Eksodo 13 - Biblia ande chib Romani

¹ O Del dia orba e Moisesea ta phenda leke:

² Den man e chaurre e mai purane, soke o purvo chaurro kai ka biandol e israelenge si murno, ta isto gia o purvo kai ka biandol katar e zivirinie si murno.

³ Ondaka o Moises phenda e foroke: Den tumen golli katar gava llive, kai pe bare zoriaia o Del ikanda tumen katar o Ejipto, kote kai zivina sargo sluge. Nasti ka jan marrno kai thode pe lete levadura.

⁴ Tumen liken gava llive, ando chon katar o Aviv.

⁵ Ta isto ande gava chon morabi te cheren e slava, kana o Del ka inllarel tumen kai e phuv kai o thud ta o aullin nakhen sargo pai, kai si e phuv katar e kananeura, e jititura, e amorreura, e jeveura ta e jebuseura, kai omanglal diaia po alav tumare puranenge kai ka del la tumenge.

⁶ Ka jan efta llive marrno kai pe lete ni thode levadura, ta ando eftato llive ka cheren slava ando liubao e Devleke.

⁷ Ta ande gola efta llive ka jan marrno kai pe lete ni thode levadura, ta ande ni iek than katar goia phuv ni ka avel levadura ni marrno kai thode levadura pe lete.

⁸ Ande gua llive ka phenen tumare chaurrenge: Gala ezgode cherdon pala so o Del cherda amenchar kana likistam katar o Ejipto.

⁹ Gaia slava ka avel tumenge sargo kana si vareso kai dikhol pe tumaro va o pe tumaro chikat. Gava ka cherel te den tumen golli kai suako drom morabi te den orba katar o zakono e Devleko, soke vou ikanda tumen katar o Ejipto pe bare zoriaia.

¹⁰ Goleke morabi te cheren gaia slava suako burs ando vreme kai si chinado.

¹¹ Kana o Del ka inllarel tumen ande phuv katar e kananeura, ta kana ka del tumen goia phuv, gia sar dia po alav tumenge ta tumare puranenge,

¹² tumen morabi te den tumare mai purane chaurren murus ta e purve zivirinie kai ka biandon, ka aven e Devleke.

¹³ O purvo magarcho katar chi stoka kai biandilo, ka braduile iekhe bakrea, a tena dena iek bakro pala o magarcho morabi te phagen leki korr. Ta i ka braduin tumare chaurren kai si e mai purane iekhe bakrea.

¹⁴ Ta kana tumare chaurre ka puchen tumen: ¿So si gala ezgode kai cheren? Tumen ka phenen lenge: O Del ikanda amen pe bare zoriaia katar o Ejipto, kote kai zivia sargo sluge.

¹⁵ Ta kana o Faraon thodape zuralo ta ni kamela te mukel amen te llatar, o Del ranisarda merimaia e chaurren e mai puranen katar suako familia e ejipsionengi, ta i katar e purve biande katar e zivirinie, goleke da e Devle e purve zivirinie kai biandon ta po than amare chaurrengo, da iek kurbano pala amaro chaurro o mai purano.

¹⁶ Goleke, sargo kana si tumen iek ezgoda kai dikhol pe tumaro va o pe tumaro chikat, gaia slava ka cherel te den tumen golli kai o Del ikanda amen katar o Ejipto pe bare zoriaia.

O oblako iagako

¹⁷ Kana o Faraon mukla te llaltar e foro katar o Israel, o Del ni inllarda len katar o drom kai llal kai e phuv katar e filisteura, kai saia mai pase, soke mislisailo kai e israelitura ni ka mangen te marenpe kana trubula te marenpe ta kai ka mangen te irinpe ando Ejipto.

¹⁸ Goleke cherda len te phiren truial katar o drom kai llal kai e Mora e Loli. E israelitura likiste sargo llene lacharde te marenpe.

¹⁹ O Moises inllarda pea e kokala e Joseeke, soke o Jose cherda e chaurre katar o Israel te jan leke sovel te cheren le, soke vou phendaia lenge: O chachipe o Del ka avel te pomozil tumen, ta kana gua ka avelpe, tumen morabi te inllaren me kokala katar.

²⁰ E israelitura likiste katar o Sukot ta logle ando Etam, kote kai delpe po pusto.

²¹ Ollivesea o Del llala lenchar ande iek oblako te sai sikavel lenge o drom, ta orachaia ande iek oblako iagako te sai kletosarel len. Ta gia von sai ladena ollivesea ta i orachaia.

²² Nikada o oblako ni mukla len ni ollivesea, ni o rachaia o oblago iagako.