Eklesiastes 6 - Biblia ande chib Romani

¹ Aver bilachipe dikhlem pe gaia phuv ta dikhol but maskar e llene,

² kai o manus kai o Del del le barvalipe, lachipe ta liubao, ta kai ni trubul le niso katar so zelil, o Del ni mukel le te veselilpe gole ezgodenchar, ta aver llene len goia veselia. ¡I gaia ezgoda ni mol la niso ta si iek bilachipe kai dukhavel o zivoto!

³ E manuse sai aven le stotina chaurre, ta sai zivil but burs, a te na chalilo katar o lachipe, ta te na avila le ni limori, me phenav kai mai mol neko vou iek minono kai biandol mulo.

⁴ Soke gua minono jasaol kote kai inai niso, ta ando truniariko leko anav jasaol,

⁵ ta nikada ni dikhla o kham ta ni pinllarda le. Mai esmiro si leke neko gole manuseke,

⁶ soke i te zivila dui milie burs ta ni veselilape ando lachipe, ¿ni ka lla saurre isto kai iek than?

⁷ Sa so radil o manus si te sai jal, a nikada ni achel chalio.

⁸ ¿So si e bizaie mai but neko e dile? ¿So si le mai but o chorro kai llangla te phirel pe gava zivoto?

⁹ Mai mol so dikhol neko o mislo kai nakhel. Ta i gaia ezgoda ni mol la niso ta dukhavel o zivoto.

¹⁰ A cheres so si akana cheren but burs kai si le anav, ta llana kai si o manus ta ka nasti marelpe golea kai si mai zuralo letar.

¹¹ Kana si but orbe bariaren so ni mol le niso. ¿So ios si e manuse?

¹² Soke niko ni llanel so si mai lache e manuseke pe gava zivoto, sa e llivesa katar leko zivoto kai ni mol len niso ta kai nakhel len sargo iek senka. Soke, ¿Ko llanel so ka avelpe pe e manusetar pe gaia phuv mapalal kana ka merel?