Eklesiastes 11 - Biblia ande chib Romani

¹ Chude cho marrno ando pai, soke ka nakhen but llivesa ta ka malave le.

² Fulav efta ta i ojto llenenchar, soke ni llane so ka avelpe pe phuv.

³ Te si e oblakura pherde pai ka delpeke upral pe phuv, a te perel o kas karing o sur, o karing o norte, kote kai ka perel kote ka achel.

⁴ Ko dikhel pe balav ni thovel a simicha, ta ko dikhel pe oblakura ni chidel.

⁵ Gia sar ni llane kai llal e balav, o sar bariol o minono ande pe dako lli, isto gia ni llane sar radil o Del kai cherel sa e ezgode.

⁶ Thiarinako thov ande phuv chi simicha ta i pasa e riat, soke ni llane savi katar e dui ka likel mai lachi, o e dui ka liken lache.

⁷ Sukar si te dikhe o villelo e khameko,

⁸ a i te zivila o manus but burs, ta i te avel le but dragostia ande gola bursa, de tut golli kai ka aven but llivesa ando truniariko, ta kai sogo ka avel mai angle ni mol le niso.

O sikadipe e ternenge

⁹ Veselisao ternea ande cho ternipe, ta te avel tut dragostia kana ka bario, cher so phenel chuke cho lio ta so dikhen che akha, a de tut golli kai pe sa gala ezgode ka krisil tut o Del.

¹⁰ Goleke chude tutar e joli kai si ande cho lio ta duriar katar chi esnaga o bilachipe. Soke i o ternipe ni mol le niso.