Eksodo 11 - Biblia ande chib Romani

O meripe katar e chaurre mai purane

¹ O Del phenda e Moiseseke: Ka anav aver zatrania po Faraon ta po Ejipto, ta mapalal katar gaia zatrania o Faraon na samo ka mukel tumen te llantar, isto vou ka tradel tumen katar.

² A akana phen e israelenge, e diskinienge ta i e murusenge te mangen katar e llene kai zivin pasa lende, avena diskinie o murus, ezgode rupune ta sunakune.

³ Ta o Del cherda e ejipsiura te aven pachivale lenchar. Ta maskar e llene kai radina e Faraonoke ta i maskar o foro, dikhena e Moisese sargo iekhe llene kai saia te den liubao ando Ejipto.

⁴ Ondaka o Moises phenda e Faraonoke: O Del phenda gia: Ando dopas e rachako me ka nakhav po maskaral katar o Ejipto,

⁵ ta ka merel o chaurro o mai purano katar suako familia katar e ejipsiura, katar o chaurro o mai purano katar o Faraon kai besel pe leko trono, llik kai o mai purano katar e sluga kai radil ando molino, ta i sa e mai purane katar e zivirinie.

⁶ Ta ka avel iek baro kukipe ande sa o Ejipto, sar nikada ni saia ta ni ka avel.

⁷ Ta te sai llanen tumen kai o Del ni ka cherel e israelenchar isto gia sar ka cherel e ejipsionenchar, ni e llukela ni ka basen pe ni iek lleno ni pe zivirinie katar o Israel.

⁸ Ondaka ka aven sa e llene kai radin chuke, ta ka den tenemava angla ma ta ka phenen mange: Llatar, tu ta sa o foro kai llal pala tu. Ta mapalal me ka llautar. Ta o Moises llelotar but joliariko katar o cher e Faraonoko.

⁹ Ondaka o Del phenda e Moiseseke: O Faraon ni ka thovel tumenge sama, ta gia ios ezgode bare ka cherav ando Ejipto.

¹⁰ O Moises ta o Aaron cherde sa gala bare ezgode angla o Faraon. Ta sar o Del zuriardaia o lio e Faraonoko, vou ni mukla te llantar e israelitura katar pi phuv.