Ebreos 8 - Biblia ande chib Romani

E neve alava

¹ E mai bari orba kai da kate si kai gia baro si amaro baro popo, kai beslo ando miloso pe rig e chachi e Devleki ande leki charoina,

² ta sar si popo, cherel pi buchi ande chachuni chara e Devleki kai cherdala o Gazda a na e manusa.

³ Suako mai baro popo si thodo te sikavel e Devleke so si dino ta i e kurbanura, goleke i e Kristo morabi te avel le so te del.

⁴ Te aviloia vou pe phuv ni aviloia popo, soke kate si popura kai sikaven e Devleke so si dino gia sar mangel o zakono e Moiseseko.

⁵ A gala popura sikaven pi buchi ande iek chara e Devleki kai si samo e senke katar so si ando miloso. Ta amen llana kai gola ezgode inai chachune, soke kana o Moises mangela te vazdel e chara e Devleki, o Del phenda leke: Thov sama ta cher la sa prema e chara kai sikadem chuke po burdo.

⁶ A amaro mai baro popo lia iek buchi popoki ios mai lachi, ta cheres lete achilam pe iek orba mai lachi ta adurichara mai lache ezgode.

E orba purani

⁷ Soke te avilaia orta e orba kai achilama omanglal, ni trubusardaia te acha pe iek nevi orba.

⁸ Soke o Del ni malada orta gole llenen, ta phenda: O Gazda phenel: Ka avel o llive kai ka achav pe iek nevi orba e foroia katar o Israel ta i e Judaia.

⁹ Pe gaia orba kai achilen akana ni ka avel sargo o goia orba kai achilema lenge puranenchar, kana istardem len katar o va te ikanav len katar o Ejipto; ta sar von ni kandie mo alav, me muklem len, phenel o Gazda.

¹⁰ Goleke kana ka nakhen gola llivesa ka achav pe gava alav e foroia katar o Israel gaia ka avel e orba phenel o Gazda: Ka thovav me zakonura ande lenge mislura ta ka pisiv len ande lengo lio. Me ka avav lengo Del ta von ka aven mo foro.

¹¹ Ni ka trubul te sikavel iek avere, o iek phlal pe phlale te sai pinllaren e Gazda, soke saurre ka pinllaren man, katar o mai minono ta llik kai o mai baro.

¹² Me ka prostiv lengo bilachipe ta nikada ios ni ka dav man golli katar lengo bilachipe.

¹³ Kana o Del del orba katar iek nevo alav gua si soke o gua alav achilo purano; ta so si purano ta phuriol, leko meripe si pase.