Efesios 3 - Biblia ande chib Romani

E buchi e Pabloki ande khanlliri

¹ Goleke, me o Pablo sem phanglo cheres o Jesukristo pala tumende kai ni sen judiura.

² Soke tumen llanen kai o Del thoda man te phenav tumenge so vou ande po baro volipe lacharda tumenge.

³ Soke o Del sikada mange so saia gurudino katar so vou mangela te cherel, gia sar pisisardem tumenge ande nesave alava.

⁴ Goleke kana ka chitin ka acharen kai llanav sar o Del cherda gaia buchi ando Jesukristo,

⁵ kai ni dia te llangliolpe nikake omanglal, ta kai akana pe duoia sikada e santone apostolenge ta i e profetonenge.

⁶ So mangela te cherel ta saia gurudino si gava: kai katar e lachi viasta o Del ikharel sa e manusen kai si pe phuv te cherdon iek esnaga ta te len iek braduipe ando Jesukristo, gia sar phenda kai ka del kana dia po alav.

⁷ Ta mo rado si te inllarav gaia lachi viasta pala o volipe kai o Del avila leke mandar, ta gia sikada pi bari zor.

⁸ Me sem o mai minono katar sa e minone katar o foro e Devleko; ta vou dia man gaia dragostia te phenav e judionenge e lachi viasta katar o baro barvalipe e Kristoko kai nasti llindolpe.

⁹ Ta o Del kai cherda o miloso, thoda man te sikavav saurren sar ka cherdon gala ezgode kai phenda o Del ta kai sea gurudini bute bursenchar.

¹⁰ Goleke akana pala e khanlliri, sa gola kai si len zor ta gazdarin ando miloso sai ka pinllaren o bizaipe e Devleko, kai sikadol bute ezgodenchar.

¹¹ O Del cherda gava gia sar mangela vou te cherel le mai anglal, ta kai cherda le ando Jesukristo amaro Gazda.

¹² Ta ando Kristo likistam katar o phandipe te sai resa pasa o Del bi darako cheres o pachape kai si amen ande lete.

¹³ Goleke mangav tumendar te na jasaren tumari zor cheres e ezgode kai nakhav pala tumende, soke gala ezgode si pala tumaro baripe.

Gua volipe kai si mai baro neko sa so sai pinllara

¹⁴ Goleke pala gava thovav man changenchar angla o Del o Dad,

¹⁵ katar lel po anav suako familia kai si ando miloso ta i gola kai si pe phuv.

¹⁶ Mangav e Devletar te del tumen katar pi bari zor te aven zurale ando Duo e Devleko,

¹⁷ ta o Kristo te zivil ande tumare lie, ando pachape, ta o volipe, te cherel tumen te zivin samo leke.

¹⁸ Ta gia te sai llanen tumen ta i o foro santo gia baro si o volipe e Kristoko.

¹⁹ Mangav e Devletar te pinllaren gua volipe, kai si mai baro neko sa so sai pinllara, ta gia te sai len tumen sa so mangel te del tumen o Del.

²⁰ Te avel blagosime o Del kai sai cherel ios mai but neko so amen manga o misli amen, fala leke soke leki zor radil ande amende.

²¹ Blagosime te avel o Del ande khanlliri ta ando Jesukristo sa e bursenchar ta ostade. Gia te avelpe.