Eklesiastes 10 - Biblia ande chib Romani

¹ Iek mak muli cherel te khandel gado o lacho meriso, isto gia si iek minono dilipe katar iek lleno kai si asundo kai si bizai.

² O lleno bizai cherel o lachipe, a o lleno dilo cherel o bilachipe.

³ O dilo i kana phirel cherel le dilimaia, ta phenel saurrenge kai si dilo.

⁴ Te joliaola pe tute o charo, terpisar, soke o lleno esmiro achavel e joli.

⁵ Iek ezgoda bilachi dikhlem pe gaia phuv, kai si sargo iek bangipe kai cherel o charo,

⁶ kai o dilipe si thodo pe iek than but upre, ta e barvale besen pe iek than kai si tele.

⁷ Dikhlem sluge kai llan pe gra, ta charura kai llana peske sargo sluge.

⁸ Ko anavel ande phuv ka perel endre ando anadipe. Ko phagel iek zido ka dandarel le iek sap.

⁹ Ko phagel e barra ka dukhavelpe lenchar, ko phagel e kasta sai chinelpe lenchar.

¹⁰ Te jasarela o tover po ostrope, si te chere mai but zor, Goleke mai lache si te cherdon e ezgode orta ta bizaimaia.

¹¹ Ni trubul nisoke o lleno kai cherel e sape te chelel te dandarela le o sap mai anglal.

¹² E orba kai del o bizai si pherde dragostia, a e orba e dileki anen isto leke e zatrania,

¹³ leki orba llal angle dilimaia ta getol pi orba ando dilipe.

¹⁴ O dilo del but orbe, ¿A ko sai phenel so ka avelpe thiara, niko ni llanel so ka avelpe mai angle?

¹⁵ O rado e dilengo chiniarel len, soke ni llanen sar te llan ando foro.

¹⁶ ¡Tesko e phuviake kai lako charo si ternorro, ta kana leke sudura jan ta pien thiarinako!

¹⁷ ¡Blagosime e phuv kai si la iek charo glamno, ta kai leke sudura jan kana trubul te jan te len peke zor a na te pien mol ta te maton!

¹⁸ Pala o lenope o cher phagol upral, ta pala e va khuvde o cher thavdel.

¹⁹ Pala e dragostia cherdol iek jape, ta e mol veselil e manusen, a e lovenchar cherdol suako ezgoda.

²⁰ Ni ande che mislura na de orba bilachi katar o charo, na de orba katar o barvalo ni kana san korkorre ande chi soba, soke e chirikliorra furian ta sai phenen le leke.