Efesios 5 - Biblia ande chib Romani

¹ Tumen sen chave e Devleke ta vou volil tumen, goleke morabi te aven prema lete.

² Morabi te volin saurren isto gia sar o Kristo volisarda amen ta diape pala amende te merel, sargo so si dino, sargo kurbano kai khandel sukar e Devleke.

³ Tumen morabi te zivin sargo llene katar o foro santo, goleke morabi te na den orba katar o kurvaluko, ni katar nisavi ezgoda pogani, ni katar e llia e lovengi.

⁴ Na phenen pogane alava, ni alava bilache, ni orbe dile, soke gala ezgode inai lache tumenge, mai sukar si te blagosin e Devle.

⁵ Tumen llanen gaia ezgoda kai kogo cherel kurvaluko, o cherel ezgode pogane, o mukela te inllarel le e llia e lovengi, kai si sargo kana vou blagosil avere delen, kogo cherela gala ezgode nasti avel le iek than ande charoina e Kristoki ta e Devleki.

Zivin ando villelo e Kristoko

⁶ Niko te na kojavel tumen alavenchar kai si chuche, soke isto pala gala ezgode o Del dukhavel gole llenen kai ni kanden le.

⁷ Goleke, te na avel tumen ni iek posla lenchar.

⁸ Tumen omanglal zivina ando truniariko, a akana kai sen e Gazdake zivin ando villelo, goleke morabi te zivin sargo llene kai si e villeloke,

⁹ soke o Duo del suako ezgoda lachi, del volipe, iek zivoto orta, ta o chachipe.

¹⁰ Goleke mislin tumen so si drago e Gazdake.

¹¹ Na thoven tumen ande iek than e llenenchar kai cheren o bilachipe ta kai si katar o truniariko; mai sukar thoven o truniariko ando villelo.

¹² Soke lallao si i te da orba katar e ezgode kai von cheren po chorial.

¹³ A kana sa e ezgode sikadon po villelo, o villelo cherel te dikhol suako ezgoda.

¹⁴ Goleke iek lleno pisisarda gia: Llungado tu kai sove, uste katar o meripe, ta o Kristo ka thovel pe tu po villelo.

¹⁵ Goleke, arakhen tumen ta na zivin dilimaia, soke sar morabi te zivin si bizaimaia.

¹⁶ Thoven sama so cheren, soke gala llivesa si bilache.

¹⁷ Na cheren e ezgode dilimaia, morabi te acharen savi si e volia e Gazdaki.

¹⁸ Na maton, soke e mol inllarel kai o bilachipe. Mai sukar pherdon katar o Santo Duo.

¹⁹ Kana ka chidiniaon, llilaben salmura ta llilia duoke, llilaben ta blagosin sa tumare liea e Gazda.

²⁰ Den fala suako llive e Devle ta Dad pala suako ezgoda ando anav katar amaro Gazda o Jesukristo.

Sar morabi te zivin e llene kai pachan ando Kristo maskar pi familia

²¹ Den liubao iek avere, cheren le pala o Jesukristo.

²² E rromia morabi te den liubao pe rromen sargo e Gazda.

²³ Soke o rrom si o soro e rromiako, gia sar o Kristo si o soro e khanllirako ta e khanlliri si leki esnaga ta vou si lako Braduimari.

²⁴ Gia sar e khanlliri del liubao e Kristo, isto gia e rromia morabi te den liubao pe rromen pe suako ezgoda.

²⁵ Romalen, volin tumare rromien gia sar o Kristo volisarda e khanllira ta dia po zivoto pala la.

²⁶ Ta kana jalada la ando pai ta ande alava, chistosarda la ta cherda la santa.

²⁷ Te sai sikavel isto vou peke iek khanlliri sukar, te na avel makhli ni gorchome ta te na avel la ni iek katar gala ezgode te avel santa ta bi dosaki.

²⁸ Isto gia e llene kai si zinime morabi te volin pe rromien sargo pe esnaga. Ko volil pe rromia volil isto vou pe.

²⁹ Soke niko ni murzin pe pi esnaga, volil la ta del la te jal ta arakhel la, isto gia si sar cherel o Kristo e khanlliraia,

³⁰ soke voi si leki esnaga ta amen sam katar goia esnaga.

³¹ Gia phenel so si pisime: Goleke, o manus ka mukel pe dade ta pe da, te sai avel ande iek than pe rromiaia, ta e dui ka aven sargo iek mas.

³² Kate sikadol gia baro si so mangela te cherel o Del, a gala ezgode sea gurudine, ta phende si cheres o Kristo ta e khanlliri.

³³ Goleke suako lleno tumendar morabi te volil pe rromia sargo isto vou pe, ta suako rromi morabi te del liubao pe rrome.