Eklesiastes 4 - Biblia ande chib Romani

¹ Thodem sama pe aver rig ta dikhlem pe sa o silnope kai cherdol pe gaia phuv, ta sar roven e llene dukhade bi te avel ko te del len zor, a gola kai dukhavena len saia len e zor, a gola kai rovena ni saia ko te del len vlaga.

² Goleke blagosisardem mai but golen kai mule neko golen kai zivin,

³ a mai lache si golenge kai ni biandile neko golenge kai si mule, soke ni dikhle o bilachipe kai si pe gaia phuv.

⁴ Ta i dikhlem kai suako buchi ta suako baro rado cherel te avel joli maskar e llene. Ta i gaia ezgoda ni mol la niso ta dukhavel o zivoto.

⁵ O dilo khuvel pe va ta jal isto po mas.

⁶ Mai mol te radi dopas ta te ache te lelpe o chiñipe, neko te ave pherdo rado ta te dukhadol cho zivoto.

⁷ Dikhlem pe aver rig ta dikhlem aver ezgoda kai ni mol niso:

⁸ Iek lleno korkorre kai inai le ni chaurre ni phlal, a ni achel te radil, ta ni chiniol te dikhel pe po barvalipe, ta ni puchel vou pe: ¿Kake radiu me, ta achavav katar mo zivoto o lachipe? ¡Ta i gaia ezgoda ni mol la niso, ta si iek pharo rado!

Kana si zanio si zor

⁹ Mai mol dui neko iek, soke mai but chari len pe po rado.

¹⁰ A te perel iek, o gua ka vazdel ogole. ¡A tesko goleke kai perel kana si korkorre soke ni ka avel ko te vazdel le!

¹¹ Ta dui llene te soven ande iek than iek ka del tatipe ogole, a iek lleno korkorre ¿sar ka lel o tatipe?

¹² Iekhe llene korkorre sai dobin le, a dui sai terpin. Ta o solo trine thavengo ni chindol oma.

O bizaipe inai ande bursa

¹³ Mi preche si o terno chorro ta bizai neko o charo phuro ta dilo, soke ni ka asunel kana ka sikaven le.

¹⁴ I te likela katar o phandipe o terno, ta i te biandilo chorro ande charoina, ka cherdol charo:

¹⁵ Dikhlem sa e manusen sar phirena e ternea kai ka avel po than katar o purano charo.

¹⁶ But sueto llala pala le, a ni von ni e llene kai ka aven mapalal ni ka aven vesele lea. Ta gaia ezgoda ni mol la niso ta dukhavel o lio.