Eklesiastes 2 - Biblia ande chib Romani

¹ Ta i phendem me mange: Akana ka zumavav me man ande veselia, ka ziviu ando sukaripe ta ando lachipe. ¡A i goia ezgoda ni mol la niso!

² Ta sikilem kai o asape diliarel, ta kai e dragostia ni mol la niso.

³ Bizaimaia zumadem me snaga e moliaia, cherdem e mai dile ezgode, a llanava so cherava. Mangava te llanav so si mai preche e manusenge kai zivin pe gaia phuv.

⁴ Cherdem bare ezgode, cherdem bare chera, thodem te barion e draka,

⁵ cherdem vostanura ta thodem te bariol e char ta e lulunlla, ta kote thodem te barion kasta katar suako septelia.

⁶ Cherdem zidura te achadon e paia te sai chudav pe kasta.

⁷ Chindem sluge diskinie ta murusa, ta lenge minone biandile ande mo cher.

⁸ Chidiem rup ta sunakai, ta barvalipe katar e charura katar e phuvia. Sea man llene ta llea kai llilabena mange, ta dena man e dragostia kai den e manusa, ta saia man suako ezgoda kai basaldol.

⁹ Sema iek lleno glamno ta avila man mai but neko nisavo lleno kai saia omanglal ando Jerusalem. Ta ni jasardem o bizaipe.

¹⁰ Sogo zeliva avila man, ta sea man samo dragostie, soke pe mo rado cherdem sa gola ezgode, ta gua si o chari kai liem ande mo zivoto.

¹¹ Ta sa e ezgode kai cherdem, ta sa o rado kai die man te cherav len, dikhlem kai ni mol len niso ta dukhaven o zivoto, ta ni den nisavo chari pe gaia phuv.

¹² Ta thodem te misliu man ando bizaipe, ando dilipe ta e ezgode dile. ¿So ka cherel o lleno kai ka thovelpe po than e charoko? ¿Ni ka cherel itso so cherde aver lleno omanglal?

¹³ Ta dikhlem kai o bizaipe si mai preche neko o dilipe, ta o villelo mai preche neko o truniariko.

¹⁴ O lleno bizai llanel te dikhel, a o dilo llal ando truniariko, ta i sikilem kai saurren aduricharel iek ezgoda.

¹⁵ Ondaka phendem me mange: So ka nakhel o dilo ka nakhav le i me, te si gia, samo gia sikilem gachin bizaipe. ¡I goia ezgoda ni mol la niso!

¹⁶ Soke ni ka denpe golli katar o bizai ni katar o dilo, soke mai angle sa ka aven bristarde, ta ka merel o bizai ta i o dilo.

¹⁷ Goleke murzisardem po zivoto, soke sogo cherdol pe gaia phuv del but rado, ta ni mol le niso, ta dukhavel o zivoto.

¹⁸ Murzisardem pe sa o rado kai cherdem pe gava zivoto, ta ka mukav le kai aver lleno kai ka avel mapalal mandar.

¹⁹ A te avela bizai o dilo o lleno kai ka gazdaril pe sa so radisardem ta trudisailem pe gaia phuv, i gaia ezgoda ni mol la niso.

²⁰ Ta jasardem a vlaga pala sa e ezgode kai cherdem ta sa so radisardem me bizaimaia pe gaia phuv.

²¹ Te radil o manus bizaimaia ta llanglimaia ta chachimaia, ta te mukel le sa kai iek lleno kai ni radisarda nikada pe goia ezgoda, i gua ni mol le niso ta si iek baro bilachipe.

²² ¿So lel o manus katar sa so radil ta trudilpe pe gaia phuv?

²³ Soke sa leko zivoto si dukhado, ta leko rado si duk. Ni orachaia nasti lel peke zor. I gaia ezgoda ni mol la niso.

²⁴ O mai sukaripe e manuseke si te jal ta te piel, ta te veselilpe leko zivoto ande leko rado. Ta dikhlem kai gaia ezgoda del la o Del.

²⁵ ¿Soke ko jal ta piel te na avela e Devletar?

²⁶ Soke o lleno kai si drago e Devleke o Del del le bizaipe, llanglipe ta dragostia, a e bilache del le o rado te chidel ande iek than e lleneke kai si drago e Devleke. Ta i gua ni mol le niso ta dukhavel o zivoto.