Ebreos 2 - Biblia ande chib Romani

Gia baro braduipe

¹ Goleke morabi te thova mai but sama e alavenge kai asundam katar o braduipe te na duriva katar o drom e Devleko.

² A e orba kai phende e suechura kai o Del bichalda saia zurali sargo zakono, ta gola kai cherde o bilachipe ta ni kandie gola alava lie e duk prema e ezgode kai cherde.

³ ¿A sar ka nasa amen te na thodam sama katar gava braduipe kai si gia baro?

⁴ Ta o Del sikada amenge ande sa e bare ezgode Devlikane kai so phenda si chachipe ta dia o Santo Duo kai e llene kai vou mangla.

O Jesus braduil amen

⁵ A o Del ni thoda e suechonen te gazdarin pe phuv kai amen phena kai ka zivi mai angle.

⁶ Soke ando Pisipe phenel gia: ¿So si o manus? ¿Soke de tut golli leke ta brigi tut cheres lete?

⁷ Cherdan le cherricha mai minono neko e suechura, dian le iek korona barimaki ta liubaoki, ta cherdan te gazdaril pe sa e ezgode kai cherdan.

⁸ Goleke, sar cherda le te gazdaril pe sa so cherda, o Del ni mukla niso te na achel avri katar leko gazdaripe. A amen ni dikhlam te gazdaril pe sa e ezgode.

⁹ A akana dikha e Jesuse kai o Del cherda le cherricha mai minono neko e suechura samo cherricha vreme, kai si le e korona barimaki ta vou gazdaril pala o meripe kai nakhla. Ta o Del ande po volipe, mangla te llanel o Jesus so si o meripe pala o lachipe saurrengo:

¹⁰ Pala o Del si sa ezgode cherde ta sa ezgode si leke, soke o Del mangel sa leke chaurre te avel len iek than ande leko baripe. Goleke ande patnia saia te cherel e Jesuse chacho pala o lachipe saurrengo.

¹¹ Soke sa gola kai volin ta kanden e Devle si leke chave. Goleke o Chavo e Devleko ni lallal te ikharel len phlal,

¹² kana phenda ando Pisipe: Ka dav orba chiri me phlalenge, ta ka llilabau chuke llilia Devlikane ando cher e Devleko.

¹³ Ta i phenel gia: ka avel man vera ande lete. Ta pale phenel: Kate sem e chaurrenchar kai o Del dia man.

¹⁴ Gia, sar iek vicha si katar iek mas ta katar iek rat manuseko, isto gia o Jesus cherdilo mas ta rat manuseko, ta gia te sai dobil pe merimaia gole kai saia le e zor te sai mundarel, gava si o llavolo.

¹⁵ Ta pe merimaia mukliarda len katar o phandipe sa golen kai pala e dar katar o meripe zivin sargo esluge sa po zivoto.

¹⁶ Soke chachimaia o Jesus ni avilo te pomozil e suechonen, vou avilo te pomozil e Abraameki vicha.

¹⁷ Ta te sai pomozil len saia te cherdol sargo von. Goleke soke cherdilo sargo amen, sai cherdilo o mai baro popo kai ande lete sai avel e manuse vera, soke si pherdo volipe te radil e Devleke, ta pala leko meripe cherda o Del te prostil amen katar amaro bilachipe.

¹⁸ Ta sar isto vou nakhla goia duk ta o llavolo zumavela le te sai cherel le te perel ando bilachipe, akana kana o llavolo zumavel amen, o Jesus sai pomozil saurren.