Eklesiastes 5 - Biblia ande chib Romani

Kana delpe o alav morabi te cherdol

¹ Kana ka lla ando cher e Devleko dik so chere, mai sukar si te lla mai pase te asune, neko te de kurbano sargo e dile kai ni llanen kai cheren o bilachipe.

² Na sigar te misli tut te de orba ni te phene vareso angla o Del, soke o Del si ando miloso a tu san pe phuv, goleke na de but orba.

³ Soke kana chere but ezgode avel e lindri, ta ande but alava si o dilipe.

⁴ Kana ka ja sovel e Devleke, sigar te chere so phendan, soke leke inai drago e dile. Cher so jalan sovel.

⁵ Mai lache si te na ja sovel, neko te ja sovel ta te na chere so phendan.

⁶ Na muk che alava te cheren tut te chere o bilachipe, ta na phen angla o suecho kai cherdan le soke ni llanea. ¿Soke ka joliare e Devle pala che alava ta ka chere te zatril sa so cherdan?

⁷ Goleke, pala gachin sune bilache si gachin ezgode kai ni mol len niso. Atu, trubul te dara e Devletar.

Ezgode kai kojaven ando zivoto

⁸ Te na chudi tut te dikhlan ande varesavo foro kai ni thoven sama e llenenge kai si chorre, o kai bangaren o chachipe, soke po sudo kai si upre gazdaril aver kai si mai upre letar, ta upral pe lende gazdaril aver.

⁹ Ta gia bariol o foro saurrenge, ta i o charo radil pala e llene katar o vos.

¹⁰ O lleno kai volil e love, ni ka chaliol nikada katar e love, ta gua kai drago leke te avel le but ni ka lel chari. I gaia ezgoda ni mol la niso.

¹¹ Soke kana e manuse si le mai but, mai but llene jan. ¿A so dobil o lleno kai si le kana samo sai dikhel po barvalipe kai si le?

¹² O lleno kai radil sovel lachi lindri, jala but o jala cherricha. A o barvalo nasti sovel soke si le but.

¹³ Dikhlem iek bilachipe kai dukhavel e sueto: Kai e llene kai chiden but love te guruven len, goia ezgoda muril len,

¹⁴ soke ande iek rado bilacho sai jasaren len, ta lenge chaurre sai achen bi lovenchar.

¹⁵ Gia sar likisto katar pe dako lli nango, isto gia ka llaltar sar avilo, ta ni ka inllarel ande pe va niso katar po rado.

¹⁶ Gaia si iek ezgoda but bilachi, kai gia sar avilo, isto gia si te llaltar. ¿Ta so dobisarda kai radisarda samo gia?

¹⁷ Ta sa po zivoto jala ando truniariko, dukhado, ande nuzda ta ande joli.

¹⁸ A o lachipe kai me dikhlem ande sa gala ezgode, si o manus te jal ta te piel ta te veselilpe ando lachipe kai del le o pharo rado kai cherel pe gaia phuv, ande sa o zivoto kai del le o Del, soke gua si leko chari.

¹⁹ Ta suako llene kai o Del del le barvalipe ta lachipe, ta mukel le te jal katar gua barvalipe ta te lel po chari ta te veselilpe pala po rado, gua si soke o Del dia le goia ezgoda.

²⁰ Ta ni ka delpe golli but katar e nuzde e zivotoke soke o Del ka pherel veselia leko lio.