Eksodo 18 - Biblia ande chib Romani

O Jetro llal kai o Moises

¹ O Jetro o popo katar o Madian ta sastro e Moiseseko, llangla sa so cherdaia o Del pala o Moises ta pe foroia o Israel, ta i llangla kai o Del ikandaia len katar o Ejipto.

² Kana o Moises saia ando Ejipto, bichalda pe rromia e Sefora ando Madian, ta o Jetro inllardala,

³ ta i lake duie chaurren. Iek lendar ikhardola Gerson, soke o Moises phendaia: Sema sargo avere phuviengo ande iek phuv kai inai murni,

⁴ a o gua ikhardola Eliezer, soke phenda: O Del me dadeko avilo te pomozil man, ta braduisarda man katar o jarni e Faraonoko.

⁵ O Moises inzardaia pi chara po pusto pasa o burdo e Devleko, ta incha llelo o Jetro, ta inllarda pea leke rromia ta leke chaurre e Moiseseke.

⁶ Ta phenda e Moiseseke: Me, cho sastro o Jetro, avilem te dikhav tut che rromiaia ta che duie chaurrenchar.

⁷ Ta o Moises llelo te lel pe sastre. Ta dia tenemava angla le ta chumidia le, ta mapalal die ande chara.

⁸ Ta kote o Moises phenda leke sa so cherdaia e Faraonoke ta e ejipsionenge te sai pomozil e israelen, ta sa e duk kai nakhle po drom, ta sar o Del braduisarda len.

⁹ O Jetro veselisailo pala o baro volipe kai o Del sikadaia e israelenge kana braduisarda len katar e va e ejipsionenge,

¹⁰ ta phenda: Blagosime te avel o Del, kai braduisarda tumen, foro katar o Israel, katar o va e Faraonoke ta e ejipsionenge.

¹¹ Braduisarda tumen katar e silne ejipsiura kai dukhavena tumen. Akana llanav kai o Del si mai baro neko sa e dela.

¹² Ondaka o Jetro dia kurbanura e Devle, ta avilo o Aaron ta e phure katar o Israel te jan e Jetroia, o sastro e Moiseseko, angla o Del.

O Moises thovel aver krisaria

¹³ Thiarinako o Moises beslo te chinel krisa e israelenge, ta von avena lete thiarinako rano lligo ni perela e riat.

¹⁴ Kana dikhla o sastro e Moiseseko o rado kai liaia, phenda leke: ¿Soke lian pe tute sa gava rado? E llene aven tute thiarinako rano lligo ni perel e riat. ¿Soke chere gava rado korkorre?

¹⁵ A o Moises phenda leke: Soke e israelitura aven mande te puchen e Devle.

¹⁶ Kana si maskar lende joli, aven mande te sai phenav lenge ko si o dosalo, ondaka sikavav lenge o zakono e Devleko ta leke alava.

¹⁷ A o Jetro phenda leke: Inai sukar so chere,

¹⁸ soke tu ka chinio ta i sa o foro kai si tuia. Gava rado si but pharo chuke, ta nasti ka cherele korkorre.

¹⁹ Asun akana mo avazi. Me ka sikavav tut, ta o Del ka avel tuia. Tu morabi te ave angla o Del ando anav e foroko, ta te mange letar vou te lacharel gala ezgode.

²⁰ Ta morabi te sikave len e zakonura e Devleke, ta sikav len sar morabi te zivin ta so si te cheren.

²¹ Ta ezvirisar maskar o foro murusen bizai, te daran katar o Del, ta te aven chache, murusa te na roden te len love kojaimaia. Nesave lendar thov len pe milia llene, averen pe stotina llene, avere pe pinda, ta averen pe des.

²² Von si kai ka chinen e kris e foroke suako drom, ta e bare krisa ka anen len tute, a von ka chinen e krisa mai minone. Gia ka lokhiaven o pharipe kai si pe tute, ta von ka pomozin tut te inllarele.

²³ Te cherdan gala ezgode, ta o Del te phenel chuke te cherelen, tu sai ka terpi, ta i o foro ka llaltar veselo kai pe chare.

²⁴ O Moises asunda o avazi pe sastroko, ta cherda sa so phenda leke.

²⁵ O Moises ezvirisarda llenen bizai maskar sa o Israel ta thoda len te krisin e foro pe milia, pe stotina, ta pe des.

²⁶ Von chinena krisa suako drom, ta e krisa mai bare anena len kai o Moises, ta von chinena sa ogola krisa.

²⁷ Mapalal o Jetro llelotar kai pi phuv, ta mukla e Moisese.