Eksodo 17 - Biblia ande chib Romani

O pai katar e pechina

¹ Sa e israelitura likiste katar o pusto kai ikhardol Sin, ta achena pe thana kai o Del phenela lenge te achen. Ta kana inzarde pe chare pe iek than kai ikhardol Refidim, ni saia pai te piel o foro,

² ta thode te janpe e Moisesea, ta phende leke: ¡De amen pai te pia! A o Moises phenda lenge: ¿Soke jan tumen manchar? ¿Soke zumaven e Devle?

³ A o foro saia but trusalo ta thode te den orbe e Moisesea ta phenena: ¿Soke cherdan amen te lika katar o Ejipto te sai mundare amen trusatar, amare chaurrenchar ta amare zivirinienchar?

⁴ Ondaka o Moises molisailo e Devleke ta phenda: ¿So ka cherav gale llenenchar? ¡Cherricha mai but ta ka mundaren man e barrenchar!

⁵ A o Del phenda leke: Nak angla o foro ta inllar tuia nesave phuren katar o Israel. Ta inllar tuia e rovli golaia kai chaladan o pai katar o Nilo, ta lla.

⁶ Ta me ka aduricharav tut po burdo katar o Joreb upral pe pechina. Ta kana ka chalave e pechina, ka likel pai latar te sai pien e llene. Ta o Moises cherda le gia angla e phure katar o Israel,

⁷ ta thoda o anav katar gua than Masa ta Meriba, pala e burkania kai cherde e israelitura kana zumade e Devle, ta kana phende: ¿Si o inai o Del amenchar?

E israelitura marenpe e llenenchar katar o Amalek

⁸ E llene katar o Amalek llele karing o Refidim te marenpe e israelenchar.

⁹ Ondaka o Moises phenda e Josueeke: Ezvirisar nesave llenen ta lla ta mar tut e llenenchar katar o Amalek. Ta me ka avav thiara upral po burdo, ta ka istarav ande mo va e rovli e Devleki.

¹⁰ O Josue cherda so o Moises phenda leke, ta llelo te marelpe e llenenchar katar o Amalek. A o Moises ta o Aaron ta o Jur likiste upral po burdo.

¹¹ Ta kana o Moises vazdela po va, e israelitura dobina po maripe, a kana peravela po va, dobina e llene katar o Amalek.

¹² A sar o Moiseseke va chniona, thode leke iek barr te besel. Mapalal o Aaron ta o Jur istarde leke va iek pe iek rig a o gua pe ogoia rig te sai vazden e Moiseseke va, ta gia zuraile leke va lligo ni peli e riat.

¹³ Ta gia o Josue dobisarda e llenen katar o Amalek e jarniea.

¹⁴ Ondaka o Del phenda e Moiseseke: Pisisar gava ande lila te sai denpe golli so nakhla, ta phen e Josueeke kai me ka cherav te na delpe golli niko katar o Amalek.

¹⁵ Kote o Moises vazdia iek altar ta thoda leko anav o Del si mo bariako,

¹⁶ ta phenda: ¡Ande mo va si o bariako e Devleko! ¡O Del si ando maripe e Amalekea ostade!