Eksodo 10 - Biblia ande chib Romani

E zatrania katar e langoste

¹ O Del phenda e Moiseseke: Lla kai o Faraon, soke me zuriardem leko lio ta e lie e llenenge kai radin leke, te sai sikavav lenge e bare ezgode kai me sai cherav,

² te sai tu phene che chaurrenge ta che unukonenge e ezgode kai me cherdem ando Ejipto, ta e bare ezgode kai cherdem te dikhon maskar lende. Ta gia tumen ka llanen kai me sem o Del.

³ Ondaka o Moises ta o Aaron llele kai o Faraon, ta phende leke: Gia phenel o Del, o Gazda katar e ebreura: ¿Pe gachin ios ni ka ave prosto angla ma? Muk te llal me foro te blagosil man.

⁴ Soke te na mukea le, thiara ka anav e langoste pe chi phuv,

⁵ pe gachin langoste ka aven kai ka ucharen e phuv, ta nasti ka dikhol e chik. Von ka jan so achila mapalal katar e krupe, ta ka jan sa e kasta kai den septelie ande umalia.

⁶ Ka pheren che chera, ta i e chera katar e llene kai radin chuke, ta e chera katar sa e ejipsiura. ¡Ka avel iek ezgoda kai nikada ni dikhle che dada, ta ni che papura sar kana von sea pe pe phuv llik akana! Kana dia gaia orba, o Moises boldinailo ta llelotar katar o cher e Faraonoko.

⁷ Ondaka e llene kai radina e Faraonoke phende: ¿Pe gachin ios morabi te terpi gale llene? Charo, muk gole llene te llaltar pe foroia te blagosin pe Devle lengo Gazda. ¿A so charo, ni llane kai o Ejipto sa zatrisailo?

⁸ Ondaka o Faraon ikharda e Moisese ta e Aarone, ta phenda lenge: Llan te blagosin tumare Devle kai si tumaro Gazda. A mai anglal phenen mange save llene ka llan.

⁹ O Moises phenda leke: Morabi te lla amare minonenchar ta amare phurenchar, amare chaurrenchar ta amare chorrenchar, amare bakrenchar ta i e guruvenchar, soke amenge si iek bari slava e Devleki.

¹⁰ A o Faraon phenda lenge: ¡Achardol kai llan bilachimaia! ¿A tumen pachan kai o Del ka avel tumenchar, ta kai me ka mukav tumen ta tumare minonen te llantar?

¹¹ Gaia ezgoda ni ka avelpe gia. Llan tumen, e murusa mai purane te blagosin e Devle, soke gua si so tumen manglen. Ta o Faraon phenda te traden len katar leko cher.

¹² A o Del phenda e Moiseseke: Inzar cho va po Ejipto, te sai aven e langoste te zatrin sa e patra kai si ando Ejipto, ta so achila mapalal katar e krupe.

¹³ Ondaka o Moises vazdia pi rovli pe phuv katar o Ejipto, ta o Del anda iek balav katar e rig kai likel o kham kai phurdia po Ejipto sorro llive ta sa goia riat, ta thiarinako rano e balav katar e rig kai likel o kham anda e langoste,

¹⁴ ta e langoste die ande sa e phuv katar o Ejipto, pe gachin sea kai nikada ni saia ta ni ka aven pe gachin langoste sargo ande gua llive.

¹⁵ Sea pe gachin pe phuv kai nasti dikhola e chik, ta jale sa e patra ta sa e septelie kai achilea pe kasta mapalal katar e krupe. Ni achila ni iek patrin zeleni pe ni iek rig katar o Ejipto, ni ande umalia ni pe kasta.

¹⁶ Ondaka o Faraon sigarda te ikharel e Moisese ta e Aarone, ta phenda lenge: Cherdem o bilachipe angla o Del o Gazda ta i angla tumende.

¹⁷ Moliv man tumenge, prostin man samo gaia drom, ta te molin tumen e Devleke tumaro Gazda te lel mandar gaia zatrania merimaki.

¹⁸ Ta o Moises samo likisto katar o cher e Faraonoko, molisailo e Devleke.

¹⁹ Ondaka o Del cherda e balav te phurdel pe aver rig, ta cherda te cherdol iek bari balav katar perel o kham kai inllarda e langoste ta chudia len ande Mora e Loli. Ta ni achila ando Ejipto ni iek langosta.

²⁰ A o Del zuriarda o lio e Faraonoko, ta o Faraon ni mukla te llan e israelen.

E zatrania katar o truniariko

²¹ Ondaka Del phenda e Moiseseke: Inzar cho va karing o miloso te sai avel ando Ejipto iek truniariko gia baro, kai nasti dikhena ni po nai.

²² O Moises vazdia po va karing o miloso, ta trin llive avilo iek truniariko but baro po Ejipto.

²³ Ta ande gola trin llive niko ni dikhla nika, ta niko ni ustilo katar po than, a sa e israelitura saia len villelo ande pe chera.

²⁴ Ondaka o Faraon bichalda te ikharen e Moisese, ta phenda leke: Llan te blagosin e Devle, ta inllaren tumenchar tumare minonen, a muken kate tumare bakren ta tumare guruven.

²⁵ A o Moises phenda leke: Gava ni ka avelpe gia, isto tu ka de amen zivirinie kai ka da len kurbano, ta ka phabaralen ando liubao e Devleko kai si amaro Gazda.

²⁶ Ta i amare zivirinie ka llan amenchar. Ni iek zivirinia ni ka achel kate, soke morabi te ezviri nesave lendar lligo ni ka ava incha te blagosi e Devle amaro gazda.

²⁷ A o Del zuriarda o lio e Faraoneko, ta ni mukla te llantar.

²⁸ Ta o Faraon phenda e Moiseseke: Llatar katar, ta arak tut te na ave te dikhe man pale, soke te avilan pale, ka mere.

²⁹ A o Moises phenda leke: Sukar phendan: Ni ka avav ios te dikhav tut.