Ebreos 11 - Biblia ande chib Romani

O pachape e phurego

¹ O pachape si e vera kai ka la so adurichara, o pacha ande ezgode kai ni dikha.

² Goleke die lachi orba katar amare purane soke saia len pachape.

³ Ta pala o pachape amen llana kai o Del cherda e phuv ta sa so si ando miloso ta so amen dikha akana cherdilo katar so ni dikhola.

⁴ Pala o pachape, o Abel dia mai lacho kurbano e Devle neko o Kain, goleke o Del phenda kai vou saia chacho ta o Del mangla te lel so diaia le o Abel. A o Abel si mulo ta llik akana sai sikiva katar leko pachape ando Del.

⁵ Pala o pachape o Enok avilo inllardo llundo te na pinllarel o meripe ta ni marakhle le ios, soke o Del inllarda le, ta e Devleke alava phenen kai mai anglal te avel inllardo, o Enok kandiaia e Devle.

⁶ Soke te na avel amen pachape nasti ava drago e Devleke, soke te ava pasa o Del morabi te pacha kai istina si o Del ta kai pomozil golen kai roden le.

⁷ Pala o pachape o Noe kana o Del phenda leke kai ka avenpe ezgode kai ande gola llivesa ni dikhona, vou kandia ta cherda goia bari llimia te sai braduil pe familia. Ta isto pala gua pachape, o Noe dosarda e sueto ta lia o chachipe kai lelpe cheres o pachape.

⁸ Pala o pachape o Abraam kana o Del ikharda le, vou kandia ta likisto te llal kai e phuv kai o Del phendaia kai ka del le, a o Abraam ni llanela kai ka llal ta kandia e Devle.

⁹ Ta pala o pachape kai saia le zivisarda sargo iek lleno avere phuviengo isto ande phuv kai o Del phendaia leke kai ka del le. Ta zivisarda ande chare, sargo o Isaak ta o Jakob, kai i lenge o Del phendaia kai ka del len goia phuv.

¹⁰ Soke o Abraam pachala kai iek llive ka dikhel gua foro kai o Del chinadaia te cherel ta kai vazdia pe iek than zuralo.

¹¹ Ta pala o pachape kana e Sara nasti avena la minone ta o Abraam saia but phuro, o Abraam lia zor e Devletar te sai avel dad, soke pachaia kai o Del ka cherel so phendaia leke.

¹² Goleke o Abraam i kana saia pasa po meripe, avilale bari vicha sargo e cheraia e milosoke ta sargo e chisai kai si pasa e mora, kai nasti llindol.

¹³ Sa gola llene mule ta ni lie e ezgode kai o Del phendaia kai ka del len; ta pala o pachape kai saia len von dikhle len duratar, ta veselisaile ta dikhle isto von pe, sargo llene avere phuvienge kai samo nakhen katar gaia phuv.

¹⁴ Ta e llene kai phenen gaia ezgoda gale alavenchar, achardol kai von llik akana roden iek phuv.

¹⁵ A te mislisailea ande phuv katar von likistea von te manglea sai irisailea incha.

¹⁶ A von rodena iek phuv mai lachi, kai si ando miloso. Goleke o Del ni lallal te avel lengo Del, soke vou lacharda lenge iek foro.

¹⁷ Ta pala o pachape, o Abraam kana o Del zumada le, lia e Isaake te del le kurbano. Ta mangela te del pe edine chave, a o Del diaia le po alav ta phendaia leke:

¹⁸ Katar o Isaak ka avel tut iek vicha.

¹⁹ Gava si soke o Abraam llanela kai e Devle si le e zor i te vazdel e mulen; goleke gua pachape e Abraameko cherda te na mundarel pe chaurre ta gava saia sargo kana o Isaak pale zivisarda.

²⁰ Pala o pachape o Isaak blagosisarda e Jakobo ta e Esaule pala e ezgode kai saia te aven mai angle.

