Eklesiastes 12 - Biblia ande chib Romani

¹ De tut golli ande cho ternipe katar o Del kai cherda tut mai anglal te aven e llivesa bilache, ta e bursa kai ka phene: Inai man veselia ande gala bursa,

² mai anglal te cherdol truniariko o kham ta o villelo, ta o chon ta e cheraia, ta te achel o bursin, ta te llantar e oblakura.

³ Kana ka izdran e boñikura kai arakhen o cher, ta kana ka bangon e llene tromane, kana ka achen but cherricha thana kai ka moren e kuchorra, ta ka korraon e llene kai dikhen katar e penllerave.

⁴ Kana ka avel gua llive ka phanglion e udara kai liken avri po drom, ka basen ios mai poloke e thana kai moren e kuchorra, ka usten kana ka llilaben e chiriklia, ta sa e chea katar o llilabipe ka aven zatrime,

⁵ kana ka ave upre ka dara te dikhe tele ta ka avel dar pe droma, ta ka liken e lulunlla po almendro, ta e langosta ka avel iek pharipe ta ka jasaol e bok. Soke o manus llal kai po than ostade, ta pe droma ka asundon e llene kai roven pala leko meripe.

⁶ De tut golli akana katar o Del kai cherda tut, mai anglal te chindol o lancho rupuno ta te phagol e kavi sunakuni, ta te phagol e piri pasa o lelleno, ta te phagol o tochko upral po bunari,

⁷ ta o prajo irilpe kai e phuv gia sar saia, ta o duo irilpe kai o Del kai dia le.

⁸ ¡Ni mol niso! ¡Ni mol niso! Gia phenel o lleno kai sikavel: ¡Sa ni mol le niso!

⁹ So mai bizai saia o lleno kai sikavel, ios mai but bizaipe sikada e foro, ta cherda te asunen, ta cherda te roden, ta pisisarda but bizai alava.

¹⁰ O lleno kai sikavel rodia e sukar alava, ta te pisil chachimaia e alava chache.

¹¹ E alava e bizaienge si sargo suvia, ta sargo chile marde ande phuv, kai phenel len iek chobano.

¹² Ta so sikolpe lendar chaurrea, si sar te chere e ezgode mai angle. Inai le son te chere but lila, ta chiniarel kana thove tut te siko but.

¹³ Sa gaia orba kai asundan resel pe gaia ezgoda: De liubao e Devle ta cher so phenen leke zakonura, soke gua si sa e manuseke.

¹⁴ Soke o Del ka anel pe kris suako ezgoda kai cherdol, avela lachi o avela bilachi.