Eklesiastes 8 - Biblia ande chib Romani

¹ ¿Ko sai avel sargo iek lleno bizai? ¿Ko sai avel sargo o lleno kai llanel suako ezgoda? O bizai klichil leko mui, ta leko mui dikhol veselo.

Sar te kanden e charo

² Kande e alava e charoke ta cho alav kai dian e Devle.

³ Na sigar te llatar kana san angla le. Na thov tut te chere ezgode bilache, soke vou ka cherel so vou mangel.

⁴ Ta o alav e charoko si le zor, ta ko sai phenel leke: ¿So chere?

⁵ O lleno kai kandel leke alava, ni ka nakhel o bilachipe, ta o lleno bizai llanel kana si te kandel ta sar trubul te cherel le.

⁶ Soke sogo mange te chere si le leko vreme, a o bilachipe e manuseko si baro

⁷ soke ni llanel so ka avelpe ni kana ka avelpe, ta inai ko te phenel le leke.

Niko ni gazdaril po zivoto ni po meripe

⁸ Niko ni gazdaril po zivoto te achavel le pete ta ni gazdaril po llive katar o meripe, ta nasti mare tut gale ezgodaia. O bilacho ni ka braduil le leko bilachipe.

⁹ Sa gala ezgode dikhlem soke thodem te sikivav sa me liea katar sogo cherdol pe gaia phuv. Ta dikhlem sar nesave droma e manusa gazdarin pe aver, ta gua si iek bilachipe saurrenge.

Si ezgode kai ni phenen niso

¹⁰ Ta i dikhlem sar prajon liubaimaia e bilache llenen, a bristraile katar e llenen kai llana kai o than santo ando foro kai cherena so si orta. Ta i gaia ezgoda ni mol la niso.

¹¹ Kana ni cheren so chinde pe kris katar iek bilachipe, o zivoto e manusengo chirdel len te cheren o bilachipe.

¹² I te cherela o bilacho stotina droma o bilachipe ta te zivil but burs, me llanav kai ka llal sukar e llenenge kai den liubao e Devle, gola kai den le liubao kana si angla le,

¹³ ta kai ni ka llal sukar golenge kai ni pachan ando Del, ta ni ka zivin but burs po zivoto kai si sargo iek senka, soke ni daran kana si angla o Del.

¹⁴ Pe phuv cherdon ezgode kai ni mol len niso. Si llene lache kai llal lenge sargo kana von si bilache, a si llene bilache kai llal lenge sargo kana von si lache. Me phenav kai i gala ezgode ni mol len niso.

¹⁵ Goleke blagosiv e veselia. O mai lachipe kai sai cherel o manus si te jal ta te piel ta te veselilpe, soke gua si so achel le katar leko rado kai o Del dia le pe gaia phuv.

¹⁶ Me thodem sa mo zivoto te pinllarav o bizaipe, ta te dikhav so cherdol pe gaia phuv ta nasti sovava ni orachaia ni ollivesea.

¹⁷ Dikhlem sa e ezgode kai cherda o Del, ta sar o manus nasti acharel e ezgode kai nakhen pe gaia phuv, i mai te trudilpe te rodel len, i te phenela o bizai kai malada len ni ka acharel len.