Eksodo 23 - Biblia ande chib Romani

E zakonura te cherdol o chachipe

¹ Na de orba kojamne angla e llene, ta na achi pe orba e llenea kai si bilacho te kojave angla e kris.

² Na cher o bilachipe samo soke sa e llene cheren le. Kana si te de orba angla e kris, na de orbe kojamne sar cheren le sa o sueto, tu phen o chachipe.

³ Na kojav te sai pomozi e chorre pe iek kris.

⁴ Te dikhea iek guruv o iek magarcho kai llal jasardo, irile kai leko gazda, i te avela gua lleno cho dusmano.

⁵ A te dikhea kai iek magarcho perela cheres o pharipe kai inllarel, ikan gua pharipe letar, i te avela cho dusmano o gazda katar gua magarcho.

⁶ Te si te chine varesavi kris, te na chine iek kris kojamni e chorrenge.

⁷ Na dosar iekhe llene kojaimaia, ta na chin iekhe lleneke kai si chacho te merel kana gua lleno inai dosalo, soke me ni ka dikhav chacho e llene kai si dosalo.

⁸ Te na le love katar nisavo lleno kai mangela tutar te chere varesavo bilachipe. Gola love cheren e llenen te korraon ta cheren e krisaria te chinen iek kris kojamni e llenenge kai si chache.

⁹ Na dukhav e llene kai si katar aver phuv, soke tumen llanen sar si o zivoto iekhe lleneko kai avel katar aver phuv, soke tumen zivisarden ando Ejipto, iek phuv kai ni saia tumari.

Kana ni ka radi e phuv

¹⁰ Sou burs ka radi e phuv ta ka chide so del e phuv,

¹¹ a o sovto burs ni ka radi e phuv. A te dela e phuv vareso korkorre, gua so dela ka mukenle te sai jan e llene kai si chorre, ta so achela, mukenle te janle e zivirinie dive. Ta isto gia ka cheren le kote kai si tumen drakha ta maslinke.

¹² Sou llive ka radi, a o eftato llive ni ka radi, te sai achel katar po rado i cho guruv, cho magarcho, cho sluga ta i e llene kai aven katar aver phuvia kai radin chuke.

¹³ Kanden sa gala zakonura, ta e anava katar averenge dela te na ni phenen len katar tumaro mui.

E trin slave bare

¹⁴ Cher trin slave ando burs ande mo liubao.

¹⁵ E slava katar o marrno kai inai ande lete levadura. Gia sar me phendem chuke te chere, ka ja marrne kai pe lende inai levadura. Efta llive ka ja gola marrne ando chon katar o Abib, soke ande gua chon likisten katar o Ejipto. Ta niko ni ka avel angla ma chuche vastenchar.

¹⁶ A kana ka avel o vreme te chide so del e phuv, ka chere dui slave. O purvo slava ka avel kana ka chide e purve septelie katar cho vostano, o duito ka avel kana ka chide sa so si tut ande cho vostano kana ka getolpe o burs.

¹⁷ Sa e murus morabi te aven trin droma ando burs angla o Del.

¹⁸ Kana ka de kurbanura, na de isto ande iek than o marrno kai si ande lete levadura ta o rat katar e zivirinia, ta na guruv e khoi thiarinake.

¹⁹ Katar e mai lache purve septelie katar cho vostano ka anelen ando cher che Devleko kai si cho Gazda. Na chirav e busnen ando thud lenge dako.

O suecho e Devleko

²⁰ Dik me ka bichalav me suecho angla tu te sai arakhel tut po drom, ta te inllarel tut kai o than kai me lachardem chuke.

²¹ Na duriu letar, kande le suako drom, soke vou cherel sa e ezgode ande mo anav, a te na kandian le, vou ni ka prostil tumaro bilachipe.

²² A chachimaia te asunea leko avazi ta te cherea sa so me phendem, me ka avav zuralo che dusmanenchar ta ka dukhavav e llenen kai dukhaven tumen.

²³ Soke mo suecho ka llal angla tu, ta ka inllarel tut kai e phuv katar e amorreura, jititura, fereseura, kananeura, jivitura ta e jebuseura, ta me ka zatriv len.

²⁴ Ni ka de changa angla lenge dela, ta ni ka blagosi len. So morabi te chere si te phage sa lenge dela ta lenge barra kai blagosin.

²⁵ Ka radin e Devleke tumaro Gazda, ta vou ka blagosil tumaro marrno ta tumaro pai. Ta me ka ikanav tumendar suako nasualipe,

²⁶ ta ni ka meren terne. Sa e diskinie katar o Israel ka avel len minone, ta sa lenge chaurre ka biandon saste.

²⁷ Kana tu ka ave kai e phuv katar o Kanaan, me ka cherav e llenen kai zivin kote te pherdon dar ta te nasen angla tu.

²⁸ Ta mai anglal tu te ave, me ka bichalav bindivoria dive te traden e llenen kai ikhardon Jeveoura, kananeura ta e jititura, von ka nasen angla tu.

²⁹ A ni ka tradav che dusmanen ande iek burs, ka cherav le poloke, soke te cheravale oma, e phuv sai murilpe ta sai pherdol zivirinie dive kai sai vazdiniaon pe tute.

³⁰ Mai sukar si te adurichara te avel tut but chaurre, ta gia te le sa e phuv.

³¹ E phuv kai ka dav tut ka resel llik kai e Mora e Loli ta llik kai e mora katar e filisteura, ta katar o pusto llik kai o pai kai ikhardol Eufrates. Ta tu ka gazdari pe sa e llene kai zivin kote, ta tu ka trade len kotar.

³² Te na avel tut ni iek posla gole llenenchar ta ni lenge delenchar.

³³ Ta na muk te zivin ande chi phuv, te na cheren tut te chere o bilachepe mange. Soke sai rese te blagosi lenge dela.