²¹ Pala o pachape, o Jakob kana saia po meripe dia po alav e duie chaurrenge katar o Jose kai o Del ka blagosin len, ta istardilo pe pi rovli ta blagosisarda e Devle.

²² Pala o pachape, o Jose kana saia pase te merel phenda kai e israelitura ka liken mai angle katar o Ejipto, ta mukla alava so te cheren leke kokalenchar.

²³ Pala o pachape, kana biandilo o Moises, leki dei ta leko dad gurude le trin chon, soke dikhle kai o minono saia sukar ta ni daraile katar e alava kai phendaia o charo te mundaren sa e minonen.

²⁴ Ta pala o pachape o Moises kana barilo ni kamla te ikharen le chaurro katar e chei e charoki;

²⁵ Vou mangla te maren le gia sar marena e llenen kai sea katar o foro e Devleko, a na te avel ando bilachipe kai nakhel.

²⁶ Leke mola mai but te nakhel e patnia kai saia te nakhel o Mesias neko o barvalipe katar o Ejipto.

²⁷ Pala o pachape o Moises llelotar katar o Ejipto, ta ni darailo katar e joli e charoki; ta saia zuralo pe so mangela te cherel, sargo kana dikhela e Devle kai nasti dikhol.

²⁸ Pala o pachape o Moises thoda e sinia e paskuaki ta phenda te makhen e udara e ratea ta gia o suecho e merimako te na mundarel ni iekhe purve chaurre kai biandilo ande suako familia katar e israelitura.

²⁹ Pala o pachape e israelitura nakhle e Mora e Loli sargo pe phuv e suki; ta mapalal kana e ejipsiura mangle te nakhen, von tasile.

³⁰ Pala o pachape peradinaile e zidura katar o foro o Jeriko, kana e israelitura phirde truial o foro efta llive.

³¹ Ta pala o pachape, e Rahab e kurvichka, ni muli e llenenchar kai ni kandie, soke voi pomozisarda e llenen katar o Israel kai diea ando foro po chorial.

³² ¿So mai but ka phenav? ni ka avel man vreme te dava orba katar o Jedeon, katar o Barak, katar o Sanson, katar o Jefte, katar o David, katar o Samuel ta katar e poraukura.

³³ Pala o pachape dobisarde phuvien, inllarde o chachipe, ta lie so o Del phendaia lenge kai ka del len, phangle e muia e lionenge,

³⁴ mundarde bare iaga, nasle te na aven mundarde katar o jarni, Ikande zor katar o kovlipe, ta resle te aven zurale po maripe, ta dobisarde avere llenen kai marenape ta sea lenge dusmanura.

³⁵ Sea nesave diskinie kai pachaie ando Del, goleke o Del vazdia katar o meripe lenge familia. Aver ni kamle te mukliaren len ta mule ande patnia, te sai usten katar o meripe ta te zivin iek zivoto mai lacho.

³⁶ Aver nakhle patnia soke marena espurnia lendar ta marena len e bichoia, ta phandena len e lanchonenchar ande rubie.

³⁷ Ta averen mundarde e barrenchar, averen chinde len po dopas o mundarde len e jarnienchar; a aver llana pe iek rig ta pe aver ta lenge patave sea cherde katar e morchi e bakrengi ta busniengi; sea chorre dukhade ta mardine.

³⁸ Gala llene sea gia lache, kai gaia gava sueto ni saia prema lende. Ni saia len kai te llan, phirena po pusto, pe burdura ta katar o putardipe e phuviako.

³⁹ O Del saia veselo sa gale llenenchar soke saurre pachaie ande le, a niko lendar ni lia so o Del phendaia kai ka del len;

⁴⁰ a gua saia soke o Del chinadaia iek ezgoda mai sukar, te sai la i amen so vou phendaia kai ka del. O Del ka cherel chache gole llenen kana ka cherel amen chache.