Eksodo 25 - Biblia ande chib Romani

Chiden ofrenda e charake

¹ O Del phenda e Moiseseke:

² Phen e israelenge te chiden mange iek ofrenda maskar sa e llene kai mangena te den iek ofrenda pe lietar.

³ Ta so morabi te chiden si: Sunakai, rup, jarkuma,

⁴ chiti vuneto, chiti purpura, chiti lolo, lino kuch, bal busniake,

⁵ morcha katar o bakro makhle ando lolo, morcha kuch, kasta katar e akasia,

⁶ zeitino e lamparenge, meriso e zeitinoke kai thodol pe so si dino ta e taimanoke kai khandel sukar,

⁷ barra katar e kornalina ta aver barra kuch te sai thodon po efod ta po pektoral katar o mai baro popo.

⁸ Ta cheren mange iek chara te sai me ziviu maskar tumende.

⁹ E chara ta sa so si ande late, morabi te cheren len isto gia sar ka sikavavle chuke.

E arka katar e alava

¹⁰ Cher iek arka katar o kas katar e akasia. Ka avel la iek pola ta des sentimetrura ando lungipe, ta sovardes ta panch sentimetrura ando bulipe, ta sovardes ta panch sentimetrura vazdini.

¹¹ Ta morabi te ucharela sa ando sunakai andral ta i avrial, ta truial ka thove iek fisia sunakuni.

¹² Ta cher lake star alkave sunakune, ka thovelen pe lake star porrne dui pe iek rig ta dui pe ogoia rig.

¹³ Ta cher dui pulsura kastune ta ka uchare len ando sunakai,

¹⁴ ta nakhav len ande alkave te sai inllaren e arka.

¹⁵ Ta e pulsura na ikan len ios. Muklen ande alkave katar e arka,

¹⁶ ta kana ka dav tut e des zakonura, ka thovelen andre ande arka.

¹⁷ Ta ka chere iek propisiatorio katar o sunakai mai kuch. Iek pola ta des sentimetrura lungimatar ta sovardes ta panch sentimetrura bulimatar.

¹⁸ Pe suako rig katar e arka ka thove dui kerubinura radime e chokanoia.

¹⁹ O propisiatorio ta e kerubinura morabi te aven cherde katar iek kotor sunakuno, iek ka avel pe iek rig a o gua pe ogoia rig katar o propisiatorio.

²⁰ E dui kerubinura morabi te aven iek angla aver ta te dikhen po propisiatorio ta pe pakhenchar te ucharenle.

²¹ Ta ka thove o propisiatorio upral pe arka, ta andre ka thove e des zakonura kai ka dav tut.

²² Ta maskar e dui kerubinura ka maladivav tuia ta ka phenav chuke so morabi te cheren e israelitura o so morabi te na cheren.

O stali katar o marrno e Devleko

²³ Cher iek stali katar o kas kai ikhardol akasia, te avel la iniavardes sentimetrura lungimatar, ta saranda ta panch sentrimetrura bulimatar, ta sovardes ta panch sentimetrura vazdini.

²⁴ Uchar la sa ando sunakai lacho, ta thov truial iek fisia sunakuni.

²⁵ Ta i ka thove vazdino pe la efta sentrimetura bulimatar ta iek fisia sunakuni truial.

²⁶ Ta i cher star alkave sunakune, ta thov len truial kai la ke star porrne katar o stali,

²⁷ ta ka thove e pulsura ande lake alkave, ta gia sai ka inllardol o stali.

²⁸ E pulsura ka cherelen katar o kas katar e akasia ta ka ucharelen ando sunakai, lenchar ka inllardol o stali,

²⁹ O stali, e rroia, e bare tasura ta e tasura kai thodol o pipe kai si dino, ka cherelen sunakune.

³⁰ A po stali ka thoven o marrno kai si te den man suako drom.

O kandelero sunakuno

³¹ Ta cher iek kandelero radime e chokanoia cherdo katar iek kotor sunakuno. Kote kai besel lako kas, lake tasura, lake lulunlla, sa ka aven cherde katar iek kotor sunakuno.

³² Ta katar lako kas pe lake dui riga ka liken sov krangura, trin pe iek rig ta trin pe ogoia rig.

³³ Trin tasura sargo lulunlla katar o almendro pe iek krango, iek phabai ta iek lulunllin, ta trin tasura sargo lulunllin katar o almendro pe aver krango, iek phabai iek lulunllin, gia pe sov krangura kai liken katar o kandelabro.

³⁴ Ta katar o kas ka liken star tasura sargo lulunlla katar o almendro, lake phabaia ta lake lulunlla,

³⁵ ka avel iek phabai telal katar lake dui krangura, ta aver phabai telal katar ogola dui krangura, ta gia ka avel pe sa e sov krangura kai liken katar o kandelero.

³⁶ Lake phabaia ta lake krangura ka aven katar iek kotor, sa von cherde katar iek kotor sunakuno radime e chokanoia.

³⁷ Ta ka chere leke efta lamparille ta ka phabare len te kletosarel anglal.

³⁸ Ta leke kliastura ta leke seniserura morabi te aven desneto sunakune.

³⁹ Te sai chere o kandelabro ta sa leke ezgode, morabi te le tranda kile katar o mai lacho sunakai.

⁴⁰ Morabi te thove but sama te cherele gia sar sikadem le chuke po burdo.