Ebreos 10 - Biblia ande chib Romani

O zakono sargo iek senka

¹ Soke o zakono e Moiseseko saia samo iek senka katar o lachipe kai saia te avel a na isto e ezgode kai saia te la. Goleke o zakono nasti cherel chache e llenen kai suako burs aven pasa o Del te den le isto gola kurbanura.

² A te avilaia istina kai o zakono sai jalavel len katar o bilachipe, von ni achardeape dosale ta muklea te den kurbanura.

³ A gala kurbanura samo blazil lenge te denpe golli katar po bilachipe suako burs.

⁴ Soke o rat katar e guruva ta katar e busne nasti ikanen o bilachipe.

O kurbano si o Kristo

⁵ Goleke o Kristo kana avilo pe gaia phuv phenda e Devleke: Ni kame kurbanura ni so si dino, goleke dian man iek esnaga.

⁶ Soke chuke inai drago e kurbanura ni so si dino te lel o bilachipe.

⁷ Ondaka phendem: Kate sem, isto gia sar si pisime mandar ando Pisipe, te cherav so tu mange Devla.

⁸ Mai anglal phenel kai o Del ni mangel ta inai leke drago e kurbanura ta niso katar so si dino katar e zivirinie, ni e kurbanura kai denpe te len o bilachipe, i kana si ezgode kai o zakono phenel te den.

⁹ Ta mapalal phenel: Kate avav Devla te cherav so tu mange. Vou si, kai ikanel e kurbanura purane ta thovel pe lengo than iek nevo.

¹⁰ O Del esvirisarda amen soke o Jesukristo cherda so mangela o Del kana vou dia pi esnaga kurbano iek drom ta ostade.

¹¹ Suako popo cherel pi buchi suako llive ta sikavel suako llive isto gola kurbanura, i kana gola kurbanura nikada nasti len o bilachipe.

¹² A o Jesukristo sikada samo iek kurbano pala o bilachipe ostade, ta mapalal beslo pe chachi rig e Devleki.

¹³ Kote aduricharel lligo ni o Del ni ka thovel leke dusmanonen telal tala leke porrne,

¹⁴ soke pala iek ezgoda kai dia cherda chache e llenen kai si esvirime e Devleke.

¹⁵ Ta o Santo Duo phenel kai gaia orba si chachi kana phenel:

¹⁶ Pe alava kai ka achav lenchar kana ka nakhen gola llivesa, ka aven gala, phenel o Gazda: ka thovav me zakonura ande lengo lio ta ka pisiv len ande lenge mislura.

¹⁷ Ta ni ka dav man ios golli katar lengo bilachipe.

¹⁸ Goleke kana o bilachipe si prostime ni trubul te da ios kurbanura ni so si dino pala o bilachipe.

¹⁹ Phlalalen, goleke akana pala o rat e Kristoko sai da bi darako ando than santisimo.

²⁰ Soke kana o Jesus mulo putarda amenge o chiti ta sikada amenge o drom e zivotoko, a gua chiti si leki esnaga.

²¹ Si amen iek baro popo thodo po cher e Devleko.

²² Goleke morabi te aven pasa o Del iekhe chache liea ta iekhe bare pachamaia, ta te aven jalade amare lie katar e mislura bilache ta te aven jalade i amare esnage iekhe paiea kai si bristo.

²³ Ta morabi te ava zurale ta te pacha ande so adurichara, soke o Del ka cherel so phenda kana dia po alav.

²⁴ Ta morabi te roda te pomozi iek avere te sai avel amen mai but volipe ta te chera o lachipe.

²⁵ Ta na muka te chidiniaiva gia sar cheren nesave llene, mai sukar da amen zor iek avere, ta mai but kana dikha kai o llive e Devleko si mai pase.

²⁶ Soke te thova amen te chera o bilachipe akana kai sikilam o chachipe, ondaka inai ios kurbano te delpe pala o bilachipe.

²⁷ Samo achel amen e dar katar e kris ta e bari iag kai ka zatril e Devleke dusmanonen.

²⁸ Kana vareko ni kandel o zakono e Moiseseko, ta te si dui o trin llene te phukaven le, kote inai zalba ta gua lleno morabi te merel.

²⁹ ¿A ni acharen tumen kai mai bari duk morabi te len gola kai thoven tala pe porrne e Devleke chave ta kai ni thoven sama pe leko rat, ta gola kai kusen e Devleko Duo kai volil len? Gua rat kai si ande sovel kai jala o Del kai dia len o prostipe.

³⁰ Llana kai o Del phenda: Man si e buchi te chinav e kris; me ka pochinav. Ta i phenda: O Gazda ka chinel e kris pe foroke.

³¹ ¡Bari ezgoda si te pere ande va katar o Del o llundo!

³² Goleke den tumen golli katar o vreme o purano, kana tumen iakom lien o villelo ta terpisarden zoriaia e patnia katar iek maripe.

³³ Bute llenen tumendar tumare dusmanura kusle len ta i marde len angla e manusa, ta tumen nakhlen duk pala so cherena lenchar.

³⁴ Ta i avila tumenge zao katar e llene kai sea ande rubie, ta veselimaia muklen te len tumendar tumare ezgode kai sea tumen, soke llanen kai ando miloso si tumen iek ezgoda but mai sukar ta kai ka achel ostade.

³⁵ Goleke na jasaren tumaro pachape, soke tumaro pachape ka anel tumenge iek baro chari.

³⁶ Morabi te avel tumen zor ande patnia, te sai cheren e volia e Devleki ta gia te sai len so vou phenda kai ka del tumen kana dia po alav.

³⁷ Soke e Devleke alava phenen gia: Oma, but oma, ka avel ko si te avel. Ta ni ka aduricharel.

³⁸ O lleno kai si mange chacho pe suako ezgoda ta pachal ande mande, ka zivil ostade. A te irilape palpale, ni ka avav veselo cheres lete.

³⁹ A amen ni sam gole llenendar kai irinpe palpale ta llan kai po jasardipe, amen sam llene kai resa te la o braduipe soke pachaiam ando Del.