Eksodo 15 - Biblia ande chib Romani

O llilabipe e Moiseseko

¹ Ondaka o Moises ta e israelitura llilabie gaia llili ando liubao e Devleke: Ka llilabav ando liubao e Devleke kai gia sukar dobisarda kana chudia ande mora e grasten ta e llenen kai llana pe lende.

² Mo llilabipe si e Devleke kai si mi zor ta mo braduipe. Vou si mo Del, ta ka blagosiv le. Vou si o Del me dadeko, ta ka dav le liubao.

³ O Del llanel te marelpe. ¡Jeova, si leko anav!

⁴ O Del chudia ande mora e bordona e Faraonoke ta i leke boñikonen. Ta leke mai lache kapitanura tasile ande Mora e Loli.

⁵ Peletar chak andre sargo barra, ta e bari mora ucharda len.

⁶ Ioi Devla, cho zuralo va o chacho saia kai zatrisarda e dusmanonen.

⁷ Ta che bare zoriaia peradan e llenen kai vazdinaile pe tute. Bichaldan chi joli ta phabile sargo patra.

⁸ Phurdian zurale ta o pai chidinailo. E valura vazdinaile sargo zido ta po maskaral e mora cherdili ledo.

⁹ O dusmano phenda: Ka llav pala lende lligo ni ka malavav len, ta ka fulavav so ka lav lendar lligo ni ka achav pochindo. Ka ikanav o jarni, ta mo va ka zatril len.

¹⁰ A tu phurdian ta e mora ucharda len, ta lleletar chak andre sargo o molivi ande mora divi.

¹¹ Ioi Devla, ¡Ni iek del nasti thovelpe prema tu! ¡Niko inai santo ta baro sargo tu! ¡Chere ezgode bare ta chudo!

¹² ¡Thodan chi zor ta e phuv ucharda len!

¹³ Che volimaia inllare gale foro kai braduisardan. Che zoriaia inllare len kai cho santo cher.

¹⁴ Kana ogola phuvia ka llanen le ka izdran daratar. Bari duk ka perel pe phuv katar e filisteura.

¹⁵ E kapitanura katar o Edom ni llanena so ka cheren, ta sa e kananeura ta e moabitura ka isdran daratar ta ka jasaren pi zor.

¹⁶ Ioi Devla, ¡Te perel pe lende iek bari dar! ¡Te achen sargo barra pala e zor che vasteki, lligo ni ka nakhel cho foro, gua foro kai braduisardan!

¹⁷ Ioi Devla, inllar amen te zivi kai cho burdo santo, kai o than kai tu ezvirisardan te zivi kai o santuario kai tu Devla vazdian che vastenchar.

¹⁸ ¡O Del ka charoil ostade!

E Maria llilabel

¹⁹ Kana e Faraonoke bordona ta leke llene kai llana pe gra die ande mora, o Del cherda o pai e morako te perel upral pe lende. A e israelitura nakhle e mora sargo pe phuv e suki.

²⁰ Ondaka e porauka Maria e phei e Aaronoki, lia iek pandero ta sa e diskinie liepe pala la, chelimaia ta basalena e panderura,

²¹ a voi llilabela lenge gia: Llilaben ando liubao e Devleke, kai gia sukar dobisarda kana ucharda ande mora e grasten ta e llenen kai llana pe gra.

O pai o cherko

²² O Moises cherda e israelen te durion katar e Mora e Loli. Ondaka von lleletar po pusto kai ikhardol Chur, ta trin llive phirde pe gua pusto, ta ni malade pai.

²³ Kana avile ande Mara, nasti pile o pai kai saia kote, soke o pai saia cherko. Goleke thode o anav katar gua than Mara.

²⁴ Ondaka e llene thode te den orba bilachi e Moiseseki, ta phenena: ¿So ka pia akana?

²⁵ Ondaka o Moises molisailo e Devleke, ta o Del sikada leke iek kas. O Moises chudia o kas ando pai, ta o pai cherdilo guglo. Ta kote o Del zumada len, ta dia len iek zakono te sai zivin prema lete.

²⁶ Ta o Del phenda lenge: Te thovena sa tumari sama ande so me, o Del tumaro Gazda phenav tumenge, ta te cheren so si mange drago, ta te kandena me zakonura, me ni ka bichalav ni iek katar e zatranie kai bichalden pe ejipsiura, soke me sem tumaro Del kai sastarav tumen.

²⁷ Mapalal avile ando Elim, kote sea desudui lenorra paieke kai liken katar e phuv, ta eftavardes palmere, ta kote inzarde pe chare pasa o pai.