Eksodo 2 - Biblia ande chib Romani

Biandol o Moises

¹ Iek lleno katar e vicha katar o Levi, zinisailo iekhe diskiniaia kai i voi saia katar e vicha e Levieki.

² Ta voi achili khamni ta maladila lake iek minono. Ta kana dikhla goia dei kai lako minono saia but sukar, guruda le trin chon.

³ Ta sar nasti guruvela le ios, lia iek kotaricha ta thoda turkali ta glibo te ucharel e jivia te na del o pai andre, ta thoda e minone ande kotaricha ta mukla le maskar e kastorra kai barion pasa o pai.

⁴ A leki phiorri achili dur te dikhel so ka avelpe e minonea.

⁵ Mapalal, e chorri katar o Faraon fulisti te naiol ando pai. Ta kana phirela pasa o pai pe slugenchar, dikhla e kotaricha maskar e kastorra ta bichalda iek katar pe sluge diskinie te anen late e kotaricha.

⁶ Ta kana putarda la ta dikhla e minone kai rovela, avila lake zao letar ta phenda: Gava si iek minono katar e ebreura.

⁷ Ondaka e phiorri e minoneki likisti ta phenda e chorrake katar o Faraon: ¿Mange te rodav iekhe diskinia katar e ebreura te del le te piel kolin ta te arakhel e minone?

⁸ E chorri katar o Faraon phenda lake: Lla, ta ikhar la. Ondaka e chorri lleli ta ikharda e minoneke dea,

⁹ ta e chorri e Faraonoki phenda lake: Inllar gale minone ta bariar le mange, ta me ka pochinav chuke. Ta e dei e minoneki inllarda, le ta bariarda le.

¹⁰ Ta kana o minono barilo, inllarda le kai e chorri e Faraonoki ta voi lia le sargo po chaurro ta thoda leko anav Moises, soke phenda: Me ikandem le katar o pai.

O Moises nasel katar o Ejipto

¹¹ Kana nakhle e bursa ta o Moises barilo, iek llive llelo te dikhel pe phlalen katar pi vicha, ta dikhla kai lengo rado saia but zuralo sargo e slugengo. Ta dikhla kai iek ejipsio marela iekhe llene kai saia ebreo.

¹² Ondaka dikhla pe suako rig ta sar ni dikhla nika, mundarda e ejipsio ta prajosarda le ande chisai.

¹³ Thiarinako o Moises pale likisto ta dikhla kai dui ebreura marenape. Ondaka phenda e lleneke kai marela ogole: ¿Soke mare iekhe llene kai si katar chi vicha?

¹⁴ Gua lleno phenda leke: ¿A ko thoda tut te ave birovi ta krisari maskar amende? ¿A so misli te mundare man sar mundardan e ejipsio? Kana asunda gaia orba o Moises darailo, soke acharda kai llangle kai mundarda e ejipsio.

¹⁵ Ta kana asunda o Faraon kai o Moises mundardaia iekhe ejipsio, bichalda te roden le te sai mundarel le. A o Moises naslo ta llelo te zivil ande phuv katar o Madian.

¹⁶ Ta kana avilo incha, beslo pasa iek bunari. Ondaka avile efta chea kai sea chorra katar o popo katar o Madian. Von avilea te ikanen pai te den te pien pe dadeke bakren,

¹⁷ a nesave chobanura avile ta phende lenge te llantar kotar. A o Moises ni mukla te traden len ta dia te pien e bakren.

¹⁸ Kana e diskinie irisaile kai po cher, lengo dad phenda lenge: ¿Sar allive irisailen gia rano?

¹⁹ A von phende: Iek ejipsio ni mukla te traden amen e chobanura, ta mapalal ikanda vou o pai ta dia te pien e bakren.

²⁰ Ondaka lengo dad o Reuel phenda lenge: ¿A kaitalo gua manus? ¿Soke muklen le korkorre? ¡Llan ta ikharen le te jal!

²¹ Gia si sar o Moises achilo te zivil lenchar, ta o Reuel dia pe chorra e Sefora te zinilpe lea.

²² Ta e Seforake maladila lake iek minono, ta o Moises thoda leko anav Gerson, soke phenda: Kate sem iek lleno kai avel katar aver phuv ta zivil ande iek phuv kai inai leki.

²³ Nakhle but bursa ta mulo o charo katar o Ejipto. A e israelitura pale nakhena bari duk. Von nakhena bari patnia soke zivina sargo sluge. Ondaka o Del asunda lengo kukipe.

²⁴ Ta thoda lenge sama ta diape golli pe savi orba achilaia e Abraamea e Isaakea ta e Jakobea.

²⁵ O Del dikhla pe lende, ta acharda savi duk nakhena.