Ebreos 6 - Biblia ande chib Romani

¹ Goleke morabi te lla angle lligo ni ka ava bare ta muka pe iek rig e purve ezgode kai sikilam katar o Kristo. Na iri amen pale kai e mai palune ezgode kai phenen te muka o bilachipe, te lla pala o Kristo, te muka o bilachipe kai inllarel kai o meripe, o kai morabi te pacha ando Del,

² o e orba katar o kristope, o e orba katar e va thodine pe manus kai pachan, o e orba cheres sar ka usten katar o meripe e mule, o katar e kris kai si te avel.

³ Gava si so ka chera te mangela o Del.

⁴ Soke gola llene kai lie o villelo ta zumade so del o Del ta lie o Santo Duo,

⁵ ta zumade e lachi viasta e Devleki ta e zor kai ka avel ande nevi phuv,

⁶ te perena pale, nasti andon pale kai o Del, soke isto von pale krustosaren e Devleke Chave ta von cheren saurre te maren letar espurnia.

⁷ Von si sargo e phuv kai piel o pai katar o bursin kai perel pe late: ta del iek lacho lliu e llenen kai radin la, o Del blagosil len;

⁸ a te dela patra ta karrne, ni mol la niso; ta perel pe armaia e Devleke, ta ka phabardon.

⁹ Phlalalen kai voliv tumen, i te daia orba gia tumenchar amen llana kai tumen ni muklen o pachape ta sen po drom katar o braduipe.

¹⁰ Soke o Del si chacho ta ni ka bristarel so tumen cherden, ta o volipe kai sikaden leke kana pomozisarden e llenen katar o foro santo, ta sar llik akana tumen cheren le.

¹¹ Amen manga suako lleno tumendar te llal angle isto gole zoriaia te sai len sa so tumen aduricharen.

¹² Amen ni kama tumen te cherdon lenura, amen manga te sikon katar gola llene kai katar o pachape len o barvalipe kai o Del phenda lenge kai ka len.

O alav ta e sovel

¹³ Kana o Del dia po alav e Abraameke, jala sovel isto pe pete, soke ni saia aver mai baro letar te jal sovel;

¹⁴ ta phenda: Ea, me ka blagosiv tut but ta ka cherav chi vicha te avel but bari.

¹⁵ O Abraam aduricharda esmiro ta lia so o Del phendaia leke kai ka del le.

¹⁶ Kana e manusa jan sovel, cheren le pe vareka mai baro lendar, ta kana den po alav pala vareso sovlienchar, llik kote resel e chingar.

¹⁷ Goleke kana o Del mangla te sikavel bristomaia e llenenge kai saia te len o barvalipe kai vou phendaia lenge, jala lenge sovel kai ka cherel gia sar phendaia lenge kai ka cherel.

¹⁸ A sar o Del ni kojavel, leko alav kai dia ta leke sovel kai jala nasti pharrudon. Katar gala ezgode la zor, soke amen manga te arakhel amen o Del ta pacha kai vou ka del amen so phenda.

¹⁹ Gava so adurichara cherel amen te ava zurale sargo iek ankla katar e llimia kai cherel la te achel pe iek than ta te na miskolpe. Gava so adurichara si so nakhlo pe ogoia rig katar o chiti ando Cher e Devleko kai si ando miloso.

²⁰ Kote kai nakhlo o Jesus te sai putarel amenge o drom, ta gia avilo vou te cherdol o mai baro popo ostade isto sar saia o Melkisedek.