Efesios 2 - Biblia ande chib Romani

O Del braduisarda amen ando Kristo

¹ Vou dia tumen zivoto kana tumen sena mule ande tumaro bilachipe,

² kana tumen zivina prema o zivoto gale suetoko ta cherena so phenela tumenge gua duo kai gazdaril pe balav ta radil e llenenchar kai ni kanden e Devle.

³ Ta isto gia zivia sa amen omanglal kana llaia pala o kurvaluko ta cheraia so mangela amendar amari esnaga ta amare mislura bilache. Ta cheres gola ezgode o Del saia te del amen iek bari duk, gia sar saia te del la saurrenge.

⁴ A o Del avila leke gia bari zalba ta volisarda amen pe gachin,

⁵ kai dia amen zivoto ande iek than e Kristoia kana sama mule cheres amaro bilachipe. Pala o volipe e Devleko tumen lien o braduipe.

⁶ Ta ande iek than e Jesukristoia vazdia amen katar o meripe, ta cherda amen te besa lea ando miloso.

⁷ Gala ezgode cherda len te sai sikavel po volipe ando vreme kai ka avel mai angle ta kai si posteno amenchar ando Kristo Jesus.

⁸ Soke pala o volipe e Devleko tumen lien o braduipe cheres o pachape. Ta gava inai kai tumen dobisarden, soke gaia ezgoda dia la tumenge o Del llabe.

⁹ Inai kai lienla soke cherden vareso, goleke niko nasti falil vou pe katar niso;

¹⁰ Soke o Del si kai cherda amen; vou cherda amen ando Jesukristo te sai chera lache ezgode, ta te phira po drom kai vou lacharda amenge mai anglal.

Saurre sam iek ando Kristo

¹¹ E judiura ikharen tumen gola kai inai sirkunsidime a e judiura kai von sirkunsidin e llenen von pe ikharen e sirkunsidime

¹² den tumen golli kai omanglal tumen sena bi e Kristoia, ta sena fulade katar o foro katar o Israel, ta ni sena ande po alav kana o Del diaia. Tumen zivina ande gaia phuv, bi e Devleko ta bi braduimako.

¹³ A tumen kai sena dur akana sen pase ande iek than e Jesukristoia pala o rat kai vou perada.

¹⁴ O Kristo si amari pas. Vou cherda katar e judiura ta katar gola kai i nai judiura iek foro, vou perada o zido kai fulavela len, ta phagla isto ande pi esnaga e brasnia kai saia.

¹⁵ Vou perada ande po mas o zakono kai sea zakonura kai phenena so saia te cheren, ta isto petar cherda iek nevo manus katar e dui forura ta gia cherda e pas.

¹⁶ Ta cheres po meripe po krusto cherda te lachardon e dui forura e Devlea, ta cherda te aven iek foro te sai zivin ande pas e Devlea.

¹⁷ O Kristo avilo te anel e lachi viasta katar e pas saurrenge, pe gachin tumenge kai sena dur e Devletar, ta i tumenge kai sena pase katar o Del.

¹⁸ Goleke, pala o Kristo e llene kai si judiura, ta e llene kai inai judiura, si amen iek Duo te sai ava pasa o Del kai si o Dad.

¹⁹ Goleke, tumen akana ni sen katar aver phuv, ni sen avri katar tumari phuv, akana sen katar o foro e Devleko ta si tumen so si te avel suakone llene kai si katar e vicha e Devleki.

²⁰ Tumen sen sargo iek cher cherdo pe so sikade e apostolura ta e poraukura, a o barr mai preche katar o cher si isto o Jesukristo.

²¹ Ando Kristo vazdiniaol suako rig katar o cher, lligo ni ka cherdol iek santo cher e Devleko ando Gazda.

²² Soke cheres o Jesukristo i tumen cherdon katar gua cher e Devleko kai ande lete zivil o Del ande po Duo.