Ebreos 12 - Biblia ande chib Romani

Thode amare akha po Jesus

¹ Goleke amen sar si truial amendar pe gachin llene kai sikade po pachape, muka pe iek rig sa so achavel amen ta o bilachipe kai phariavel amen, ta prasta zoriaia po drom kai si amen angle.

² Morabi te dikha po Jesus, soke letar avel amaro pachape ta vou si kai bariarel le. O Jesus terpisarda o krusto, ta ni thoda sama po lallao katar gua meripe, soke llanela kai pala e patnia ka avel le e dragostia ta e veselia. Ta beslo pe rig e chachi e Devleki ande leki charoina.

³ Goleke mislin tumen so sai sikon katar o Jesus kai jala gia bari patnia katar e bilache llene. Goleke na chinion ta na triston tumen.

⁴ Soke tumen ni ios ni terpin o bilachipe llik kai o meripe,

⁵ tumen bristrailen so phenel tumenge o Del sargo pe chaurrenge. Gia phenel ando Pisipe: Thou sama, bre chaurrea kana o Del sikavel tut, ta na tristosao kana vou del pe tute.

⁶ Soke o Del sikavel gole kai vou volil, ta del pe gua lleno kai lel le sargo pe chaurre.

⁷ A tumen te nakhen patnia akana, gua si soke o Del volil tumen ta mangel te sikavel tumen sargo chaurren. ¿A si varesavo chaurro kai leko dad ni sikavel le?

⁸ A o Del te na sikavel tumen gia sar sikavel sa pe chaurren, a te avelpe gia, tumen ni avilena chachimaia leke chaurre.

⁹ Kana sama minone, amare dada kate pe phuv sikavena amen, ta amen daia len liubao. Goleke, ios mai but morabi te kanda amare Devle kai si amaro Dad, kai si ando miloso te sai la o zivoto.

¹⁰ Amare dada kate pe phuv sikavena amen pe gava zivoto kai si le cherricha vreme, soke von mislinape kai gua saia mai lache te cheren, a o Del sikavel amen pe amaro chachuno lachipe te sai cherel amen sante sargo vou.

¹¹ Chachimaia, kana den pe amende ondaka inai amenge drago soke dukhal amen; a amen te sikilam, mapalal del amen iek zivoto kai si le pas ta chachipe.

¹² Goleke, zuriaven tumare chinie va ta i tumare changa kovle,

¹³ ta roden o drom orta te prasten, te sai sastol o porrno bango ta te na bangol ios.

Inllaren iek zivoto chacho

¹⁴ Roden e pas saurrenchar ta e santidad, soke bi golea niko ni ka dikhel e Gazda.

¹⁵ Na muken nika te duriol katar o volipe e Devleko, ta na muken nika te achavel averen maskar tumende, soke gua sai dukhavel tumen ta sai mundarel tumen sargo iek drab kai mundarel.

¹⁶ Niko tumendar te na cherel o kurvaluko, ta te na mukel pe iek rig e Devle sargo o Esau, kai pala iek jape bichinda so saia te avel leko, soke vou saia o chavo mai purano.

¹⁷ Ta tumen llanen kai mapalal kana mangla te lel o blagosipe pe dadeko leko dad ni kamla. O Esau rovda but, a goia ezgoda nasti lachardola.

¹⁸ Soke tumen ni avilen pasa iek burdo sargo e israelitura, kai sai istardola ta sai dikhola, ta kote saia iag o truniariko e tufina ta iek bari balav;

¹⁹ ta ni asunden sar basela e tuturuga ni o avazi e Devleko. A gola kai asunde gua avazi molisaile te na del orba ios lenchar,

²⁰ soke nasti terpina so phenela lenge te cheren, phenela gia: Kogo thovela po porrno po burdo morabi te mundaren le e barrenchar o e jarnienchar avela manus o zivirinia.

²¹ Gia darano saia so dikhola, kai isto o Moises phenda: Izdrav daratar.

²² A tumen avilen kai o burdo katar o Sion, ta kai o foro katar o Del o llundo, o Jerusalem kai si ando miloso, kote si but milie suechura kai blagosin e Devle,

²³ ta i e purve chaurre e Devleke kai si pisime ando miloso. Avile pasa o Del, o Del kai ka chinel e kris saurrenge, ta kai cherel e duura e manusenge te aven orta,

²⁴ avile pasa o Jesus, ta den tumen golli kai cheres lete achilam pe iek neve alava soke pala o rat e Jesuseko kai perada kana mulo sam prostime katar amaro bilachipe, ta leko rat si mai lacho neko e Abeleko.

²⁵ Goleke arakhen tumen ta thoven sama goleke kai del pe tumende. Soke gola kai ni thode sama goleke kai dela pe lende kate pe phuv, nasti nasle. A sar ka nasa amen te diam e zea gole kai del pe amende katar o miloso.

²⁶ Ande gua vreme, o avazi e Devleko cherda te izdral e phuv, a akana phenel: Iek drom ios ka cherav te dermolpe e phuv, ta na samo e phuv na samo e phuv, i o miloso.

²⁷ Ta kana phenda: Iek drom ios, mangla te phenel kai vou ka ikanel e ezgode kai cherde ta kai sai miskonpe ta ka achen e ezgode kai nasti miskonpe.

²⁸ Goleke da fala e Devle soke e charoina kai del amen nasti miskolpe. Goleke morabi te blagosi e Devle volimaia gia sar si leke drago liubaimaia ta daraia.

²⁹ Soke amaro Del si iag kai zatril.