Ebreos 7 - Biblia ande chib Romani

O Jesus popo sargo o Melkisedek

¹ O Melkisedek saia o charo katar o Salem ta popo katar o Del o baro kana o Abraam irilape katar o maripe, kote kai vou dobisardaia e charonen. O Melkisedek avilo lete ta blagosisarda le,

² ondaka o Abraam dia le o diesmo katar sa so dobisardaia. Morabi te thova sama kai o anav Melkisedek si charo katar o chachipe, ta i sikadol sargo o charo katar o Salem, kai i gua anav si o charo katar e pas.

³ A niso ni llangliolpe katar leko dad ta katar leki dei ta ni katar leki vicha, ta ni delpe orba sar biandilo, ni katar leko meripe, ta gia prema o Chavo e Devleko kai si popo ostade.

⁴ Akana, thoven sama gia baro saia gava popo kai isto o Abraam kai si katar amari vicha purani dia le o diesmo katar sa so dobisardaia e charonen.

⁵ Gia sar phenel o zakono e Moiseseko, e popura kai si katar e vicha e Levieki si lenge dino o alav te len katar o foro o diesmo katar sa so dobisaren, ta ni chitilpe o popo te avela isto katar lengi vicha o katar lengi familia, goleke saurre morabi te den o diesmo.

⁶ A o Melkisedek ni saia katar e vicha e Levieki, ta lia o diesmo katar o Abraam ta blagosisarda e Abraame soke o Del diaia po alav leke vicha.

⁷ A chachimaia gua kai blagosil si mai baro neko gua kai lel o blagosipe.

⁸ Pe gava zivoto, e llene kai len o diesmo si manusa kai meren; a ando Pisipe kana del orba katar o Melkisedek del orba sargo katar iek lleno kai zivil llik akana.

⁹ Ta akana sai phena kai e popura kai si katar e vicha e Levieki kai akana len o diesmo, pochinde i von o diesmo e Melkisedeke kana o Abraam pochinda o diesmo leke.

¹⁰ Gava saia soke kana o Melkisedek avilo kai o Abraam, o Abraam inllarela pe pi esnaga pi vicha ta pe chaurren kai ni ios ni biandilea.

E dui popura

¹¹ O foro katar o Israel lia o zakono, gava zakono saia te sai pomozin e popura katar o Levi gole foro te sai avel orta. A sar gola popura nasti cherde le, saia te avel iek popo, na sargo ogola kai avena katar e vicha e Aaronoki, saia te avel sargo e Melkisedeki.

¹² Soke kana pharrudol e vicha e poponengi morabi te pharrudol i o zakono;

¹³ a kana del orba katar amaro Gazda ando Pisipe, phenel kai vou si katar aver vicha ta katar goia vicha ni likisto ni iek popo.

¹⁴ Soke sa llanen kai amaro Gazda avilo katar e vicha e Judaeki, ta o Moises ni phenda niso katar goia vicha kana dia orba katar e popura.

¹⁵ Ta gava si te sai acharen mai sukar kai o nevo popo kai ka avel, si sargo o Melkisedek,

¹⁶ soke vou inai thodo te avel popo prema sar phenel o zakono kai morabi te avel katar iek vicha, vou si thodo soke zivil ostade.

¹⁷ Soke gava si so phenel o Del letar: Tu san popo ostade, sargo o Melkisedek.

¹⁸ Goleke e alava kai sea omanglal akana ni mol len ios soke gola alava sea kovle ta ni blazina,

¹⁹ soke o zakono e Moiseseko ni cherda nika te aven orta. A akana adurichara iek ezgoda mai lachi, goleke ava pasa o Del.

²⁰ Ta o Del dia po alav pala gala ezgode sovlienchar. A ogola popura kana thode len saia bi sovlienchar,

²¹ a kana saia o Gazda kote sea sovlia, soke ando Pisipe phenel: O Gazda jala sovel ta ni ka delpe palpale: Tu san popo ostade.

²² Goleke, o Jesus si o alav kai dia ta cherda amen te acha pe iek nevi orba e Devlea.

²³ Ogola popura sea but soke o meripe ni mukela len te zivin ios;

²⁴ a sar o Jesus ni merel, leki buchi popoki nasti lel la aver.

²⁵ Goleke sai braduil ostade sa e llenen kai aven cheres le pasa o Del, soke o Jesus zivil ostade ta suako drom mangel e Devletar cheres lende.

²⁶ Goleke, o Jesus si o mai baro popo kai trubul amen. Vou si santo, bi dosako ta ni cherda o bilachipe, vou si fulado katar e bilache, ta si thodo mai upre neko o miloso.

²⁷ Vou inai sargo ogola mai bare popura kai morabi te mundaren zivirinie suako llive te del len kurbano, ta mai anglal isto pala lengo bilachipe ta mapalal pala o bilachipe e foroko. O Jesus ni cherda gia, vou dia kurbano iek drom ostade kana dia isto vou pe kurbano.

²⁸ O zakono e Moiseseko thovel te aven e mai bare popura e manusen; a mai anglal saia o zakono ta mapalal katar o zakono o Del jala sovel, ta thovel te avel o mai baro popo pe Chaurre kai si cherdo orta ostade.