Eklesiastes 3 - Biblia ande chib Romani

Suako ezgoda si la lako vreme

¹ Suako ezgoda si la lako vreme, ta sogo si pe phuv si le leko saiato.

² Si o vreme te biando, ta si o vreme te mere. Si o vreme te thove e simicha ande phuv, ta si o vreme te chirde so thodan ande phuv.

³ Si o vreme te mundare, ta si o vreme te sastare. Si o vreme te zatri, ta si o vreme te lachare.

⁴ Si o vreme te rove, ta si o vreme te asa. Si o vreme te ave zalosno, ta si o vreme te chele.

⁵ Si o vreme te rispi e barra, ta si o vreme te chide e barra. Si o vreme te abrasi, ta si o vreme te na abrasi.

⁶ Si o vreme te rode, ta si o vreme te jasare. Si o vreme te guruve, ta si o vreme te chude.

⁷ Si o vreme te pharrave, ta si o vreme te suve. Si o vreme te ache, ta si o vreme te de orba.

⁸ Si o vreme te voli, ta si o vreme te murzi. Si o vreme te mare tut, ta si o vreme te avel pas.

⁹ ¿So dobil o manus kai gachin radil?

¹⁰ Dikhlem o rado kai o Del mukla e manusenge te cheren.

¹¹ Sa cherda sukar ande po vreme ta dia len o mislo katar so si ostade, a o manus ni acharel so cherda o Del sar kana llelo angle leko rado llik kai o son.

¹² Me llanav kai e ezgoda mai sukar kai sai cherel o manus si te veselilpe ta te cherel o lachipe ande po zivoto,

¹³ soke te ja ta te pia ta te dikha o lachipe kai del amen amaro rado, gua si soke o Del dia le amenge.

¹⁴ Ta llanav kai sa so cherel o Del ka avel ostade, ta pe gua ni ka thodol niso ios, ta ni ka ikandol niso letar, ta goia ezgoda cherel la o Del, te sai den le liubao e manusa.

¹⁵ So saia omanglal akana si, ta so si te avel, omanglal saia. O Del cherel te avel pale so saia omanglal.

O bangipe pe gava zivoto

¹⁶ Ios ezgode dikhlem pe gava zivoto, kote kai saia te avel e kris si o bangipe, a kote kai saia te avel o chachipe si o bilachipe.

¹⁷ Goleke phenav kai o Del ka krisil e lache ta i e bilache, soke si iek vreme suako ezgodake kai mange, ta suako ezgodake kai chere.

¹⁸ Ta i phenav kai e ezgode kai cheren e manusa, si te sai zumavel len o Del, ta te dikhen kai von si sargo e zivirinie.

¹⁹ Soke so nakhen e manusa nakhen le i e zivirinie, gia sar meren e manusa isto gia meren e zivirinie, inai mai but o manus neko e zivirinia, soke sa ni mol le niso.

²⁰ Ta sa resel kai iek than, sa si cherdo katar o prajo ta sa ka irilpe kai o prajo.

²¹ ¿Ko sai phenel kai o duo e manusengo llaltar upre, ta kai o duo katar e zivirinie fuliel chak tele ande phuv?

²² Me llanav kai e mai lachi ezgode e manuseke si te veselilpe ande po rado, soke gua si leko chari, soke ¿ko ka sikavel leke so ka avel mapalal letar?