Eklesiastes 1 - Biblia ande chib Romani

Sa e ezgode ni mol len niso

¹ Gala si e alava katar o lleno kai sikavel, chavo katar o David charo ando Jerusalem.

² Gia phenel o lleno kai sikavel: ¡Ni mol niso! ¡Sa ni mol le niso ta jasaol!

³ ¿So dobil o manus kai gachin radil pe gaia phuv, ta trudilpe telel katar o kham?

⁴ Nesave biandon, a aver meren, a e phuv achel isto gia.

⁵ O kham likel ta o kham perel, ta sigarel te likel pale.

⁶ E balav phurdel karing o sur ta boldel katar o norte llal ta avel, ta pale boldel.

⁷ Sa o pai llal kai e mora, a e mora ni pherdol, o pai irilpe pale kote katar likisto ta pale llal isto kotar katar nakho.

⁸ Niko nasti phenel gachin chiniaren gala ezgode, nikada ni chinion e akha te dikhen ni e kan te asunen.

⁹ So avilape si isto so ka avel, ta so saia cherdo si isto so ka cherdol, ¡niso inai nevo pe phuv!

¹⁰ ¿Sai phenel amenge vareko: Gaia ezgoda si nevi? Nasti, soke goia ezgoda cherel but burs kai saia pe gaia phuv.

¹¹ Bristarde si e ezgode kai nakhle ta i e ezgode kai si te aven ka bristaren len gola kai ka aven mapalal.

So nakhel o lleno kai sikavel

¹² Me, o lleno kai sikavel, sema charo katar o Israel ando Jerusalem,

¹³ ta thodem sa mo bizaipe te prezou ta te sikivav katar sogo cherdol pe gaia phuv. Gava rado dia le o Del e manusenge, te sai thoven leke sama.

¹⁴ Dikhlen sa so cherdol pe phuv, ta sa ni mol le niso ta dukhavel o zivoto.

¹⁵ So si bango nasti ortolpe, ta so inai pherdo nasti llindol.

¹⁶ Me phendem me mange: Gia glamno sem ta gia barilem ando bizaipe. Me sem mai bizai neko sa ogola charura kai sea omanglal ando Jerusalem, ta sem but bizai ta llanglo.

¹⁷ Ta thodem man te pinllarav o bizaipe, ta te llanav so si o dilipe, ta sikilem kai i gala ezgode dukhaven o zivoto.

¹⁸ Soke so mai but sikol o manus, ios mai but inai leke drago so sikol, ta ko lel mai but bizaipe, lel mai but duk.