Ebreos 13 - Biblia ande chib Romani

¹ Na muken te jasaol o volipe kai si maskar tumende.

² Na bristaren tumen te aven pachivale e llenenchar kai aven ande tumare chera, soke but droma nesave llene kai si pachivale ni thode sama kai sea suechura gola kai soute lende.

³ Den tumen golli katar e llene kai si phangle ande rubie, sargo kana i tumen sen phangle lenchar. Mislin tumen ande llene kai marde len, sargo kana isto tumen sen mardine.

⁴ E llene kai si zinime morabi te den liubao iek avere pe suako ezgoda ta morabi te aven chache iek averea, soke o Del ka dukhavel gole llenen kai kurvinpe ta kai inai chache kana zininpe.

⁵ Na zivin brigime katar e love, morabi te aven vesele e ezgodenchar kai si tumen, soke o Del phenda: Nikada ni ka mukau tut korkorre.

⁶ Goleke sai phena pachamaia: O Gazda si kai pomozil man; ni ka darav. ¿So sai cherela mange o manus?

⁷ Den tumen golli katar tumare chobanura kai die tumenge e orba e Devleki; mislin tumen sar zivisarde ta tumen zivin prema lengo pachape.

⁸ O Jesukristo si isto gua arachi, allive ta sa e bursenchar.

⁹ Na muken te inllaren tumen pe aver sikadipe kai inai pinllardo. Mai sukar si amare lie te len zor katar o volipe a na katar e alava kai phenen katar o jape kai nikada ni avila lenge lache golenge kai brigisaile katar gala e ezgode.

¹⁰ Amen si iek altar, kai letar nasti jan e popura kai cherena buchi ande chara e Devleki.

¹¹ Soke o mai baro popo thovel o rat katar e zivirinie ande chara e Devleki pala o prostipe katar o bilachipe, a e esnage gole zivirinienge phabardon avri katar o pero.

¹² Isto gia o Jesus nakhla patnia ta mulo avri katar o foro, ta gia pala leko rat o Del te prostil pe foro.

¹³ Goleke morabi te lla e Jesusea avri katar o pero, ta te nakha isto gua lallao kai vou nakhla kana kafrosarde le po krusto.

¹⁴ Soke ande gava sueto inai amen iek foro te achel ostade, goleke lla te roda o foro kai si te avel.

¹⁵ Goleke ando Jesukristo morabi te blagosi e Devle suako llive. Gava blagosipe si o kurbano kai morabi te da. Goleke ¡Blagosi le amare alavenchar!

¹⁶ Na bristaren tumen te cheren o lachipe ta te pomozin averen soke gala si e kurbanura kai si drago e Devleke.

¹⁷ Kanden tumare chobanonen, soke von arakhen tumen ta ni chinion soke llanen kai o Del ka puchel len cheres tumende. Na phariaven lengo rado, cheren te avel lenge drago ta pomozin len, ta gia lengo rado ka blazil tumenge.

¹⁸ Molintumen pala amende, soke llana kai o Del ni dosarel amen katar niso, soke manga te chera sa e ezgode sukar.

¹⁹ Ta so mai mangav tumendar si te molintumen te sai o Del mukel man oma te avav tumenchar.

O blagosipe ta o salami

²⁰ O Del katar e pas kai vazdia katar o meripe amare Gazda e Jesukristo, o Baro Chobano e bakrengo, kai pe ratea achilo pe orba ostade,

²¹ goleke mangav te cherel tumen lache pe suako ezgoda, te sai cheren leki volia.

²² Phlalalen pisiv tumenge gala nesave alava te sai dav tumen zor.

²³ Mangav phenav tumenge kai amaro phlal o Timoteo akana inai phanglo, mukle le. Ta te avilo oma mande ka inllarav le manchar kana ka llav te dikhav tumen.

²⁴ Den salami sa tumare chobanonen ta e llenen kai si katar o foro santo. E llene katar e Italia bichalen tumenge salami.

²⁵ O Del te thovel pe sa tumende po volipe.