Eksodo 12 - Biblia ande chib Romani

E Paskua

¹ O Del dia orba ando Ejipto e Moisesea ta e Aaronea ta phenda lenge:

² Gava chon ka avel o mai preche tumenge ta purvo katar e chona katar o burs.

³ Ta phenen sa e israelenge gala alava: O llive des katar gava chon, suako lleno tumendar ka lel iek bakro o iek busno, suako familia ka lel iek pe chereke.

⁴ A e familia te avela but minoni kai ni resena te jan o bakro, ondaka von ta e llene kai zivin pasa lende ka jan gua bakro ta ka fulavenle prema e llene kai si ta prema so sai jal suako lleno, ta gia ka chinen e bakre pe kotora te resel saurrenge.

⁵ Sai avel iek bakro o iek busno, morabi te aven saste ta te avel lenge iek burs.

⁶ Ta ka guruven e bakre o e busne llik kai o llive desustar katar gava chon, ta gua llive ka den le kurbano pasa racha sa e llene katar o Israel.

⁷ Mapalal ka len o rat katar gua kurbano ta ka makhen truial katar o udar gole chereko kote kai ka jan gua kurbano.

⁸ Ta goia riat ka jan o mas peko pe iag, ta marrne kai ni thode pe lende levadura, ta ka janle e patrenchar cherke.

⁹ Ni iek kotor ni ka janle ialo o chirado ando pai, sa morabi te avel peko ande iag, i leko soro, leke porrne, ta i sa so si ande leko lli.

¹⁰ Morabi te janle gua llive, a te achela vareso thiarinako, ka phabarenle.

¹¹ Ta gia si sar ka janle, thode tumare patave pe tumende, ta i tumare minie, ta tumari rovli ando va, ta ka sigaren te janle soke si e Paskua e Devleki.

¹² Soke me ka nakhav goia riat katar sa o Ejipto ta ka rraniu merimaia sa e chaurren kai biandile o purvo, gola kai si e mai purane katar suako familia katar e ejipsiura. Gia katar e manusa ta i katar e zivirinie, ta ka chinav kris ta ka dosarav sa e devlen katar o Ejipto. Me o Del, phendem le.

¹³ Soke o rat kai tumen ka thoven pe chera ka cherel te dikhol kai sen, ta gia kana me ka anav o meripe po Ejipto, niko tumendar ni ka merel soke kana me ka dikhav o rat ka nakhav angle katar gua cher.

¹⁴ Gava si iek llive kai tumen morabi te den tumen golli letar, ta ande gua llive ka cheren iek slava ande pachiu e Devleke. Ta gaia slava ka avel iek zakono ostade kai ka cheren le e dada ta ka nakhel kai e chaurre.

¹⁵ Ta efta llive ka jan marrne kai ni thode pe lende levadura, goleke katar o purvo llive llik kai o eftato morabi te na avel levadura ande tumare chera. Goleke vareko te jala marrno kai thode levadura pe lete ande gola efta llive, ka avel tradino katar o Israel.

¹⁶ O purvo llive ta o eftato llive ka avel iek chidinipe santo. Ande gola llivesa ni ka radin, samo ka cheren o jape kai suako lleno ka jal.

¹⁷ E slava katar o marrno kai ni thoven pe lete e levadura si iek llive kai tumen morabi te slavin, soke isto ande gua llive ikandem tumen saurren katar o Ejipto. Ka cheren gaia slava sargo iek zakono ostade kai ka cheren le e dada ta ka nakhel kai e chaurre.

¹⁸ Ka jan marrno kai ni thode levadura pe lete pasa racha katar o llive desustar, katar o purvo chon llik pasa racha katar o llive bis ta iek katar gua chon.

¹⁹ Morabi te na avel levadura ande tumare chera efta llive, soke ko jala marrno kai thode levadura pe lete ka avel tradino katar o Israel, i te avela katar aver phuv o te avela katar o foro.

²⁰ Goleke ni ka jan niso pe so thode levadura kaigo te zivina, morabi te jan marrno kai ni thode pe lete levadura.

²¹ O Moises thoda te ikharen sa e phuren katar o Israel, ta phenda lenge: Llan ta len iek bakro o iek busno tumare familiake, ta mundaren le te sai cheren e slava katar e Paskua.

²² O rat morabi te thovenle ande iek lelleno, ta len iek patrorra ta chingaren len e ratea, ta makhen sa truial katar si thodo o udar e chereko. Ta niko tumendar te na likel katar po cher lligo ni ka llivosaol.

²³ Ondaka kana o Del ka nakhel te ranil merimaia e ejipsionen, ka dikhel o rat truial o udar, ta ka nakhel katar gua cher. Ta o Del ni ka mukel te del andre gua kai zatril, gia niko tumendar ni ka merel.

²⁴ Gala alava ka guruven len tumen ta tumaro porodo, sargo iek zakono ostade.

