ka avel cherdo but sukarimaia, ta thov pe late kerubinura.

³² Ta mapalal iekhe ganchonenchar sunakune, umblaven len pe star direkura cherde katar o kas kai ikhardol akasia ucharde ando sunakai. Ta suako kas morabi te avel thodo pe iek rig rupuni.

³³ Unblav ondaka e kortina telal katar e ganchura, ta kote palal katar e kortina, thov e arka katar e alava. Gia e kortina ka blazil tumenge te fulavel o than santo katar o than santisimo.

³⁴ Mapalal ka thove o propisiatorio upral katar e arka katar e alava po than santisimo.

³⁵ Ta ka thove e o stali avri katar e kortina, ta o kandelero angla o stali pe rig sur katar e chara e Devleki. A o stali ka thovele pe rig katar o norte.

³⁶ E chara e Devleki ka chere lake iek udar chiteko vuneto, purpura, loli ta chiti katar o lino lacho.

³⁷ Cher e kortinake star direkura katar o kas kai ikhardol akasia, ta ka uchare len ando sunakai, ta kote kai besen e direkura ka avel cherdo ando sunakai ta panch riga tuchne lenge.