Eklesiastes 7 - Biblia ande chib Romani

Thou sama pe ezgode kai si mai preche

¹ Mai mol e orbe lache kai den tutar neko o mai lacho meriso. Mai mol o llive kai o manus merel neko o llive kana biandol.

² Mai mol te lla kai o cher zalosno neko kai o cher kai si iek bari sinia, soke o meripe si o son katar suako manus, ta gua kai zivil si te mislilpe ande goia ezgoda.

³ Mai mol te rove neko te asa, soke o roipe sai tristol o mui a lacharel o lio.

⁴ O lleno bizai mislilpe ando meripe, a o dilo samo mislilpe te asal.

⁵ Mai mol te asune sar del pe tute iek bizai, neko te asune sar falil tut iek dilo.

⁶ Soke o asape e dileko si sargo kana phabon e karrne telal katar e kavi. Ta i gaia ezgoda ni mol la niso.

⁷ O silnope diliarel e bizaie, ta o sebapi kai si pochindo muril o lio.

⁸ Mai mol o son katar iek buchi neko kana iakom llal angle. Mai mol o lleno dukhado neko o lleno barikano.

⁹ Na joliao oma ande cho lio, soke e joli si ande dilengo lio.

¹⁰ Nikada na puch: ¿Soke omanglal e ezgode sea mai lache neko akana? Soke inai bizaipe te puche goia ezgoda.

¹¹ Sukar si o bizaipe e lovenchar kai achen katar e familia e llenenge kai zivin pe gaia phuv.

¹² Soke e love ta o bizaipe arakhen, a mai mol o bizaipe soke del zivoto e bizaie.

¹³ Dik so cherda o Del, ¿ko sai ortol so o Del bangarda?

¹⁴ Kana ka llal chuke sukar veselisao pala gua lachipe. A kana ka llal chuke gado, mislisao kai o Del cherda e dui ezgode te na llanel o manus so ka avelpe mai angle letar.

¹⁵ Sa gala ezgode dikhlem ande mo zivoto kai ni mol le niso. O chacho merel pala po chachipe, ta si llene bilache kai pala po bilachipe zivin mai but burs.

¹⁶ Te na ave but chacho, ta te na ave but bizai. ¿Soke ka zatri tu tut?

¹⁷ Na cher but bilachipe, ta na cher tut dilo. ¿Soke te mere mai oma?

¹⁸ Sukar si te istare iek ezgoda bi te muke ogoia, soke o lleno kai del liubao e Devle ka llal leke sukar pe suako ezgoda.

¹⁹ Mai but zor del o bizaipe e bizaie neko des kraliura iekhe foro.

²⁰ Chachimaia inai ni iek lleno chacho pe phuv te cherel o lachipe suako llive, ta te na cherel nikada o bilachipe.

²¹ Ta na thov sama pe sa e orbe, ta gia ni ka asune kana cho sluga del orbe bilache tutar,

²² soke tu llane kai but droma i tu dian orbe bilache katar aver llene.

Roda o bizaipe

²³ Sa gala ezgode zumadem len bizaimaia, ta phenava me mange: Ka avav bizai, a o bizaipe naslo mandar.

²⁴ So saia si dur mandar, ta so si chak andre ¿ko ka malavel le?

²⁵ Pale dikhlem ta thodem man sa me liea te sikivav ta te lav o bizaipe ta so si orta, te sai llanav kai te ave bilacho si iek dilipe ta te ave besno si iek dilipe.

²⁶ Ta maladem kai si mai cherki neko o meripe e diskinia kai ande lako lio si o kojaipe, ta kai lake va si sole kai phanden. O lleno kai si drago e Devleke ka nasel latar, a o bilacho ka achel phanglo ande lake va.

²⁷ Me o lleno kai sikavel phenav gia: Rodiem o chachipe katar sa e ezgode, ta reslem pe gaia orba:

²⁸ Kai llik kate ni malavav so rodav chachimaia. Maladem iek murus maskar e milia, a ni maladem ni iek diskinia maskar sa e diskinie.

²⁹ Ta samo iek ezgoda maladem: Kai o Del cherda e manusen orta, ta von rodie te murin po zivoto.