²⁵ Ta kana tumen ka den ande phuv kai o Del ka del tumen, gia sar dia tumen po alav, tumen morabi te cheren gava zakono.

²⁶ Ta kana tumare chaurre ka puchen tumen ¿So si gava zakono?

²⁷ Tumen morabi te phenen lenge: Gaia zivirinia del pe kurbano ande Paskua, ando liubao e Devleko. Kana vou ranisarda merimaia e ejipsionen, ta nakhlo e chera e israelenge kai zivina ando Ejipto, ta gia braduisarda amare familia. Ondaka pala gala alava kai dia orba o Moises, e israelitura die changa ta blagosisarde e Devle.

²⁸ Mapalal llele ta cherde sa sar o Del phendaia e Moiseseke ta e Aaroneke te cheren.

O meripe katar e chaurre e mai purane

²⁹ Ondaka kana saia o dopas katar e riat, o Del ranisarda merimaia e chaurren e mai puranen katar suako familia ande phuv katar o Ejipto, katar o chaurro o mai purano katar o Faraon kai besela pe leko trono, llik kai o chaurro o mai purano katar o lleno kai si ande rubie, ta e mai purane katar e zivirinie.

³⁰ O Faraon, ta sa e llene kai radina leke, ta sa e ejipsiura, ustile goia riat ta ande sa o Ejipto kukina dukhatar ta rovena, soke ande suako cher saia iek mulo.

³¹ Isto ande goia riat o Faraon bichalda te ikharen e Moisese ta e Aarone, ta phenda lenge: Llantar dur katar mo foro, tumen ta e israelitura. Llan te blagosin e Devle, gia sar phenden le.

³² Ta inllaren tumenchar tumare bakre ta tumare guruva, gia sar mangena, ta llantar. Ta molin tumen e Devleke pala ma.

³³ A e ejipsiura sigarena e israelen te sai llantar mai oma katar lengi phuv, soke mislinape kai sa ka meren.

³⁴ Ta e israelitura ikande e phalia kai ni ios ni thodea pe lende e levadura, ta ulisarde len pe patavenchar ta thode len pe pe dume.

³⁵ Ta e israelitura cherde so phendaia lenge o Moises, mangle katar e ejipsiura ezgode cherde katar o rup, katar o sunakai ta patave.

³⁶ Ta o Del cherda e ejipsiura te den len lachimaia sa so von mangena lendar, ta gia e israelitura lie sa so saia e ejipsionen.

E israelitura llantar katar o Ejipto

³⁷ E israelitura likiste katar o Rameses karing o Sukot. E llene kai likiste sea preko sov stotine milie murus phirindo, bi te llindon e minone.

³⁸ Ta lenchar lleletar but llene katar suako vicha, ta but bakre ta guruva.

³⁹ Ta sar ni saia len vreme te cheren jape, soke e ejipsiura tradiea len katar pi phuv, cherde marrno katar e phalia kai ikandea katar o Ejipto kai pe lende ni thodea e levadura.

⁴⁰ E israelitura zivisardea ando o Ejipto star stotine ta tranda burs.

⁴¹ Ta isto gua llive kai nakhlea star stotine ta tranda burs, o foro e Devleko likisto katar o Ejipto.

⁴² Goia riat o Del ikanda len katar o Ejipto. Goleke te sai den tumen golli katar goia riat e Devleki, i tumen morabi te prezon goia riat ta i tumaro porodo ostade.

O zakono katar e Paskua

⁴³ Ta o Del phenda e Moiseseke: Gava si o zakono katar e Paskua: Ni iek lleno kai avel katar aver phuv, nasti ka jal katar o bakro kai diele kurbano.

⁴⁴ A o sluga kai si chindo lovenchar, sai ka jal letar te cherde leke mai anglal e sirkunsision.

⁴⁵ Ni iek lleno kai si katar aver phuvia kai radila chuke, nasti ka jal katar gua kurbano,

⁴⁶ ta morabi jalpe samo ande iek cher. Ta ni ka ikanen kotar ni iek kotor mas katar gua bakro, ta ni ka phagen ni iek katar leke kokala.

⁴⁷ Gava zakono morabi te cheren le sa e israelitura.

⁴⁸ A te avela iek lleno katar aver phuv kai zivil maskar tumende kai mangela te cherel e slava katar e Paskua ando liubao e Devleke, mai anglal morabi te cherel sa e murusen katar pi familia te sirkunsidinpe, ta mapalal sai ka slavin e Paskua, ta ka avel sargo iek lleno katar tumari phuv. A niko nasti ka jal katar o kurbano te na cherde leke e sirkunsicion.

⁴⁹ Isto gava zakono ka a avel e llenenge kai biandile ande phuv ta i golenge kai si katar aver phuv ta zivin maskar tumende.

⁵⁰ E israelitura cherde sa sar o Del phendaia le e Moiseseke ta e Aaronoke.

⁵¹ Ta isto gua llive o Del ikanda katar o Ejipto pe foro e Israele.