Eksodo 21 - Biblia ande chib Romani

E zakonura katar e sluge

¹ Gala si e zakonura kai ka de len:

² Te chinea iek sluga ebreo, ka radil sov burs, a o eftato burs ka muke le te llaltar, ta ni ka pochinel niso te sai llaltar.

³ Te avilo korkorre, ka llaltar korkorre. Te saia le rromi, leki rromi ka llaltar lea.

⁴ A te si kai leko gazda dia le rromi, ta voi te avila la chaurre, e rromi ta e chaurre ka aven leke gazdake, a o sluga ka llaltar korkorre.

⁵ A o sluga te na mangela te llaltar soke volil pe rromia, pe chaurren ta pe gazda,

⁶ ondaka o gazda ka inllarel le kai e krisaria, kai si kai o udar katar e chara e Devleki, ta kote ka jiravel leko kan. Gia ka avel leko sluga ostade.

⁷ A vareko te bichinela pe chorra te avel sluga, la ni ka muken la te llaltar sargo e sluge murus.

⁸ A o lleno kai chinela la, te na mangela te zinilpe laia soke inai leke drago, morabi te mukel te pochinen te sai mukel la te llatar, i te na avela leke drago vou nasti ka bichinel la avere lleneke kai si katar aver phuvia.

⁹ A te zinila la pala po chaurro, morabi te dikhel la sargo pe chorra.

¹⁰ A o lleno kai chinda la te zinilape laia, ta mapalal te zinilape averiaia, nasti ka lel golatar kai saia sluga lako liubao te avel leki rromi, ta nasti ka del la mai cherra jape o patave.

¹¹ Te lela gala trin ezgode latar, voi sai ka llaltar ta ni ka pochinel niso.

O zakono kana mundaren

¹² Kor ranila vareka ta mundarela le, ka chinave gole lleneke te merel.

¹³ A te mundarda le a vou ni mangela te mundarel le, soke gia saia chinado e Devletar te merel, ondaka o lleno kai mundarda le sai ka nasel ta sai gurudol kai o than kai me ka phenav leke te gurudol.

¹⁴ A o lleno kai joliaola varekaia ta mundarela le soke mangla te mundarel le, ka rode le i te gurudola kote kai denpe e kurbanura, ta ka chinave gole lleneke te merel.

¹⁵ A ko chalavela pe da o pe dade, ka chinave gole lleneke te merel.

¹⁶ A ko inllarela iekhe llene pe zor, ta bichinelale avere lleneke o te avela phanglo lete, ka chinave gole lleneke te merel.

¹⁷ A ko dela armaia pe dade o pe da, ka chinave gole lleneke te merel.

¹⁸ A dui llene te marenape, ta iek lendar te chalavela ogole iekhe barrea o dumukhaia, ta te rranila le gia zurale kai morabi te achel samo pe postelia soke ni mundarda le,

¹⁹ gole lleneke kai rranisarda le ni ka cheren leke niso, samo te avela kai o gua lleno kai rranisarde le sai ustel ta sai likel po drom te phirel iekhe rovliaia. Ta morabi te pochinel leke sa so trubula te cherdol te sastol, ta te pochinel leke sa o vreme kai ni radisarda.

²⁰ A vareko te chalavela pe sluga diskinia o murus, iekhe kastea ta te mundarela le, morabi te pochinel po bilachipe.

²¹ A te zivila iek o dui llive, ni ka pochinel so cherda, soke o sluga si leko.

²² A te marenape but llene ta te chalavena iekhe diskinia kai si khamni ta voi te jasarela pe minone, a voi te na merela, von morabi te pochinen so lako rrom mangela, prema so phenena e krisaria.

²³ A voi te merela, ondaka ka pochindol merimaia.

²⁴ Iak pe iak, dan po dan, va po va, porrno po porrno,

²⁵ phabardipe po phabardipe, rrane pe rrane, chaladipe po chaladipe.

²⁶ Vareko te chalavela ande iak pe sluga diskinia o murus ta te jasarela pi iak, cheres leki iak morabi te mukliare le tena avel ios leko sluga.

²⁷ A te peravela leko dan, morabi te mukliarel le te llaltar cheres leko dan.

Aver zakonura

²⁸ Iek guruv te mundarela vareka, ka mudaren e guruve e barrenchar ta ni ka jalpe leko mas. A o lleno kako si o guruv ni ka dosaren le.

²⁹ A o lleno kako si o guruv te llanela kai o guruv saia sikado te chalavel e llenen, ta ni phangla le, ka avel dosalo katar o meripe e lleneko o e llenengo kai mundarela o guruv. A te avelape gia, ka mundaren e barrenchar e guruve ta i e llene kako si o guruv.

³⁰ A o lleno kako si o guruv, sai ka braduil po zivoto te pochinela so mangena letar te pochinel pala po zivoto.

³¹ Isto gava zakono ka thodol te chalavela o guruv varekake chaurre o chorra.

³² A o guruv te chalavela iekhe sluga diskinia o murus, kako si o guruv, ka pochinel lenge tranda tolaria rupune, ta e guruve ka mundarel le barrenchar.

³³ A vareko te mukela putardo iek bunari, o te cherela iek bunari ta ni phandelale, ta te perela ande lete iek guruv o iek magarcho,

³⁴ o lleno kako si o bunari morabi te pochinel e lleneke kaki si e zivirinia, ta leke ka achel e zivirinia kai muli.

³⁵ Kana varekako guruv mundarela avereko guruv, o guruv kai achela llundo ka bichinenle ta ka fulaven e love po dopas maskar pete, ta o mas katar u guruv kai mulo ka fulavenle po dopas.

³⁶ A te llanena saurre kai gua guruv saia sikado te chalavel, ta o lleno kako si o guruv ni phandelale, kote morabi te del ogole llene iek guruv llundo, a vou sai ka achel e guruvea kai mulo.