Biblia Todo Logo
Bìoball air-loidhne

- Sanasan -

Ebreos 9 - Biblia ande chib Romani


E kurbanura purane

1 E purve alava phenena sar saia te blagosin e Devle ande leki chara kai si pe phuv.

2 Soke goia chara kai vazdinaili saia la lako purvo than kai ikhardol o than santisimo, kote saia o kandelabro ta o stali kai thovena e marrne kai sea chinade e Devleke.

3 Palal pala gua duito chiti saia o than kai ikhardola than santisimo.

4 Kote saia o altar sunakuno kai phabarena o taimano ta o bauli katar e alava kai saia mardo ando sunakai. Ta andre ando bauli saia iek bralli sunakuni kai andre saia o mana, ta ando bauli saia i e rovli e Aaronoki kai dia e lulunlla, ta e dui kotora barrustune katar o zakono.

5 Upral po bauli cherdea dui suechura kai pe phakhenchar ucharena o kapako katar o bauli. A akana ni trubul te da orba katar suako ezgoda kai saia kote.

6 Gia sea thode sa gola ezgode ta e popura dena suako drom ando purvo than e charako te cheren pi buchi ta te blagosin.

7 A po duito than dela samo o mai baro popo, ta samo iek drom ando burs. Ta kana dela, saia te inllarel o rat katar e kurbanura ta te del le cheres pete ta cheres o bilachipe kai cherela o foro ta kai ni acharena le.

8 Galea o Santo Duo cherel amen te llana kai kana saia e chara e Devleki o drom kai inllarel kai o than Santisimo ni saia putardo varekake.

9 Sa gala ezgode cherdile te sai sikaven amen so si mai baro akana, soke so si dino ta e kurbanura kai den e Devleke nasti cheren e manusen te acharenpe bi dosako samo soke cheren gua blagosipe.


O chachuno kurbano

10 Gala ezgode si samo katar o jape ta o pipe ta nesave zakonura e jaladimake, a gala ezgode nasti pharruven amaro zivoto. Gala alava si thodine samo lligo ni ka avel o vreme kai o Del ka pharruvel len.


O nevo kurbano

11 A o Kristo avilo ta akana vou si o mai baro popo, ta fala leke si amen sa gala ezgode. E chara e Devleki kai vou cherel pi buchi popoki, si mai lachi ta mai orta ta inai cherdi e manusendar, goleke goia chara e Devleki inai gale phuviaki.

12 O Kristo dia ande chara e Devleki, na te sikavel o rat katar e busne ta katar e guruva, vou nakhlo isto pire ratea iek drom ta lia amenge o braduipe katar o bilachipe ostade.

13 Istina si kai o rat katar e guruva ta katar e busnia ta o prajo kai achel katar e guruvmi kai phabardol po altar, lelpe ta thodol pe llene kai si pokalime, ta achen sante ta jalaven len avrial.

14 A te si gaia ezgoda gia, ¡Pe gachin mai but ka avel le zor o rat e Kristoko! Soke katar o Duo kai zivil ostade, o Kristo dia isto vou pe kurbano e Devleke bi dosako, ta leko rat jalavel amen ta Del amen pachape kai sam prostime te sai radi e Devleke kai si llundo.


O nevo alav

15 Goleke o Jesukristo cherel te da ande iek neve alava e Devlea. Soke o Jesukristo mulo te sai o Del prostil o bilachipe kai cherde e manusa kana sea pe purve alava, ta vou cherda golen kai o Del ikharda te len o barvalipe ostade soke o Del dialen po alav.

16 Te kanden e alava kai iek lleno mukla, morabi mai anglal te llangliolpe kai gua lleno mulo.

17 Soke nasti kanden e alava kai mukel iek lleno kana gua lleno zivil, samo sai kanden len kana gua lleno si mulo.

18 Goleke i e purve alava sea ratea.

19 O Moises phenda sa e alava e zakonoke sa e foroke, mapalal lia e bal e bakreke makhle ando lolipe ta iek krango katar o isopo, ta makhlalen ando rat e guruvengo ta e busnengo amime e paiea, ta makhla o lil katar o zakono ta i sa e foro.

20 Ondaka phenda lenge: Gava si o rat kai chacharel e alava kai o Del dia tumen.

21 Ta o Moises makhla e ratea i e chara e Devleki ta sa e ezgode kai si e blagosimake.

22 Soke o zakono phenel kai preko sa e ezgode morabi te aven jalade e ratea, ta inai prostipe katar o bilachipe te na chordola o rat.

23 Goleke trubul gola kurbanura te sai jalaven gola ezgode soke cherdelen prema e ezgode kai si ando miloso; ta e ezgode kai si ando miloso trubul len mai lache kurbanura neko gola.

24 Soke o Kristo ni dia ande goia chara e Devleki cherdi e manusendar, kai samo dikhola sargo e chachuni chara, vou dia isto ando miloso, ta kote sikadol angla o Del te sai molilpe cheres amende.

25 Ta ni dia te delpe kurbano but droma, gia sar cherel le o popo suako burs kai del ande chara e Devleki te del iek rat kai inai leko.

26 Te cherdaia isto gia o Kristo, vou saia te merel but droma sar kana o Del cherda e phuv. A o chachipe si kai akana kai si o son katar o vreme, o Kristo avilo iek drom ta ostade ta diape isto vou pe kurbano te sai lel o bilachipe.

27 Isto gia sar sa e manusa morabi te meren iek drom ta mapalal ka avel e kris,

28 isto gia o Kristo diape iek drom te lel o bilachipe katar but llene. Ta mapalal vou ka avel pale, ta ni ka avel le ni iek posla e bilachimaia, vou ka avel te braduil golen kai aduricharen le.

Biblia ande chib Romani © Sociedad Bíblica Chilena, 2018.

Chilean Bible Society
Lean sinn:



Sanasan