Eksodo 22 - Biblia ande chib Romani

E zakonura kana iek lleno chorel avere

¹ Kana vareko chorela iek guruv o iek bakro, ta mundarela le o bichinela le, morabi te del panch guruva pala gua guruv kai chorda, ta star bakre pala o bakro kai chorda.

² Te malavena iekhe chore kana dela ande iek cher te chorel, ta te rranila le ta te merela, gole kai mundarda le ni ka dosaren le katar leko meripe.

³ A o chor te dela te chorel ollivesea ta te mundarena le, gua kai mundarda le ka avel dosalo katar leko meripe. Ko chorela morabi te pochinel so mola e ezgode kai chorda, a te na avilale love, vou ka avel bichindo te sai pochinel so chorda.

⁴ A te malavena lete e zivirinia kai chorda ta te avela llundi, vou morabi te iril dui zivirinie kai gua lleno kai chorda. Avela guruv o magarcho o iek bakro kai chorda.

⁵ Vareko te mukliarela pe zivirinie ande pi umal te jan, a e zivirinie te llana kai avereki umal te jan, vou morabi te pochinel katar po mai lacho vostano ta pe mai lache drakhenchar so gola zivirinie murisarde.

⁶ Vareko te phabare iag ande avereki umal ta goia iag te phabarela sa o lliu ta e umal, gua lleno kai phabarda e iag morabi te pochinel so phabarda e lleneke kai si leki goia umal.

⁷ Vareko te mukela love o ezgode kai si kuch kai aver lleno te sai guruvel len, ta vareko te chorela gola ezgode katar leko cher, o chor morabi te pochinel dui droma so mona gola ezgode, te istarena le,

⁸ a o chor te nasela, ka inllaren e llene kako si o cher kai e krisaria ta sai llanen dal vou thoda po va pe ezgode kai die lete te guruvel.

⁹ Kana vareko chorela iek guruv, o magarcho o iek bakro, o patave, o varesavi ezgoda jasardi, ta kana vareko phenela gava si murno ta aver phenela iok gava si murno, gole duie llenen ka inllaren len kai e krisaria, ta ko kojada morabi te pochinel dui droma ogole lleneke.

¹⁰ Vareko te mukela kai aver lleno po magarcho, o po guruv, o iek bakro, o varesavi zivirinia, ta goia zivirinia te merela, o te chalavena la, o chorena la ta niko ni dikhla,

¹¹ o lleno kate achili e zivirinia morabi te jal sovel ando anav e Devleko kai vou ni lia niso peke katar e ezgode kai die lete te arakhel. Ondaka o gua lleno morabi te pachal leke sovel ta o lleno kate achile e zivirinia ni ka pochinel niso.

¹² A te chordele angla leke akha, vou morabi te pochinel.

¹³ A e zivirinia te mundarda la iek zivirinia divi, gua lleno ka anel e kotora katar e zivirinia te sai sikavel, ta gia ni ka pochinel.

¹⁴ A vareko te mangela averetar te del lete iek zivirinia, ta goia zivirinia te merela o te chalavena la, kana o lleno kai si leki goia zivirinia inai kote, o lleno kai mangla e zivirinia morabi te pochinel la.

¹⁵ A o lleno kaki si e zivirinia te si kote kana muli, o gua lleno ni ka pochinel. A te phendaia kai ka pochinel o rado kai ka cherel goia zivirinia, ka pochinel samo o vreme kai radisarda.

Aver zakonura

¹⁶ A vareko te kojavela iekhe chea kai inai mangli ta te sovela laia, morabi te pochinel o lallao ta te zinilpe laia.

¹⁷ A lako dad te ni kamela te del la, gua lleno morabi te pochinel so pochindol pala iek chei.

¹⁸ A e chirimatarka te na mukela te zivil.

¹⁹ Vareko te amilape iekhe ziviriniaia morabi te merel.

²⁰ Ko dela kurbano avere delen morabi te merel.

²¹ E llene kai si katar aver phuv ni ka kojaven len ta ni ka dukhave len, soke tumen zivina ando Ejipto, iek phuv kai ni saia tumari.

²² Ni ka dukhave e phivlien ta ni e llenen kai achile bi dadengo.

²³ Soke tu te dukhavea len, von ka mangen mandar ta me ka asunav len,

²⁴ ta bare jolinaia ka lav tumaro zivoto e jarniea. Ondaka tumare rromia ka achen phivlia ta tumare chaurre ka achen bi dadenko.

²⁵ Kana vareko dela love unllile iekhe llene kai si chorro ta kai si israelita, kai zivil tuia, ni ka mange letar love upral katar leke love kai si chuke unllile.

²⁶ Te achadan tute leke patave, kana ka pherel o kham ka irilen lete.

²⁷ Soke gola patave si sa so si le te nakhel o sil ande riat. Me phenav tumenge kai gua lleno te molilape mange, me ka asunav le soke si mange zao.

²⁸ Na den orbe bilache katar o Del, ta na den armaia gole kai gazdaril pe cho foro.

²⁹ Na muken te anen mange so si dino katar tumaro lliu, ta katar tumare drakha. Ka de man o purvo chaurro kai biandilo katar che chaurre.

³⁰ Ta isto gua ka chere che guruvenchar ta che bakrenchar. Efta llive e zivirinie ka muke len pe daia, a o ojtoto llive ka de len mande.

³¹ A tumen, morabi te aven mange llene sante. Na jan o mas kai e zivirinie dive chinde len pe kotora ande umalia, gua mas den le e llukelenge.